د لاسرسي ځای

تازه خبر

خبرونه

د پاکستان حکومت د پېټروليم مصنوعاتو نرخونه کم کړي

په کراچۍ ښار کې یو پېټرول پمپ. انځور- ارشیف

د اګست پر ۳۱مه د پاکستان ماليې وزارت لخوا په خپرې شوې اعلاميه کې راغلي چې د پېټرولو او ډيزلو په يو ليټر بيعه کې د يوې نيمې روپۍ کمی شوی دی.

په اعلاميه کې راغلي چې د يو ليټر خاورو تيلو په بیعه کې هم يوه نيمه روپۍ او د يو ليټر لايټ ډيزلو په نرخ کې يوه روپۍ کمی شوی دی.

د خزانې وفاقي وزارت ترمخه د يو ليټر پېټرولو بیعه به اوس ۱۱۸ روپۍ او ۳۰ پيسې وي. همدا راز د يو ليټر ډيزلو نوی نرخ ۱۱۵ روپۍ او درې پيسې، د لايټ ډيزلو تيلو يو ليټر قيمت ۸۴ روپۍ او ۷۷ پيسې او د خاورو تيلو يو ليټر نوی قيمت ۸۶ روپۍ او ۸۰ پيسې ټاکل شوی دی.

نوي قيمتونه د سېپټېمبر له لومړۍ نېټې څخه عملي شوي دي. په اعلاميه کې راغلي چې د دې ګام هدف د ولس د استعمال شيانو په نرخونو کې کمی کول دی.

په پاکستان کې ډېری خلکو مشال راډیو ته ويلي دي چې ګرانۍ يې ژوند له مشکلاتو سره مخ کړی دی.

د نننۍ ورځې ټول خبرونه وګورئ

پنجشیر کې په ډله ییزه توګه د خلکو د وژلو راپورونه ردوو: طالبان

د پنجشیر بازارک ولسوالۍ کې وسله وال طالبان

د طالبانو ویاند او د اطلاعاتو او فرهنګ وزارت مرستیال ذبیح الله مجاهد د سېپټېمبر پر۲۰مه مشال راډیو ته وویل چې د پنجشیر تر نیولو وروسته یې هېچا ته زیان نه دی رسولی.

نوموړي وايي، د طالبانو غړیو په پنجشیرو کې له خلکو سره بېلابېلې مرستې هم کړي دي.

تر دې مخکې د ملي مقاومت جبهې ادعا کړې وه چې طالبانو په پنجشير کې په ډله ييزه توګه خلک وژلي دي.

د بشري حقونو ځينو مدافعينو هم مخکې طالبان تورن کړي وو چې په پنجشير کې يې يو شمير خلک وژلي دي.

پنجشير د افغانستان وروستې ولايت وو چې د طالبانو تر ولقې لاندې راغې.

د مقاومت جبهې وياند علي ميثم نظري په خپل ټويټر ويډيو خپره کړې او ويلي يې دي چې د دوی کسان لاهم د پنجشير په ګڼو لوړو درو او مرتفع سيمو کې موجود او جګړه کوي.

هند پولیس له افغانستانه وروړونکي درې زره کیلوګرامه هېروین نیولي

د هندي چارواکي وايي، د دې هېروینو ارزښت دوه اربه او ۷۰۰ میلیونه ډالره اټکل شوی دی. انځور - ارشیف

د هند چارواکي وايي، د هېواد په یوه لوېدیځ بندر کې یې هغه نېږدې درې زره کیلوګرامه هېروین نیولي چې له افغانستانه وروړل شوي ول.

فرانس پریس خبري اژانس د هندي چارواکو له خولې لیکلي چې د دې هېروینو ارزښت دوه اربه او ۷۰۰ میلیونه ډالره اټکل شوی دی.

د دې هېروینو د انتقال په تور د هند دوه وګړي نیول شوي هم دي.

د هند د ګمرکونو استخباراتي ادارې د سېپټېمبر پر ۲۰مه ویلي چې دا نشيي مواد له افغانستانه د ایران د یوه بندر له لارې د هند تر ګجراته رسول شوي ول.

دې ادارې ویلي چې ځینې افغان وګړي هم په دې قاچاق کې ښکېل دي خو تر اوسه نیول شوي نه دي.

افغانستان په نړۍ کې د هېروینو تر ټولو لوی موندونکی ګڼل کېږي.

د نړۍ ځواکمن هېوادونه له ایران سره د اټومي تړون پر بحالۍ خبرې کوي

اروپايي ټولنه د منځګړي په توګه هڅه کوي چې د ایران او د نړۍ د ځواکمنو هیوادونو ترمنځ هغه تړون بحال کړي چې په ۲۰۱۸ز کال کې د امریکا له واتلو وروسته مخ پر کمزورۍ دی. انځور - ارشیف

ټاکل شوې چې د بریتانیا، چین، فرانس، جرمني او روس وزیران روانه اوونۍ په ملګرو ملتونو کې د ایران له استازي سره لیده کاته وکړي.

د فرانس د بهرنیو چارو وزیر جیان یویس لي دریان ویلي چې د دې خبرو اترو هدف دا دی چې د ۲۰۱۵ز کال د داټومي تړون د برحاله کولو لپاره د خبرو بیا پیلولو هڅې کوي.

په نړیوالو بندیزونو کې د نرمښت په بدل کې د ایران اټومي پروګرام محدودولو په اړه د تهران او نړیوالو ترمینځ خبرې اترې له هغه راهیسې ولاړې دي چې ایران سږکال د جون په میاشت کې بنسټپاله ابراهیم رئیسي ولسمشر وټاکلو.

