د پاکستان وزيراعظم عمران خان د مې پر اوومه (نن) د سعودي عرب په درې ورځني سفر رياض ته روانيږي.
نوموړي ته د دې سفر بلنه سعودي وليعهد محمد بن سلمان ورکړې ده.
د پاکستان سرکاري راډيو خبر ورکوي چې عمران خان به له سعودي مشرانو سره پر اقتصاد، تجارت، پانګونې، توانايي او د پاکستانيو کارګرانو لپاره د روزګار پر مواقعو خبرې کوي.
پر دې سربېره به دواړې خواوې پر سيمه ييزو او نړيوالو چارو هم بحث کوي.
د پاکستان د پوځ مشر جنرل قمر جاوېد باجوه هم د مې له پينځمې په سعودي کې دی.
د پاکستاني پوځ د عامه اړيکو دفتر ويلي چې د جنرل باجوه او د سعودي ځواکونو د مشر جنرل فياض الرووېلي تر منځ ليدنه کې پر دوه اړخيزه دفاعي چارو او سيمه ييز امنيت سربېره د افغان سولې پروسې په اړه هم خبرې شوې دي.
