د لاسرسي ځای

تازه خبر

ايران کې د مهسا اميني د مړینې ضد مظاهرو زور اخيستی


د ۲۰۲۲ز کال د اکتوبر پر څلورمه د پوهنتونونو او ښوونځيو زده کوونکو هم په مظاهرو کې ګډون وکړ.

په ایران کې د پولیسو په تحویل کې د یوې ښځې له مړینې راهیسې حکومت ضد مظاهرې پر ۱۷مه ورځ هم روانې وې.

د اکتوبر پر څلورمه د پوهنتونونو او ښوونځيو زده کوونکو هم په هغو مظاهرو کې ګډون وکړ چې د پولیسو په تحویل کې د ۲۲ کلنې مهسا امیني تر مړینې وروسته پيل شوې وې.

پولیسو امیني د سېپټېمبر پر ۱۳مه د حجاب له قانون څخه د سرغړونې په تور نیولې وه، چې تر هغه درې ورځې وروسته مړه شوه.

پر ټولنيزو رسنيو په خپرو شویو ویډیوګانو کې د ایران په تهران، کرج، شیراز او اصفهان کې ناکراري ښکاري او هلته مظاهره چیان حکومت ضد نعرې وهي.

بل خوا د ايران ولسمشر ابراهیم ریيسي پر ولس د یووالي غږ کړی دی. نوموړي د اکتوبر پر څلورمه د پارلېمان غونډې ته په وینا کې په هېواد کې دننه "کمزورۍ او نیمګړتیاوې" ومنلې، خو د ایران د روحاني مشر ایت الله علي خامنه يي په ګډون د نورو چارواکو په شان یې د روانې ناکرارۍ تور د ایران پر "دښمنانو" پوری کړ.

په ايران کې روانه ناکراري د تېرې لسیزې په اوږدو کې تر ټولو اوږده ده، خو سمه اندازه یې ځکه نه لګي چې حکومت ټولنيزو رسنيو او انټرنېټ ته لاسرسی بند کړی دی.

XS
SM
MD
LG