د پېګاسس نومې یوې اسراییلي کمپنۍ د جاسوسۍ سافټوېیر یا سپایوېیر په اړه له تحقیقاتو څرګنده شوې چې د پاکستان د وزیراعظم عمران خان په ګډون د ۱۴ نورو ملکونو اوسنيو او پخوانيو مشرانو نومونه د ممکنه اهدافو په لېسټ کې شامل دي.
د بښنې نړیواله ادارې (ایمنسټي انټرنېشنل) او د ۱۷ نړیوالو رسنيو اتحاديې چې د معاملې څېړنې کوي، ویلي چې داسې معلومېږي د پاکستان وزیراعظم عمران خان، د فرانسې ولسمشر ایمانوېل مکرون او د قزاقستان ولسمشر قاسم جومارت توقایېف د نړۍ په هغو ۱۴ پخوانیو او اوسنیو مشرانو کې شامل دي چې د اسرایيلو د اېن اېس او شرکت ګروپ د جاسوسۍ سافټوېیر یا سپایوېیر کاروونکو یې په اړه معلومات غلا کړي دي.
د بښنې نړيوال سازمان مشرې ایګنس کیلامارډ د جولای پر ۲۰مه پر ټوېټر لیکلي، "هغوی له اوږدې مودې راهيسې پر دې خبر ول چې د فعالانو او خبريالانو ټېلېفونونه [د انټرنېټ له لارې] غلا کېږي خو اوس معلومه شوه چې لوړپوړي چارواکي هم د اېن اېس او سافټوېیر له پراخ فعالیت څخه نه شي بچ کېدای."
د نړۍ مشرانو ټېلېفوني شمېرې د هغو ۵۰ زره کسانو په فهرست کې موندل شوي چې ګومان کېږي له ۲۰۱۶ز کال راهيسې د اېن اېس او د کاروونکو د دلچسپۍ وړ ول.
