د امریکا د بهرنیو چارو وزیر انتوني بلېنکن د سېپټېمبر پر ۱۴مه د دویمې ورځې لپاره د سېنېټ د بهرنیو اړیکو کمېټۍ پروړاندې سختو پوښتنو ته مخامخ شو.
د سېنېټ د بهرنیو اړیکو د کمېټې مشر باب منندیز چې د ډموکرات ګوند غړی دی وویل، له افغانستانه د امریکايي ځواکونو وتل یوه لویه تېروتنه وه.
هغه د ولسمشر جو بایډن ادارې ته خپله غوښتنه کېښوده: "د بایډن له ادارې غواړم چې پر افغانستان متمرکز پاتې شي. ډېره مهمه ده، چې نړۍ هر وخت د طالبانو سرغړونو ته په کتو ممکنه اقدام وکړي."
د سېنېټرانو له انتقادونو سره- سره د بهرنیو چارو وزیر انتوني بلېنکن وویل، اوس د دې وخت راغلی چې په افغانستان کې د امریکا تر ټولو اوږده جګړه پای ته ورسېږي او امریکا په افغانستان کې خپل حضور پای ته ورسوي.
بلېنکن د سېپټېمبر پر ۱۴مه یو وار بیا د افغانستان د وضعیت په اړه د پوښتنو د ځواب ویلو لپاره کانګرس ته حاضر شوی و، تېره میاشت له افغانستانه د امریکايي وګړو او د هغوی د افغان همکارانو د وتلو پروسې دفاع وکړه.
یوه سېنېټر جېمز ریچ له افغانستانه د امریکايي ځواکونو د ناڅاپه وتلو پر موضوع انتقاد وکړ او دا یې یوه 'ناوړه ماتې' وبلله.
خو د بهرنیو چارو وزیر اینتني بلېنکن د سېپټېمبر پر ۱۳مه چې د استازو جرګې ته حاضر شوی و، د ولسمشر بایډن د ادارې پرېکړې دفاع وکړه.
هغه د سېپټېمبر پر ۱۴مه د مشرانو جرګې د بهرنیو اړیکو کمېټې ته وویل، واشنګټن او متحدان یې د افغانستان وضعیت له نېږدې څاري: "طالبانو ژمنه کړې چې د القاعده، اسلامي دولت ډلې د خراسان څانګې په څېر د ترهګري ډلو مخه به نیسي چې د افغانستان له خاورې به د امریکا او د هغې د متحدانو امن ته ګواښ نه پېښېږي. له دوی سره به حساب کتاب کوو. په دې معنی چې یوازې به د دوی پر خبرو اکتفا نه کوو. تهدیدات ارزوو او د اړتیا په صورت کې به د دغو ګواښونو د شنډولو لپاره په سیمه کې د ترهګرۍ ضد عملیاتو د پیاوړي کولو اقدام کوو. هغه څه چې له پوځي ځواک پرته یې د نړۍ په نورو هېوادونو کې هم ترسره کوو."
د سېپټېمبر پر ۱۴مه له دې سره هم مهاله د طالبانو حکومت د بهرنیو چارو سرپرست وزیر امیر خان متقي هم وویل چې دوی نه پرېږدي د افغانستان له خاورې پر کوم بل هېواد حمله وشي.
ځینو امریکايي سېنېټرانو پر پاکستان هم انتقاد وکړ چې د طالبانو ملاتړ کوي او دوی ته یې کلونه- کلونه په خپله خاوره کې پناه ورکړې وه.
امریکا تېره میاشت وروسته له هغې چې طالبانو پر کابل ولکه ټینګه کړه، له افغانستانه د خپلو وګړو او افغان همکارانو د ایستلو بهیر پیل کړ.
له افغانستانه د امریکايي ځواکونو د وتلو بهیر د اګسټ میاشتې پر ۳۱مه بشپړ شو.
که څه هم د امریکا د سېنېټ د بهرنیو اړیکو کمیټه کې له افغانستانه د امریکايي ځواکونو د ناببره وتلو په اړه انتقادونه وشول، خو بیا هم ځینو سېنېټرانو د کابل له نړیوال هوایي ډګره د دوو اوونیو په موده کې د خلکو د انتقال بهیر وستایه او یوه لویه هڅه یې وبلله.
د فېسبوک تبصرې