د پاکستان چارواکو ویلي دي چې نړیوال بانک ورته د سېلاب ځپلو د مرستو لپاره ۱.۳ اربه امریکايي ډالر ورکوي.
د خوړو د خوندیتوب او تحقیق وزارت د نومبر پر ۱۶مه په بیان کې ویلي دي چې نړیوال بانک دا پیسې د بیړنیو چارو، کرنې او د کورونو بیاودانۍ لپاره ورکوي.
په بیان کې راغلي چې بانک به هغه پیسې د ۲۰۲۲ز کال په ډېسېمبر کې په غونډه کې تر منظورۍ وروسته ورکوي.
وزارت زیاتوي، دا توافق د جنوبي اسیا لپاره د نړیوال بانک د دوامدارې پرمختیا څانګې د مشر جان روم او د خوړو د مصوونیت یا خوندیتوب او څېړنو چارو وزیر طارق بشیر چیمه ترمینځ په غونډه کې شوی دی.
د پاکستان حکومت وايي، د جون له ۱۴مې څخه تر سېپټېمبر پورې ورښتونو او سېلابونو د هېواد اقتصاد ته د څه د پاسه ۳۰ اربه امریکايي ډالرو تاوان رسولی دی.
نړیوال بانک د نومبر په پیل کې هم اعلان کړی وو چې د انرژۍ د بېخبنا (انفراسټرکچر) جوړولو لپاره پاکستان ته درې اربه ډالر ورکوي.
