د یمن د پوځ ویاند محمد النقیب ویلي چې د اګست پر ۲۹مه د هېواد تر ټولو لوی هوایي ډګر - ال عناد -- د توغندیو او بې پیلوټه الوتکو برید شوی دی.
د ده په وینا، په دې برید کې لږ تر لږه ۳۰ حکومت پلوه کسان وژل شوي او لږ تر لږه ۶۰ ټپي شوي دي.
نوموړي زیاته کړې چې د مرګ ژوبلې شمیرې زیاتېدای شي. دا پېښه په دې ورستیو کې د یمن په کورنۍ شخړه کې تر ټولو خونړۍ حمله بلل شوې ده.
هلته د ایران ملاتړ لرونکي حوثيان له هغه حکومت سره په جګړه بوخت دي چې د سعودي عرب ملاتړ لري او نړیوالو هم په رسمیت پیژندلی دی.
د یمن چارواکو ویلي چې د حکومت تر واک لاندې هوايي اډه کې لږ تر لږه درې چاودنې شوې دي. د پېښې ذمه واري لا چا نه ده منلې خو محمد النقیب د دې تور پر حوثيانو پورې کړی دی.
ایسوشېټیډ پریس اژانس ویلي چې تراوسه د حوثیانو پوځي ویاند د دې برید پخلی یا تردید نه دی کړی.
د وسله والو لخوا د یمن د پلازمېنې صنعا تر نیولو وروسته له ۲۰۱۴م کاله راهیسې په یمن کې د حکومت او حوثیانو ترمنځ جګړه روانه ده چې له وجې تر یو لاکه ۳۰ زرو زیات کسان وژل شوي او بشري بحران یې هم رامنځته کړی دی.
