په پاکستان کې چارواکي وايي د دیسمبر په ۱۳مه په پينډۍ کې چاودنې ۲۵ کسان زخميان کړي دي. چاودنه په ګنج منډۍ کې شوې ده.
د ژغورنې ادارې، ریسکيو ۱۱۲۲ يو چارواکي محمد بلال د دیسمبر په ۱۳مه مشال راډيو ته وويل چې په پېښه کې څوک مړه شوي نه دي او ۲۵ واړه زخميانو درملنه روانه ده.
د پاکستان ډان ورځپاڼې ليکلي چې د سرچينو ترمخه دا د لاسي بم حمله وه خو چارواکي وايي په دې اړه تحقیقات بشپړ شوي نه دي. د راولپينډۍ پوليسو پر ټويټر ليکلي د ترهګرۍ امکان نه شي ردولی خو لا هم معلومه نه ده چې د چاودنې نوعيت څه دی. تر اوسه کومې وسله والې ډلې په دې اړه څه نه دې ويلي.
