د ننګرهار مطبوعاتي دفتر مشال راډیو ته په استول شویو معلوماتو کې ویلي چې د اپرېل پر ۲۹مه شاوخوا نهه بجې د برېښنا ریاست په یوه اړوند موټر چاودنه وشوه چې د موټر چلوونکي په ګډون د دغه ریاست درې کارمندان او د یوې ښځې په ګډون دوه عام وګړي ټپیان شول.
د معلوماتو له مخې، پېښه د چسپکي ماین د چاودنې له امله وه چې د جلال اباد ښار د څلورمې ناحیې په چهل متره سیمه کې شوې ده.
په معلوماتو کې د ټپیانو روغتیایي وضعیت د ډاډ وړ ښودل شوی دی.
د دې پېښې مسولیت چا نه دی منلی.