د برتانیا د ملکې دویمې الېزابېت مېړه شهزاده فېلېپ مړی د برتانیا په شاهي هدیره کې خاورو ته وسپارل شو.
د اپرېل پر ۱۷مه، د شهزاده فېلېپ په وروستیو مراسمو کې کونډې ملکې دویمې الېزابېت او څو محدودو کسانو ګډون وکړ. دا مراسم د کورونا وایرس د مخنیوي لپاره د اقداماتو په ترڅ کې په محدود او مختصر ډول ترسره شول.
د مړي تر ښخولو مخکې په ټوله برتانیا کې د شهزاده فېلېپ اروا ته د درناوي په خاطر یوه دقیقه چوپتیا اعلان شوه.
شهزاده فېلېپ چې د ۷۳ کلونو لپاره د ملکې دویمې الېزابېت مېړه وو، د اپرېل پر نهمه د ناروغۍ له کبله مړ شو.
نوموړی له مړینې مخکې د زړه د ناروغۍ او عفونت له کبله د څه باندې یوې میاشتې لپاره په روغتون کې بستر وو او د مړینې پر مهال ۹۹ کلن وو.
د شهزاده فېلېپ د جنازې مراسم د لندن په لوېدیځ کې په سېنټ جورج کلیسا کې دننه په وېنډزر کلا کې ترسره شول.
د دې مراسمو ګډونوالو ته سپارښتنه شوې وه چې باید د کورونا وایرس د مخنیوي لپاره ټولنیز واټن په پام کې ونیسي.
شهزاده ۱۴ کاله د برتانیې په شاهي بحري ځواکونو کې خدمت وکړ او د دویمې نړیوالې جګړې شاهد پاتې شوی وو.
د موسیقۍ او سندرو هغه ټوټې چې د جنازې په مراسمو کې وغږول شوې، د شهزاده فېلېپ د پوځي خدمتونو او د څه باندې ۷۰ کلونو موده کې له ملکې سره د ده د ملاتړ لپاره وې.
د برتانیا ملکه راتلونکې اوونۍ ۹۵ کلنه کېږي.
د شهزاده فېلېپ په جنازه کې د برتانیا د وسله والو ځواکونو سرتېري په منظمو لیکو کې ودرېدل او د درناوي لپاره د توپونو ډزې وشوې.
په مراسمو کې د خلکو د ګڼې ګوڼې د مخنیوي په مقصد هر څه د وېنډزر په پوځي کلا کې دننه ترسره شول، خو دا ټول جریان پر ټېلېوېژنونو په ژوندۍ بڼه خپرېده.
شهزاده وېلییم او ورور یې شهزاده هیري هم په مراسمو کې حاضر ول. د شهزاده فېلېپ تر مړینې مخکې امریکا ته د شهزاده هیري او د هغه د امریکايۍ مېرمنې مېګن کډه کېدلو د برتانیا د شاهي کورنۍ ستنې کمزورې کړې.
ډاکترانو مېګن ته، چې د دویم ځل لپاره حامله ده، سپارښتنه کړې چې د صحي دلایلو له کبله باید سفر و نه کړي او دا مراسم دې په کیلېفورنیا کې له خپل کور څخه په ټېلېوېژن وګوري.
د فېسبوک تبصرې