د پاکستان د بهرنیو چارو رياستي وزيرې حنا رباني کر د افغانستان لپاره د روسیې له ځانګړي استازي ضمیرکابلوف سره ملاقات کړی دی.
د پاکستان بهرنیو چارو وزارت پر خپله وېبپاڼه لیکلي چې د جنورۍ پر ۲۵مه په اسلام اباد کې شوي دې ملاقات کې د افغانستان په ګډون د سیمې د سولې او ثبات په اړه خبرې شوې دي.
وزارت د مېرمن کر په حواله ویلي چې پاکستان ته یو باثباته افغانستان تل مهم دی. هغې زیاته کړې چې افغانستان د منځنۍ او جنوبي اسيا تر مينځ د یوه اقتصادي پل حیثیت لري او پاکستان هڅه کوي چې د سیمې د نورو هېوادونو په ملتیا دغه هدف ته ورسېږي.
په ليدنه کې دواړو لوريو له افغان طالبانو سره د "عملي ښکېلتيا" پر اړتيا بحث وکړ.
