په غور کې د یوې پخوانۍ پولیسې وژنې غبرګونونه پارولي دي او د مړینې په اړه یې یوه ویډیو پر ټولنیزو شبکو خپره شوې.
مشال راډیو پر ټولنیزو شبکو د هغې ویډیو د کره والي تصدیق نه شي کولای چې پکې د پولیسې تر مړینې وروسته صحنه ښوول شوې. طالبان وايي، د پېښې پلټنې کوي.
د نګار په نوم د ښځې کورنۍ د سېپېټمبر پر پینځمه وویل چې نوموړې وړمه شپه په غور کې "نامعلومه کسانو" ویشتلې ده.
د هغې پخوانۍ پولیسې د کاکا زوی پیر محمد د سېپټېمبر پر پینځمه مشال راډیو ته وویل چې درې کسانو له پولیسو سره د همکارۍ په تور ووژله.
د نګار کورنۍ وايي چې نوموړې حامله هم وه.
پر ټولنیزو شبکو یوشمېر خلکو د پېښې په غبرګون کې لیکنې کړې دي او تور یې پورې کړی چې طالبانو نګار وژلې.
تر اوسه معلومه نه ده چې د پېښې تر شا د چا لاس دی، خو ځینو خبري اژانسونو د خپلو سرچینو په حواله طالبان د پېښې احتمالي عاملین بللي دي.
د غور لپاره د طالبانو د پوځي کمېسیون مسوول نېک محمد حذیفه مشال راډیو ته ویلي، په دې تړاو یې دوه تنه نیولي او پلټنې یې ترې پیل کړې دي.