اروپايي ټولنه د مینځګړي په توګه هڅه کوي چې د ایران او د نړۍ د ځواکمنو هېوادونو ترمینځ هغه تړون بحال کړي چې په ۲۰۱۸ز کال کې د امریکا له واتلو وروسته مخ پر کمزورۍ دی.

اروپایي ټولنه: په افغانستان کې بشري حقونه تر ګواښ لاندې دي

د افغانستان لپاره د اروپایي ټولنې سفیر ون برنډت

د افغانستان لپاره د اروپایي ټولنې سفیر وایي، دغه هېواد کې بشري حقونه تر ګواښ لاندې دي.

سفیر ون برنډت بېګا ماښام پر خپله ټویټرپاڼه ولیکل چې تعلیم او کار ته د نه‌لاسرسي حق هغه موضوع ده چې دی یې اندېښمن کړی دی.

نوموړی دا اندېښنه تر هغه وروسته څرګندوي چې د طالبانو په راتګ د بې‌کارۍ او بې‌وزلۍ کچه لوړه شوې ده.

د ښځو د حقونو په برخه کې اندېښنې وروسته تر دې زیاتې شوې چې طالبانو وروستیو کې له شپږم ټولګي پورته ښځینه زده‌کوونکو ته د "شرایطو" تر برابرېدو کور کې د پاته کېدو سپارښتنه وکړه.

کابل کې د دولتي ادارو ځینو ښځینه کارکوونکو ادعا کړې چې کار ته د تګ اجازه نه‌ورکول کېږي.

طالبان بیا وایي، د ښځو د تعلیم او کار حق ته درناوی کوي، خو اوس په دې بوخت دي چې دې برخه کې د خپلو تګلارو له مخې شرایط برابر کړي.

داعش په ننګرهار کې په تېرو دوو ورځو د خونړیو حملو ذمه واري ومنله

جلال‌اباد ښار کې د یوې چاودنې په سیمه کې د څېړنو لپاره راټول شوي طالبان

د اسلامي دولت ډلې یا داعش په ننګرهار کې په تېرو دوو ورځو کې د خونړیو حملو مسولیت پر غاړه واخیست.

په دغو حملو کې چې د ننګرهار په مرکز جلال‌اباد کې د شنبې او یکشنبې په ورځو وشوې د طالبانو موټر په نښه شوي و.

د شنبې په ورځ په درېیو جلا چاودنو کې د طالبانو موټر په نښه شوي چې لږترلږه دوه تنه پکې وژل شوي او یوشمېر نور ټپیان شوي او په یکشنبه هم د طالبانو پریوه موټر په چاودنه کې د یوه ماشوم په ګډون لږترلږه پینځه تنه ووژل شول او یوشمېر نور ټپیان شول.

د اعماق په نوم وېب‌پاڼه کې چې د داعش یوه تبلیغاتي پاڼه بلل کېږي، د اسلامي دولت ډلې د خراسان څانګې په دوو بیانونو کې د دواړو ورځو د چاودنو مسؤلیت اخیستی او ادعا یې کړې چې په دې بریدونو کې یې له ۳۰ زیاتو طالبانو ته مرګ‌ژوبلې اړولې.

تر دې وړاندې دې ډلې په کابل کې د اګست میاشتې په وروستو کې د هغه خونړي برید مسولیت اخیستی و چې د کابل په هوایي ډګر کې وشو او د ۱۳ امریکایي سرتېرو په ګډون له ۱۵۰ زیات کسان پکې ووژل شول او په سوونو نور هم پکې ټپیان شول.

په جلال‌اباد کې د داعش د ډلې حملې له هغې وروسته چې طالبان په افغانستان کې واک ته رسېږي، پر طالبانو لومړنۍ شدیدې حملې بلل کېږي. خو طالبان داعش د دوی په ټکو "شر اچوونکې" ډله بولي او وایي ژر به‌ یې ریښې په افغانستان کې وچې کړي.

اسرایل وايي، له تښتېدلو شپږ فلسطیني بندیانو یې پاتې دوه هم نیولي

د اسرايل پوځ ويلي چې دوه اوونۍ وړاندي تر سخته څارنه لاندې زندان څخه تښتېدلیو شپږو فلسطيني بنديانو کې پاتي دوه يې هم نيولي دي. (انځور: ارشیف)

د اسرايل پوځ ويلي چې دوه اوونۍ وړاندي تر سخته څارنه لاندې زندان څخه تښتېدلیو شپږو فلسطيني بنديانو کې پاتي دوه يې هم نيولي دي.

یاد پوځ د سېپټمبر پر ۱۹مه په بيان کې وويل چې ځانګړو ځواکونو یې د لویدیځې څنډې په شمال کې په جنين کې د عملياتو پرمهال دوه کسان بیرته نیولي دي.

په بيان کې راغلي چې د دوی په وینا، ”له دوو ترهګرو سره" یې هغه دوه نور کسان هم نیولي دي چې له دوی سره یې په تښتېدو کې مرسته کړي وه.

بیان زیاتوي چې څلور واړه کسان يې پوښتنو ګرویږنو لپاره وړي دي.

پر اسرايل د بريدونو په تور نيول شوي هغه شپږ بنديان، د ۲۰۲۱م کال د سېپټبېمبر پر شپږمه له جلبوعه زندانه د سرنګ تر کيندلو وروسته تښتېدلي ول.

تېره اوونۍ اسرايلي ځواکونو د هېواد په شمال کې په پراخو عملياتو کې څلور بنديان نيولي وو.

د بخښنې نړیوال سازمان وايي، امريکا بايد په کابل کې د ولسي وګړو د وژل کېدو پېښې پلټنو ته هوډ وښيې

د بښنې نړيوال سازمان ويلي، امريکا بايد اوس د دې پېښې بشپړو، شفافو او بې طرفه پلټنو ته هوډ وښيې.

