د افغانستان بهرنیو چارو وزارت وايي د مالیزیا د اسلامي یووالي نړیوالې مجمع په افغانستان کې روانه جګړه ناروا وبلله.
دغه وزارت د نونبر پر لومړۍ نېته (پرون) ناوخته په یوه اعلامیه کې ویلي، د مالیزیا دغه مجمع چې یوه معتبره اسلامي ټولنه ده په افغانستان کې یې جګړه غندلې او ناشرعي یې بللې ده.
وزارت وايي دې مجمعې پر دې موضوع په کوالالامپور کې د افغانستان سفارت ته په یوه لېږلي پیغام کې دا خبره کړې ده.
د مالیزیا دې مجمعې د خبرو له لارې د افغانستان د روانې کشالې د حل غوښتنه کړې ده.
تېره اوونۍ د کابل د لویې جرګې په تالار کې شااوخوا ۲،۵۰۰ راټولو شویو دیني عالمانو هم په هېواد کې روانه جګړه ناروا بللې وه او له حکومت او طالبانو یې د هغې د ختمولو غوښتنه کړې وه.
تر دې وړاندې د بنګله دېش دیني عالمانو او د سعودي عرب عالمانو هم د افغانستان روانه جګړه حرامه او له شرعي نصوصو سره په ټکر کې بللې ده.
