د امريکا بهرنيو چارو وزير انتوني بلېنکن د ملګرو ملتونو پر امنيت شورا غږ وکړ چې له جنګ ځپلي شام سره له کېدونکو بشري مرستو سياسي مسله جوړول بند کړي.
هغه د مارچ په ۲۹مه ويليچې ملګري ملتونه دې د هغو ۱۳.۴ ميلیونه خلکو ته د خوراک او نورو مرستو رسولو لپاره پر پوله لا نورې دروازې خلاصې کړي چې امداد ته اړتيا لري.
بلېکن روس او د هغوی نیزدی ملګري، شامي ولسمشر بشارالاسد ته په اشارې وويل چې بايد شورا په اسپتالونو او پر پوله د قانوني دروازو سره نيږدې"د بريدونو کولو يا په دې کې د برخه اخېستو لپاره د بهانو مخه ونيسي." د ده په خبره ځکه چې له دې وجې د مرستو رسولو لارې بندې شوي دي.
امريکا په دې مياشت کې د امنیت شورا نوبتی مشري په غاړه لري او بلېنکن د انټرنېټ له لارې د غونډې مشري کوي. هغه د شام سره د ترکي پر پوله باب الاسلام او په عراقي سرحد ٱلْيَعْرُبِيَّة د بندو دروازو د بيا خلاصولو غږ وکړ. نوموړي د دې دروازو د اهميت په اړه وويل چې له باب الاسلام څلور ميليونه او ٱلْيَعْرُبِيَّة يو اعشاريه درې ميليونه شامي وګړو ته مرستې رسول کېږي.