له هغه وروسته چې امريکا ومنله چې له افغانستانه يې د ځواکونو تر ايستلو څو ورځې له مخه ۱۰ بېګناه ولسي وګړي وژلي، د بښنې نړيوال سازمان دا لومړۍ مثبت ګام بللی دی.

سازمان ويلي، امريکا بايد اوس د دې پېښې بشپړو، شفافو او بې طرفه پلټنو ته هوډ وښيې.

د لندن مېشت سازمان د کړکېچ د چارو لوړ پوړي سلاکار براين کاسټنر د سېپټمېبر پر ۱۷مه نېټه ويلي چې د امريکا له خوا دا اعتراف د کابل د وژنو په لړ کې د احستاب په برخه کې يو مهم ګام دی خو د ده په خبره نور هم ډېر څه شته چې بايد وشي.

د امريکايي پوځ د مرکزي قوماندانۍ په پلټنو کې معلومه شوې وه چې د اګست ۲۹مې ډرون بريد کې يو مرستندويه کارکوونکی او د هغه د کورنۍ نهه کسان وژل شوي ول.

ښاغلي کاسټنر ويلي چې هر هغه څوک چې ورباندې د دې مجرمانه کړنې شک دی بايد په عادلانه محاکمه کې سزا شي. د ده په وينا، د وژل شويو کسانو کورنۍ ته بايد بشپړ تاوان ورکړل شي.

خيبر پښتونخوا کې اپوزیشن ګوندونه د ګرانۍ پرضد احتجاج پیلوي

چارسده: مولانا فضل الرحمان او اسفندیار خان په ولي باغ کې خبري غونډه کوي: ۲۰۱۹ ز کال، ۱۴م اکتوبر

په خيبر پښتونخوا کې اپوزیش ګوندونو عوامي نېشنل پارټۍ او جمیعت علما اسلام ف ډلې د سېپټېمبر پر ۱۹مه د ګرانۍ پرضد د مظاهرو کولو اعلانونه کړي دي.

د عوامي نېشنل ګوند مرکزي وياند زاهد خان د سېپټېمبر پر ۱۷مه مشال راډیو ته وويل چې په ملک کې د پېټرولو او خوراکي شيانو نرخونه لوړ شوې دي.

د ده په وینا، که چيرې دوی يې پرضد راپانڅېدل نو دا هېواد او ولس به يې له ډېرو ستونزو سره مخامخ شي.

بلخوا د جمیعت علما اسلام صوبايي ویاند جليل جان هم د سېپټېمبر پر ۱۷مه مشال راډیو ته وويل چې حکومتي ګوند پاکستان تحریک انصاف له انتخاباتو مخکې له ولس سره کړې ژمنې نه دې پوره کړي.

د ده په وینا، دا وخت په ملک کې ډېره ګراني ده نو ځکه دوی په ټوله صوبه کې د حکومت پر ضد د مظاهرو اعلان کړی دی.

دا په داسې حال کې ده چې په دې وروستيو کې د يو ډالر نرخ ۱۷۰ پاکستانيو روپيو ته له رسېدو سره په پاکستان کې د يو ليټر پېټرولو نرخ هم پينځه روپۍ پورته شوی دی.

د پاکستان د اطلاعاتو وزیر فواد چودري په خپل يو بيان کې ویلي چې د ۷۵ فیصده پاکستانيو وګړو امدن زیات شوی دی.

شمالي وزیرستان کې د ګوزڼ مخنیوي پينځه ورځنی کمپاين پیل شوی

چارواکي وايي، ۵۳۳ ټيمونه يې جوړ کړي چې کور په کور ماشومانو ته د ګوزڼ مخنيوي څاڅکي ورکوي. انځور - ارشیف

په شمالي وزیرستان کې د سېپټېمبر له ۱۷مې راهيسې د پوليو ضد پینځه ورځنی کمپاين پیل شوی دی.

د شمالي وزيرستان مرستيال کمېشنر شاهد علي خان د سېپټېمبر پر ۱۷مه مشال راډیو ته وويل چې په دې کمپاين کې به هغو نېږدې يو لاک اته زره ماشومانو ته د پوليو مخنيوي څاڅکي ورکوي چې عمرونه يې تر پينځو کالو کم دي.

نوموړی وايي، ۵۳۳ ټيمونه يې جوړ کړي چې کور په کور ماشومانو ته د ګوزڼ مخنيوي څاڅکي ورکوي.

دا په داسې حال کې ده چې د صحت چارو لپاره د پاکستاني وزیراعظم ځانګړي سلاکار ډاکټر فیصل سلطان د سېپټېمبر پر ۱۷مه په اسلام اباد کې يوې خبري غونډې ته په وينا کې وويل چې په پاکستان کې په تېرو اووه میاشتو کې د ګوزڼ یوه پېښه هم مخې ته نه ده راغلې.

پاکستان او افغانستان د نړۍ هغه یوازیني دوه هېوادونه دي چې پکې اوس هم د پولیو ناروغي شتون لري او روان کال په پاکستان کې د پولیو اته کېسونه رپورټ شوي دي.

نیو زيلینډ د امنیتي ګواښ له کبله له پاکستان سره کرکټ لوبې وځنډولې

د نیو زیلینډ کرکټ بورډ ویلي چې حکومت یې د پاکستان په اړه د امنیتي ګواښ سطخ لوړه کړې ده نو ځکه دغه لوبې لغوه کوي. انځور - ارشیف

پاکستان کرکټ بورډ وايي، هغه هېواد ته ورغلې د نیو زیلینډ لوبډلې د امنیتي ګواښ له امله د میچونو ځنډولو پرېکړه کړې ده.

