په ایران کې له بشري حقونو سرغړونې څارونکې ډلې ویلي چې په دې هېواد کې یو مظاهره کوونکی تر تشدد وروسته په روغتون کې مړ شوی دی.
دا خبره د هینګاو په نامه هغه ناروې مېشتې ډلې د ډېسېمبر پر ۱۹مه کړې ده چې د ایران په کرد سیمو کې له بشري حقونو سرغړونې څاري.
یادې ډلې ویلي چې د دې هیواد په بوکان ښار کې یو سیاسي فعال محمد حاجي رسولپور تر نیول کېدو وروسته د کومه په حالت کې په روغتون کې مړ شوی دی. رپورټونه وايي چې پر هغه د بند پر وخت تشدد شوی دی.
هینګاو زیاته کړې چې محمد حاجي رسولپور د اکتوبر پر لومړۍ نیټه په هغه هېواد کې د مهسا امینې تر وژنې وروسته د مظاهرو پر مهال نیول شوی وو.
مهسا امیني د حجاب د ناسم استعمال په تور نیول شوې وه چې وروسته یې د سېپټمبر په میاشت کې په روغتون کې د پولیسو په ولکه کې ساه ورکړه. مظاهره چيان واييهغه پولیسو په تشدد وژلې خو پولیس وايي نوموړې د زړه درېدو له کبله مړه شوې ده.
محمد حاجي رسولپور له دې وړاندې هم د خپل کار له کبله څو ځله نیول شوی وو. نوموړی ۲۵ ورځې وروسته په ضمانت خوشې شو او د نومبر پر ۲۳مه بیا ونیول شو. د هینګاو ترمخه رسولپور ۲۰ ورځې وروسته د حراست په دوران کې د تشدد او زخمونو له وجې په کومه کې لاړ او د ډېسېمبر پر ۱۸مه یې په روغتون کې ساه ورکړه.
په فرانس کې د کردستان د بشري حقونو نیټورک وايي، پر رسولپور او نږدې ۱۰۰ نورو نیول شویو کسانو په هغو خفیه بندي خانو کې تشدد شوی چې د ایران امنیتي عسکرو جوړې کړې دي.