د روسي پوځ د مرکزي زون قومندان جنرال الکساندر لاپین وايي روس، تاجکستان او ازبکستان به د افغانستان د پولې په اوږدو کې پوځي تمرینونه ترسره کړي.
هغه د جولای په ۱۹مه رسنیو ته ویلي چې دا ګډ پوځي مشقونه به د تاجکستان د حرب میدان په پوځي اډه کې د اګست له پنځمې تر لسمې پورې ترسره شي. جنرال لاپین ویلي د تمرینونو پر مهال به پوځیان په هغو هڅو متمرکز وي چې د متحدینو په خاوره د ناقانونه وسله والو د مداخلې د مخنیوي لپاره اړین دي.
د روسي پوځ د مرکزي زون د مطبوعاتو څانګې ویلي چې غرنیز زغروال ګاډي، ټانکونه او توپخانه يي ډلې او خاص ځواکونه به په دې تمرینونو کې برخه واخلي.
اخوا ترکمنستان هم د افغانستان پولي ته د درنو وسلو، هیلي کوپټرو او الوتکو د ورلېږلو چاره جاري ساتلې ده. د تازه راپورونو له مخې له سرحدي سیمې مري نه حکومتي کارکوونکو په تېره بیا قومندانانو، څارنوالوانو، پولیسو او نورو چارواکو خپلې کورنۍ د هېواد مرکزي سیمو ته استولي چې لا یې د خلکو اندېښنې زیاتې کړي.
د افغانستان په شمال کې د طالبانو له خوا د ځينو سيمو تر نيولو وروسته د منځنۍ اسیا هېوادونه له امنیتي حالته اندېښمن دي او ټینګار یې کړی چې د هر ډول ګواښ د ځواب لپاره به لازم تیاری نیسي.
