د نومبر پر ۲۰مه په قطر کې د فوټبال د نړیوال جام سیالۍ پیل شوې.
په دې لړ کې لومړۍ لوبه د کوربه هېواد قطر او اېکواډور ترمینځ د پيښور له وخت سره سم ماخوستن نهه او د کابل پر وخت اته نیمې بجې شروع کېږي.
دا لومړۍ ځل دی چې د فوټبال نړيوال کپ سیالۍ په يو عربي هېواد کې کېږي.
د فوټبال نړيوال جام سیالۍ په اتو لوبغالو کې کېږي. په نړيوال جام کې ۳۲ لوبډلې برخه اخلي او د اتلولۍ پایلوبه د ډېسېمبر پر ۱۸مه کېږي.
فرانسه د ۲۰۱۸ز کال د نړیوال جام اتله وه. تر دې مخکې، برازيل پینځه، جرمني څلور، اټالیا څلور، ارجنټينا دوه، فرانسې دوه او انګلستان او هسپانیې يو يو ځل نړيوال جام ګټلی دی.