د برتانیا د اوږدې مودې ملکه دویمه الېزابېت د سېپټېمبر پر اتمه، د ۹۶ کلونو په عمر مړه شوه. د هغې تر مړینې سمدستي وروسته د هغې مشر زوی چارلس د برتانیا د پاچا په توګه دنده پیل کړې.
بکېنګهم ماڼۍ د ملکې دویمې الېزابېت د مړینې خبر اعلان کړ او ویې ویل چې، زوی یې ۷۳ کلن چارلس د ملکې له مړینې سمدستي وروسته د برتانیا د پاچا په توګه دنده پیل کړه.
بکېنګهم ماڼۍ تر دې مخکې ویلي ول چې ملکه په سکاټلېنډ کې په خپل دوبني هستوګنځای کې تر روغتیایي مراقبت لاندې ده او د سلطنتي کورنۍ ټول غړي ور روان دي چې ترخوا یې و اوسي.
ملکه الېزابېت د ۱۹۲۶ کال د اپریل په ۲۱مه په لندن کې زیږېدلې وه. نوموړې د یونان له شهزاده فېلېپ مونټبټین سره چې د سمندري ځواکونو یو پوځي وو، واده کړی وو او د واده ثمره یې څلور اولادونه دي.
مشر زوی یې شهزاده چارلس دی چې له دې وروسته به د برتانیا د پاچا په توګه دنده ترسره کوي. شهزداګۍ اننی، شهزاده اندریو او شهزاده ایډورډ یې درې نور اولادونه دي.
ملکه الېزابېت د خپل پلار څلورم جورج له مړینې وروسته د ۱۹۵۳ کال د جون په دویمه په ویسټمېنسټر ابې کې د یو لړ مراسمو په ترڅ کې د ملکې تاج پر سر کړی وو.
ملکه دویمه الېزابېت د روان ( ۲۰۲۲) کال د فبرورۍ په۲۰مه، پر کوویډ ـ ۱۹ ناروغۍ اخته شوې وه چې علایم یې خفیف ښودل شوي ول، خو له رغېدو سمدستي وروسته یې بېرته خپله دنده چې تر ډېره تشریفاتي وه، پیل کړه.
د ملکه الېزابېت د مړینې په اړه د نړۍ ډېرو مشرانو خفګان څرګند کړی او د برتانیا له سلطنتي کورنۍ، د برتانیا له حکومت او د دې هېواد له خلکو سره د خواخوږۍ ښودلو دغه بهیر روان دی.
