د بریتانیا پوځ ويلي چې اووه افغان وګړي د کابل په هوایی ډګر کې په ګډوډۍ کې وژل شوي دي.
اسوشیېټېډ پریس د بریتانیا د پوځ له خوا د اګست پر ۲۲مه د خپور کړي بیان په حواله لیکلي چې د طالبانو هوایي ډزو خلک تېښتې ته اړ کړي او په ګډوډیو کې اووه کسان وژل شوي دي.
پر افغانستان د طالبانو تر ولکې وروسته خلک له دې هېواده د تېښتې په لټه کې دي او د کابل په نړیوال هوايي ډګر یې ډېره ګڼه ګوڼه جوړه کړې ده. د لسګونه نورو د ټپي کېدو راپورونه هم خپاره شوي.
تر دې مخکې د کابل هوايي ډګر ته د خلکو د ور ټولېدو په لومړیو ورځو کې د پنځو نورو ولسي وګړو د وژل کېدو راپورونه هم ورکړل شوي ول.
طالبانو بیا د ګډوډیو پړه په ډګر کې د چارو پر تنظیموونکو اچولې ده چې د دوی په خبره د خلکو په کنټرول کې پاتې راغلي.