د بلوچستان په مرکز کوټه کې د ملېشه ځواک پر موسا امنیتي پوسته په برید کې پینځه تنه ټپي شوي دي.
حکومتي او امنیتي چارواکو لا په دې اړه نور تفصیل نه دی ورکړی.
د برید څرنګوالی په پوره توګه لا نه دی روښانه شوی خو تحریک طالبان پاکستان یې ذمه واري منلې ده.
دا په داسې حال کې ده چې د کوټې په بګټي کرکټ لوبغالي کې د پېښور زلمي او کوټه ګلیډیېټرز ترمینځ د پاکستان سوپر لیګ (پي اېس اېل) نمایشي لوبه هم روانه ده.
د کوټې بګټي لوبغالی له موسا امنیتي پوستې لیرې پروت دی. د پي اېس اېل د نمایشي سیالۍ د امنیت لپاره شاوخوا ۳،۰۰۰ پولیس ځای پر ځای شوي دي.
ټاکل شوې چې د پي اېس اېل د اتم پړاو سیالۍ د فبرورۍ پر ۱۳مه پیل شي چې د مارچ تر ۱۹مې به روانې وي.
د ۲۰ اووریزه کرکټ د هغې اتلولۍ په سیالیو کې شپږ لوبډلې پېښور زلمي، کوټه ګلیډیېټرز، لاهور قلندرز، ملتان سلطانز، اسلام اباد یونایټېډ او کراچۍ کېنګز برخه اخلي.
د ۲۰۲۲ز کال د اتلولۍ په پایلوبه کې لاهور قلندرز، ملتان سلطانز لوبډلې ته ماتې ورکړې وه.
د پي اېس اېل د اتم پړاو لوبې د کراچۍ، راولپېنډۍ، ملتان او لاهور په لوبغالو کې کېږي چې پکې یوشمېر بهرني لوبغاړي هم برخه اخلي.