دا خبره پي سي بي د سېپټېمبر پر ۱۷مه پر خپله وېبپاڼه په بیان کې کړې.

په بیان کې ویل شوي چې د نیو زیلینډ کرکټ لوبډلې ورته وویل چې هغوی ته د امنیتي خبرداري په اړه معلومات ورکړل شوي نو ځکه یې د لوبو د ځنډولو یو طرفه پرېکړه کړې ده.

د پاکستان کرکټ بور‌ډ بیان تر هغې وروسته مخې ته راغلې چې د نیو زیلینډ کرکټ بورډ ویلي چې حکومت یې د پاکستان په اړه د امنیتي ګواښ سطح لوړه کړې ده نو ځکه دغه لوبې لغوه کوي.

د نیو زیلینډ کرکټ لوبډله شاوخوا ۱۸ کاله وروسته پاکستان ته تللې وه.

ټاکل شوې وه چې هغوی هلته له کوربه لوبډلې سره درې یو ورځنۍ او پینځه ۲۰ اووریزه سیالۍ وکړي.

پاکستان کرکټ بورډ په بیان کې ویلي چې دوی د نیو زیلینډ د کرکټ لوبډلې د امنیت ټول انتظامات برابر کړي ول.

بیان زیاتوي، وزیراعظم عمران خان په دې لړ کې د نیو زيلینډ له وزیراعظمې جیسنډا ارډن سره په ټېلېفون خبرې وکړې او ورته یې وویل چې د هېواد استخباراتي نظام یې د نړۍ په بهترینو نظامونو کې یو دی.

پي سي بي وویل، دې ته تیار دي چې دغه میچونه د کوم بل وخت لپاره وټاکل شي.

روس د منځنۍ اسیا له ملګرو هېوادونو سره د افغانستان پر حالاتو غږېږي

د روسیې ولسمشر ولادمیر پوټین د CSTO په سرمشریزه کې د ویډیويي کنفرانس پر مهال.

روسیې او د منځنۍ اسیا متحدینو یې د تاجکستان په پلازمینه دوشنبه کې د افغانستان په اړه دوه ورځنۍ خبرې پیل کړي دي.

د روسیې په مشرۍ د اجتماعي امنیت تړون د سازمان یا CSTO مشرانو سېپټېمبر پر۱۶مه په دوشنبه کې سره وکتل چې ورپسې به د شانګهای همکارۍ د سازمان غونډه کېږي. چین هم د دغه سازمان غړی دی.

دا خبرې په داسې حال کې کېږي چې ماسکو او بیجینګ غواړي، په افغانستان کې د امریکا په مشرۍ د ۲۰ کلن پوځي ماموریت په پای کې په کابل کې د لوېدیځ تر ملاتړ لاندې د حکومت له چټک پرځېدو څخه وروسته ځان د کلیدي لوبغاړو په توګه ثابت کړي.

د روسیې ولسمشر ولادمیر پوتین د CSTO په سرمشریزه کې د ویډیو کنفرانس له لارې برخه واخېسته.

د هغه د نېږدې کړۍ په همکارانو کې د کووېډ- ۱۹ ناروغۍ خورېدو له کبله نوموړي ځان له خلکو جلا ساتلی دی.

په دې غونډه کې د ارمینیا، بېلاروس، قازقستان، کرغزستان او تاجکستان مشرانو ګډون وکړ.

فرانس وايي په افریقا کې یې د داعش وسله والو مشر وژلی دی. 

د فرانس ولسمشر وايي د افریقا په لویه صحرا کې د اسلامي دولت وسله والې ډلې یو مشر وژلی دی. انځور له ارشيفه

د فرانس ولسمشر ويلي چې ځواکونو يې په افریقا کې د داعش وسله والو مشر وژلی دی.

د فرانس ولسمشراېمانول مکرون د سېپټېمبر پر ۱۶ مه) په خپله ټویټر پاڼه په یو بیان کې لیکلي چې د افریقا په لویه صحرا/دښته کې فرانسوي ځواکونو د اسلامي دولت وسله والې ډلې داعش مشر عدنان ابو ولید الصحراوي وژلی دی.

د مکرون په وینا، دا یې د افریقا په ساحل سیمه کې د ترهه ګرۍ ضد جګړه کې یوه بله لویه بریا ده. نوموړي دا نه دي ویلي چې الصحراوي کله او په کوم خاص ځای کې ووژل شو.

الصحراوي په ۲۰۱۷ز کال کې د هغه برید ذمه واري منلې وه چې پکې څلور امریکايي او څلور نایجرياييي پوځیان وژل شوي ول. دا راز الصحراوي په ۲۰۲۰ز کال کې د فرانس د خیریه ادارې د شپږو کارکوونکیو او د هغوی د ډرایور د وژنې امر کړی وو.

د افریقا په لویه صحرا کې داعش په بورکینا فاسو، مالي او نایجر کې فعاله ده چې پکې امنیتي ځواکونه او ولسي خلک په نښه کوي. یاد هېوادونه پخوا د فرانس کالونیانې پاتې شوي دي.

فرانس د افریقا په ساحل سیمه کې د ترهه ګرۍ ضد مبارزې په اولني صف کې دی او په دغه سیمه کې یې ۵۰۰۰ پوځیان میشت دي.

خیبر پښتونخوا کې تعلیمي ادارې بیا پرانستل شوې

تمبوزک وهلې زده کوونکو سکولونو ته روانې دي - د ۲۰۲۱ز د فبرورۍ لومړۍ نېټې انځور.

په خیبر پښتونخوا کې له ننه (سېپټېمبر ۱۶مې) تعلیمي ادارې بيا پرانستل شوي دي.

