د ترکیې رسنۍ وايي چې دې هېواد افغانستان ته د هغو افغانانو کډوالو ستنولو ته دوام ورکړی چې د اوسيدو قانوني اسناد نه لري.
د انادولیا رسمي خبري اژانس د راپورله مخې ۳۶۳ افغان کډوال د دې هېواد چارواکو استانبول ته لېږدولي چې له هغه ځایه یې افغانستان ته واستوي.
دغه افغان کډوال د ترکیې په ادیرنه ښار کې نیول شوي دي. د راپور له مخې دغو افغانانو چې په غیر قانوني توګه یې په دې ښارکې ژوند کاوه، له همدې امله چې د استوګنې قانوني اجازه یې نهلرله، بېرته افغانستان ته لېږل کېږي.
خو دا نهدي ویل شوي چې دوی به کله افغانستان ته لېږل کېږي.
ترکیې په دې وروستیو کې د افغان کډوالو د ایستلو بهیر چټک کړی دی. تېره مياشت یې ۲۲۷ افغانان ایستلي وو او هغه مهال یې ویلي وچې له غیر قانوني کډوالو سره به جدي چلند کوي.
