د افغانستان په نورستان ولایت کې خلکو د خپل یو قومي مشر تر وژل کېدو وروسته د منډول په نامه ولسوالي له طالبانو نیولې ده.
ځايي خلک وايي که طالبان هغې ولسوالۍ ته ورشي نو له ولس سره به یې نښته وشي.
د منډول ولسوالي اوسېدونکي ادعا کوي چې دا ګام یې تر هغې وروسته پورته کړ چې د دوی په وینا، طالبانو د سيمې يو قومي مشر او د یادې ولسوالۍ پخوانی امنیه قوماندان بهرام الدین په منډول کې سېلاب ځپلو ته د مرستو رسولو په بهانه لغمان ته ورغوښتی وو او هلته يې تر نیولو وروسته په وهلو ټکولو وژلی دی.
دوی غوښتنه کوي چې د بهرام الدین وژونکي دې ګرفتار او سزا شي.
بلخوا د طالبانو د حکومت ویاند ذبیح الله مجاهد د سېپټېمبر پر ۳۰مه بي بي سي ته ويلي چې د پېښې پلټنه به کوي او هغه کسان به مجازات او د عدالت منګلو ته وسپاري چې د دې وژنې باعث شوي دي.