دغه تعليمې ادارې د کورونا وبا څلورمې څپې له وجې بندې کړل شوې وي.

د صوبې د تعلیم وزیر شهرام خان ترکۍ د سېپټېمبر پر ۱۵مه پر خپل فېسبوک پاڼه ورکړي چې د بنو ضلعې پرته د صوبې په ټولو ضلعو کې به سرکاري او نجي تعلیمي ادارې خلاصې وي او ۵۰ فیصده زده کونکي به د اونۍ درې ورځې او باقي ۵۰ فیصده به پاتې درې ورځې خپله حاضري کوي.

صوبایي حکومت یوازې په بنو ضلعه کې د کورونا وایرس مخنیوي په غرض د سېپټېمبر تر ۲۲مې د ټولو تعلیمې ادارو د تړلو اعلان کړی دی.

بلخوا تر دې وړاندې د تعلیم وفاقي وزیر شفقت محمود پر خپل ټوېټر پاڼه لیکلي وو چې د سېپټېمبر له ۱۶ مې به د سکولونو، کالجونو او پوهنتونونو پشمول د هېواد ټولې سرکارې او نجي تعلیمي ادارې پرانستل شي.

دا په داسې حال کې ده چې په پاکستان کې په تېر یوه شواروز کې د کورونا ۳،۲۰۰ مثبتې پېښې رپوټ شوي دي. له دې سره په هغه هېواد کې د کورونا د مثبتو کېسونو شمېر له ۱۲ لکه ۱۵ زرو اوښتی دی خو تر ۱۱ لکه ۱۲ زرو زيات کسان ترې بیرته رغېدلي هم دي.

د سرکاري ووبپاڼې له مخې په تېرو ۲۴ ساعتونو کې ۶۶ کسان له کورونا ناروغۍ مړه شوي دي چې ورسره په پاکستان کې له کورونا وایرسه د مړو شمېر ۲۷،۰۰۴ ته رسېدلی دی.

مخکښه لیکواله او شاعره زیتون بانو ومړه

لیکواله زیتون بانو

د پښتو نومیاتې شاعره او لیکوله د سېپټېمبر پر ۱۴مه په پېښور کې د ناروغۍ له کبله د ۸۳ کالو په عمر وفات شوه.

زیتون بانو په شعر، ادب او نثر ډېر کار کړی او د راډیو او ټي وي لپاره یې هم ډرامې لیکلي دي. نوموړې د پښتو ترڅنګ په اردو ژبه کې هم لیکل کړي دي او تر ۲۴ زیات کتابونه یې چاپ شوي دي.

د هغې د ادبي خدماتو پر سر ورته د پاکستان حکومت د تمغه امتیاز جایزه هم ورکړې وه.

د زیتون بانو جنازه نن( د سېپټېمبر پر ۱۵مه) سهار ۱۰ بجې د پېښور په ورسک روډ سیمه کې وشوه.

نړیوال دې افغانستان یوازې نه پرېږدي:عمران خان

وزیر اعظم عمران خان انځور - ارشیف

د پاکستان وزیراعظم عمران خان پر نړیواله ټولنه له افغانستان سره د رابطو د جاري ساتلو په ضرورت زور راوړی او ویلي یې دي چې په دغه نازک وخت کې د هېواد ولس یوازې پرېښودل نه دي پکار.

د پاکستان سرکاري راډیو د خبر له مخه د سېپټېمبر پر ۱۴مه د روس له ولسمشر ولادمیر پوتین سره په ټېلېفوني خبرو کې عمران خان افغانستان ته په فوري توګه د بشري مرستو پر رسولو او د هغه هېواد له یوه اقتصادي بحرانه د ژغورولو پر ضرورت ټینګار وکړ.

عمران خان په دې لړ کې د پاکستان او روس نېږدې همکاري او مشاورت مهم وبلل. نوموړي وویل چې د افغانستان امن او استحکام د سیمې امنیت او سوکالي لپاره ډېر اهمیت لري.

خو بل پلو ګڼ افغانان د پاکستان دا هڅې په خپلو چارو کې مداخلت بولي چې پاکستان یې ردوي.

د پاکستان او روس مشرانو تر دې مخکې د اګست پر ۲۵مه د افغانستان په اړه ټېلېفوني خبرې کړې وې.

جنوبي وزیرستان کې ځانمرګي برید یو عسکر وژلی څلور ژوبل

په جنوبي وزيرستان کې د پاکستان پوځ پر عسکرو ځانمرګي بريد کې يو عسکر وژل شوی او څلور نور ژوبل دي.

د جنوبي وزيرستان د پوليسو مشر شوکت علي مشال راډيو ته وويل چې د سېپټېمبر پر ۱۳ مه په بدر سيمه کې د عسکرو پر موټر دا بريد شوی.

د نوموړي وينا وه له پېښې وروسته یې د لټون عمليات پيل کړي خو څوک يې ګرفتاره کړي نه دي.

د بريد ذمه واري تحريک طالبان پاکستان منلې ده.

دا په داسې حال کې ده چې د اګست پر ۱۱مه هم په جنوبي وزیرستان کې په ځانمرګي برید کې د یو برېګېډییر په ګډون درې پوځیان ژوبل شوي ول چې د حملې ذمه واري تحریک طالبان پاکستان منلې وه.

بلخوا د شمالي وزیرستان په میرعلي کې د سېپټېمبر پر درېیمه سهار د لرګیو ټال کې له چادونې دوه تنه ژوبل شوي دي.

