د امريکا په سېنېټ کې دواړو ګوندونو په لوی اکثريت د ۷۷۰ اربه ډالرو دفاعي لګښتونو قانوني مسوده منظوره کړې ده.
د استازو جرګې د روانې میاشت په پیل کې د ملي دفاع د لګښتونو د اجازې قانون (نیشنل ډيفنس اترایزېشن ایکټ) په نوم مسوده منظوره کړې وه. اوس به دا مسوده د قانون جوړېدو لپاره د ولسمشر جو بایډن لاسلیک ته استول کېږي.
د ډېسېمبر پر ۱۵مه د رېپبلکن او ډېموکراټ ګوندونو سېنېټرانو په ګډه د مسودې ملاتړ وکړ چې په حق کې يې ۸۸ او مخالفت کې يې ۱۱ رايې وکارول شوې.
له دې قانون سره سم، نه یوازې د دفاعي لګښتونو اجازه ورکول کېږي بلکې د امريکا پوځ لپاره پالیسي جوړېږي او د متحدانو او شريکانو لپاره مرسته برابروي.
دا قانوني مسوده د يو کمېشن د جوړېدو منظوري هم ورکوي چې د افغانستان د ۲۰ کلنې جګړې د ناکاميو او ورڅخه د ترلاسه شویو درسونو ارزونه وکړي.
امريکا د ۲۰۲۱ز کال په اوړي کې له افغانستانه خپل پوځیان وایستل او طالبانو هغه هېواد ونیوه.
هغه کمېشن به له لومړنۍ غونډې سره سم، د يوه کال په موده کې ابتدايي او په درې کلونو کې به بشپړ رپورټ خپور کړي.
