د افغانستان ازادو خبريالانو ټولنه وايي چې د کابل ټايمز ورځپاڼې پر خبريال سيد راشد کاشفي د يو پروګرام د ويډيو جوړولو په وخت تشدد شوی دی.
د یادې ټولنې مشر حجت الله مجددي د ډېسېمبر پر ۱۲مه نېټه رسنيو ته په ليږلې يوه خبرپاڼه کې هغه تصویرونه هم استولي دي چې د کاشفي پر ملا د سختو وهلو نښانونه ښيي.
مجددي دا کار غندلی او له طالبانو یې له رسنيو سره د ښه چلند غوښتنه کړې.
د طالبانو کورنيو چارو وزارت د ډېسېمبر ۱۲مه نېټه په يو بيان کې وويل چې د خبريالانو خونديتوب ته ژمن دي او د دې پېښې څېړنه به کوي. طالبانو د اګست له پينځلسمې په افغانستان کې حکومت پيل کړی. له هغه راهیسې په زرګونو خبريالان د ځان خوندي ساتلو لپاره نورو هېوادونو ته کډه شوي دي.