شمالي وزیرستان او جنوبي وزیرستان په دې وروستیو کې د بدامنۍ پېښې، بمي چادونې او هدفي بریدونه وخت په وخت دوام لري، چې پرضد یې ځايي پښتون ژغورنې غورځنګ او ځايي ځوانانو، مشرانو وخت په وخت لاریونونه او جرګې کړې او له دولته یې د داسې پېښو د مخنیوي غوښتنې کړې دي.

حکومت او پوځ په وار وار ویلي، چې دغلته اوس امن بحال شوی او د لږ او ډېر داسې وقعاتو د مخنیوي هڅې روانې دي.

ښايي افغانستان د خوړو له کمښت سره مخامخ شي: ګوتېرېش

انتونیو ګوتېرېش وايي، تر څو لسیزو جګړو، کړاو او ناامنۍ وروسته ښايي تر ټولو خطرناکو شیبو سره مخامخ شي.

انتونیو ګویتېرېش د سېپټېمبر پر ۱۳مه په جنیوا کې د ملګرو ملتونو په بلنه رابلل شوي کنفرانس ته وويل چې افغانان تر لسیزو جګړو او کړاوونو وروسته تر ټولو سختې شېبې تېروي.

نوموړی وايي، د افغانستان خلک لاسنیوي ته اړتیا لري. تر څو لسیزو جګړو، کړاو او ناامنۍ وروسته ښايي تر ټولو خطرناکو شېبو سره مخامخ شي. نو وخت راغلی چې نړیواله ټولنه د دوی تر څنګ ودرېږي.

که څه هم ملګرو ملتونو د بشرپالنې د مرستو لپاره د څه باندې ۶۰۰ میلیونه ډالرو بسپنې غوښتنه کړې، خو د سېپټېمبر پر ۱۳مه مرستندویو هېوادونو تر یو میلیارد ډالرو د زیاتې بسپنې د ورکړې ژمنه وکړه.

ګویتېرېش خبرداری ورکړ چې د روانې میلادي میاشتې تر پای پورې ښايي په افغانستان کې د خوړو کمښت لا زیات شي.

د ملګرو ملتونو د خوړو نړیوال پروګرام تر دې مخکې ویلي ول چې ۱۴ میلیونه افغانان د سختې لوږې له خطر سره مخامخ دي.

د اګست پر ۱۵مه پر کابل د طالبانو له واکمنېدو پس په افغانستان کې اقتصادي چارې ټکنۍ او د بشري بحران په اړه اندېښنې لا زیاتې شوې.

امریکا د شمالي کوریا توغندیزه ازموینې ګواښ وباله

ارشیف، د شمالي کوریا رهبر کېم جونګ اون د میزایلو د ازموینې د لیدلو پر مهال

د امریکا پوځ د هغو توغندیو ازموینې چې شمالي کوریا په تېرو دوو ورځو کې کړې، د دې هېواد ګاونډیانو او نورو ته ګواښ وباله.

د امریکا د هند پېسیفیک قومندانۍ په یوه بیان کې وویل چې د شمالي کوریا دغه فعالیتونه د دې ښکارندویي کوي چې دا هېواد پوځي پروګرام ته پراختیا ورکوي او په دې توګه خپل ګاونډیان او نړیواله ټولنه ګواښي.

شمالي کوریا ویلي چې په تېرو دوو ورځو کې یې د کروز میزایلو بریالۍ ازموینې کړې او ټاکل شوي د ۱،۵۰۰ کیلومیټره واټن هدفونه‌ یې ویشتلي دي.

پیانګ یانګ دغه نوي توغندي مهمه ستراتېژیکه وسله بولي او وایي چې په دې سره د شمالي کوریا د مشر کیم جونګ اون هغه ارمان پوره شو چې د هېواد د پوځي وړتیا پر لا زیاتېدو یې ټینګار کړی دی.

امریکا له ازبکستانه د افغان پایلټانو ایستل پیل کړ

امریکا د هغو روزلو افغان پایلټانو چې پر کابل د طالبانو له واکمنېدو مخکې له خپلو کورنيو سره یې ازبکستان ته پناه وړې وه، له هغه هېواده د وتلو بهیر پيل کړ.

نیویارک ټایمز ورځپاڼې ویلي چې دغه پایلټان او کورنۍ به‌ یې په لومړي ګام کې په متحده عربي اماراتو کې د امریکا یوې پوځي اډې ته وړل کېږي.

یوه پایلټ د خپل نوم نه‌ ښودلو په شرط روېټرز اژانس ته ویلي چې متحده عربي اماراتو ته‌یې د وړلو بهیر د سېپټمبر پر ۱۲مه نېټه (یکشنبه) پیل شوی دی.

والسټریټ ژورنال ورځپاڼې د تېرې شنبې په ورځ وویل چې له ازبکستانه د ۵۸۵ پایلټانو او د کورنیو د ایستلو لپاره‌ یوه موافقه تېره اوونۍ د امریکا او ازبکستان ترمینځ شوې ده.

دغه پایلټان او کورنۍ یې تېره میاشت چې کله طالبان پر افغانستان واکمن شول، له خپلو پوځي الوتکو سره ازبکستان ته تللي دي.

ايران د اټومي مرکزونو د کېمرو مرمت لپاره نړيوالو څارونکو ته اجازه ورکوي

رافایل ګروسي د سېپټېېمبر پر ۱۱مه تهران ته ورسېد.

ایران سلا شوی چې د خپلو اټومي مرکزونو د څارګرو کېمرو د مرمت لپاره نړیوالو څارونکو ته اجازه ورکړي چې په دې توګه د حساسو مرکزونو ویډیو رېکارډولو عمل دوام ولري.

تهران دا اعلان د سېپټېمبر پر ۱۲مه نېټه تر هغې وروسته کړی چې د اټومي انرژۍ نړیوالې ادارې مشر رافایل ګروسي په تهران کې د ایران د اټومي پروګرام ادارې له مشر محمد اسلامي سره وليدل.

د ليدنې هدف دا وو چې د تهران او غربي نړۍ ترمنځ د ایران د اټومي تړون د بیا بحالولو لپاره د ځنډېدلو خبرو مخې ته خنډونه ختم کړي.

د ایران سختدریځه ولسمشر ابراهیم رییسي سږ کال په اګست میاشت کې واک ترلاسه کړی او تر هغه وروسته هغه هېواد ته د ګروسي دا لومړی سفر دی.

په نړیوالو بندېزونو کې د نرمښت په بدل کې د ایران اټومي پروګرام محدودولو په اړه د تهران او نړیوالو ځواکونو ترمنځ خبرې اترې سږکال د جون له میاشتې راهیسې درېدلې دي.

د سېپټېمبر په پیل کې د اټومي انرژۍ د څار نړیوالې ادارې په خپل یو رپورټ کې ویلي ول چې ایران د زیات غني شویو اورانييمو ذخیره پرله پسې زیاتوي.

په رپورټ کې دا هم ویل شوي چې تهران سږ کال په فېبرورۍ میاشت کې د دې ادارې څارونکو ته د خپلو اټومي مرکزونو د څار نظام ته له لاسرسي انکار کړی وو او له هغه راهیسې یې د تصدیق او څارنې چارې هم په جدي ډول ټکڼۍ کړې دي.

د امریکا د بهرنیو چارو وزیر اینتني بلېنکن د سېپټېمبر پر اتمه خبرداری ورکړی وو چې امریکا د ایران له خوا د خنډ جوړونې له کبله له هغه هېواد سره موافقې ته د رسېدو د هڅو پرېښوولو ته نېږدې شوې ده.

قطر له نړیوالو څخه د افغانانو لپاره د بشري مرستو غوښتنه کړې

د قطر د بهرنیو چارو وزیر وايي، که افغانستان کې حالات خرابېږي نو ګاونډیان به یې هم اغېزمن شي - انځور له ارشیفه

د قطر د بهرنیو چارو وزیر له نړیوالو غوښتي چې د افغانستان له خلکو سره هرڅومره چې ژر کېدای شي، بشري مرستې وکړي.

محمد بن عبدالرحمان الثاني دغه غوښتنه د سېپټمبر پر ۱۱مه له خپل روسي سیال سېرګې لاروف سره په مسکو کې تر لیدو وروسته کړې ده.

نوموړي خبري غونډې ته ویلي چې که په افغانستان کې حالت لا خرابېږي نو هېڅ یو ګاونډی به یې له ناوړه اغېزه خوندي نه وي.

د روسیې د تاس خبري اژانس د خبر له مخې، د هغه هېواد د بهرنیو چارو وزیر سېرګې لاوروف وویل، په افغانستان کې یو ډېر دردوونکی بشري حالت پیدا شوی دی.

د ده په وینا، کېدای شي چې دا له افغانستانه ګاونډیو هېوادونو ته د کډوالو د ورماتېدو سبب شي.

لاوروف زیاته کړې، دا د هغو ټولو هیوادونو مسوولیت دی چې د افغان کډوالو د ستونزې حل لارې ولټوي چې د افغانستان په روان وضعیت کې ښکېل دي.

امنيت راغلی خو ډوډۍ ولاړه: د کابل اوسېدونکي
تم شئ

هېڅ میډیايي سرچینه اوس نشته

0:00 0:02:14 0:00

د قطر او د روسیې د بهرنیو چارو وزیرانو دا څرګندونې پر داسې مهال کړې دي چې طالبانو د اګست پر ۱۵مه کابل ونیوه او شاوخوا درې اوونۍ وروسته یې خپل لنډمهالی حکومت اعلان کړ.

د طالبانو له واکمنېدو راهیسې په افغانستان کې ادارې لا په بشپړه توګه نه دي فعالې شوي او ملګرو ملتونو هم ویلي چې په هغه هېواد کې د بې کارۍ له وجې بې وزلي لا زیاتېدای شي. همدا لامل دی چې ملګرو ملتونو له افغانانو سره د مرستو لپاره د سېپټېمبر پر ۱۳مه په جینیوا کې د غونډې اعلان کړی دی.

د ملګرو ملتونو په وینا، په افغانستان کې د ناامنیو او اوږدمهاله وچکالۍ له وجې د بې وزلۍ کچه خورا لوړه شوې د او میلیونه افغانان د خوړو له کمښت سره مخامخ دي.

پاکستان د کابل هوايي ډګر ته پروازونه بیا پیلوي

د پاکستان نړيوال هوايي شرکت الوتکه. انځور - ارشیف

د پاکستان نړيوال هوايي شرکت (پي ای اې) ویاند وايي چې دوی له راتلونکې اوونۍ د اسلام اباد او کابل ترمنځ د خپلو مسافر وړونکو الوتکو پروازونو بیا بحالولو پلان لري.

د پي ای اې ویاند عبدالله حفیظ خان د سېپټېمبر پر ۱۱مه اې اېف پي خبري اژانس ته وویل چې د دوی هوايي شرکت ته د پروازونو د فعالولو ټولې تکنیکي اجازت نامې ورکړل شوې دي.

نوموړی وویل چې د پې ای اې لومړی چارټرډ پرواز به د سېپټېمبر پر ۱۳مه له اسلام اباده کابل ته ورځي.

خو تر اوسه معلومه نه ده چې پي ای اې به کله له افغانستان سره عادي پروازونه بحال کړي.

د اګست په نیمايي کې پر افغانستان د طالبانو له واکمنۍ راهیسې، له هغه هېواد سره تجارتي الوتنې درېدلې دي.

مخکې د سېپټېمبر پر نهمه د قطر اییر ویز نومي هوايي شرکت په یو ځانګړي پرواز کې شاو خوا ۲۰۰ کسانو د کابل له هوايي ډګره پرواز وکړ.

دا پر دغه میدان د طالبانو کنټرول حاصلولو وروسته له هغه ځایه لومړی مساپر وړونکې پرواز و.

د اګست پر ۱۵مه پر کابل د طالبانو کنټرول تر لاسه کولو وروسته، د پاکستان حکومتي هوايي شرکت پي ای اې، د یوې اوونۍ لپاره له کابله پروازونه جاري ساتلي وو. خو بیا پي ای اې د اګست پر ۲۲مه اعلان وکړ چې د کابل او اسلام اباد ترمنځ پروازونه په موقتي ډول ځنډوي.

پي ای اې د پروازونو د ځنډولو لامل د سهولتونو کمې او د کابل هوايي ډګر په ځینو برخو کې د خځلې ډېرونه و ښودل.

بلوچستان کې دوو چاودنو دوه عسکر وژلي‌ او پينځه تنه یې ژوبل کړي

د بلوچستان چارواکي وايي، د کېچ ضلعې په بلیده سیمه کې یوې بمي چاودنې دوه سرحدي سرتېري وژلي او یو بل یې ژوبل کړی دی. (انځور:ارشیف)

د بلوچستان چارواکي وايي د کېچ ضلعې په بلیده سیمه کې یوې بمي چاودنې دوه سرحدي سرتېري وژلي او یو بل یې ژوبل کړی دی.

په کوټه کې د سرحدي ځواکونو ویاند د سېپټېمبر پر ۱۱مه مشال راډيو ته وویل چي پېښه د سېپټېمبر پر نهمه په بلیده سیمه کې د نا څرګندو وسله والو لخوا د سړک غاړې د پټ کړل شوي بم له امله هغه وخت شوې ده کله چې د سرحدي ځواکونو یوه قافله له هغه ځایه تېرېده.

د چارواکي په خبره چاودنه د ریموټ کنټرول بم په وسیله شوې ده.

د دوی په وینا، وسله وال تر پېښې وروسته په تېښته کې بریالي شوي او د وژل شويو سرتېرو مړي ځايي روغتون ته تر رسولو وروسته کوټې ښار ته انتقال کړل شوي دي.


بلخوا د بلوچستان په قلات سیمه کې پر موټر سایکل سپرو وسله والو د پولیسو پر یو موټر د لاسي بم برید کړی دی.

په هغه پېښه کې د دوه پولیس اهلکارو په ګډون څلور نور کسان ژوبل شوي دي.

دغه پېښه د ۱۰م سېپټېمبر په شپه هغه وخت شوې چې د پولیسو یو موټر په قلات کې د کوټې -کراچۍ پر لوی سړک ګزمه کوله.

د قلات د پولیسو ډي اېس پي غلام حسېن باجوي ویلي چې د پېښې پلټنې یې پیل کړې دي.

د دواړو پېښو ذمه واري لا چا نه ده منلې.

د افغانستان د کرکټ ۱۹ کلنې لوبډلې له بنګله دېشه ماتې وخوړه

د افغانستان د ۱۹ کلنو کرکټ ملي لوبډله. انځور- ارشیف

د افغانستان کرکټ د ۱۹ کلنو لوبډلې د بنګله دېش د ۱۹ کلنو د لوبډلې پر وړاندې خپله لومړۍ ۵۰ اووریزه لوبه بایلوده.

افغانستان د سېپټېمبر پر ۱۰مه لوبه چې د بنګله دېش په پلازمېنه دوحه کې وه، د ۱۶ منډو په توپیر سیالې لوبډلې ته وبایلله.

د افغانستان د کرکټ بورډ ویاند فرید هوتک د سېپټېمبر پر ۱۰مه مشال راډیو ته وویل چې دواړې لوبډلې، څلور نورې ۵۰ اوورېزې او یوه ټېسټ لوبه هم په راتلونکي کې لري.

هوتک زیاته کړه: "د افغانستان د ۱۹ کلنو لوبدلې د بنګله دېش پر وړاندې لومړۍ ۵۰ اوورېزه لوبه ترسره کړه.

له دې وروسته به دا لوبډله د بنګله دېش له ۱۹ کلنو لوبډلې سره څلور نورې ۵۰ اووريزې او یوه څلور ورځنۍ لوبه ترسره کړي."

تمه ده چې د ۱۹ کلنو لوبډله به د سېپټېمبر پر ۲۶مه بېرته هېواد ته ستنه شي.

مومندو کې هوايي ډزو دوه پولیسان وژلي دي

د خيبر پښتونخوا د مومند ضلعې نقشه

د خيبر پښتونخوا د مومندو پولیس چارواکي وايي چې پرون ماښام (د سېپټېمبر پر نهمه) په دوو جلا جلا پېښو کې دوه پولیسان وژل شوي دي.

د کوز مومندو سب ډويژن د پوليسو ډي اېس پي جاويد خان نن (سېپټېمبر ۱۰مه) مشال راډيو ته وویل چې لومړۍ پېښه د مېچنۍ په خودک کور سیمه کې رامنځ ته شوې او دويمه پېښه په شکرغونډۍ بایزو سیمه کې رامنځ ته شوې ده.

پولیس وايي، په دواړو پېښو کې پوليسان په هوايي ډزو لګېدلي، خو دوی د نامعلومه کسانو پرضد مقدمه درج کړي او د پېښې د عاملينو پلټنې کوي.

نور وښیئ

ځانګړې پاڼې

له موږ سره اړیکي

XS
SM
MD
LG