د لاسرسي ځای

تازه خبر

خبرونه

پکتیا کې د یوه قومي مشر په ګډون درې تنه وژلي

د پکتیا مرکز ګردیز ښار یوه څنډه

د افغانستان په پکتیا ولایت کې د حکومت وسله والو مخالفانو د یوه قومي مشر په ګډون درې تنه وژلي دي.

د دغه ولایت د امنیې قومندانۍ سرپرست، لطف اله کامران مشال راډیو ته وویل چې دغه پېښه تېره شپه هغه وخت وشوه، چې وسله والو د ميرزکې ولسوالۍ په یوه کلي کې، د عامو خلکو پر کورونو بریدونه وکړل.

هغه زیاته کړه؛ "د میرزکې ولسوالۍ په خلیلانو کلي کې پر کورونو تهاجمي حملې کړي، چې په نتیجه کې یې متاسفانه درې نفره ولسي وګړي چې یو یې قومي مشر و، شهیدان شوي دي."

د دې پېښې چې لا یې چا مسولیت نه دی منلی، د انګېزې په اړه څه نه دي ویل شوي.

د پکتیا سرپرست امنیه قوماندان وايي وسله وال طالبان هغه قومي مشران په نښه کوي، چې د سولې او نظام د ملاتړ تر څنګ په سیمه کې پر خلکو نفوذ لري.

د نننۍ ورځې ټول خبرونه وګورئ

د هند تر انتظام لاندې کشمیر کې ولسي ټاکنې

د هند تر واک لاندې کشمیر کې سرتېري پر سړکونو ولاړ دي ـ د ارشیف انځور.

د هند تر انتظام لاندې کشمیر کې د نومبر پر ۲۸مه د سختې امنیتې څارنې لاندې ولسي انتخابات کېږي.

دا د هند د وزیراعظم نریندرا مودي د هندو ملتپاله حکومت لخوا د سیمې د نیمه خود مختاره ځانګړي اییني حیثیت بدلولو وروسته هلته لومړي انتخابات دي.

د هند حکومت د دغه ګام په غبرګون کې د پیدا شوې ناکرارۍ خلاف سخت عملیات وکړل چې هلته یې ګرځبندیز و لګولو او رابطې یې پرې کړې.

د ووټونو پر مهال د امنیت لپاره په دغه سیمه کې په زرګونو اضافي سرتېري ګمارل شوي دي. هلته وار له مخه د امنیت د ساتلو په موخه په ګڼ شمېر کې پوځیان موجود دي.

بیلتون پالو په ورستیو کې له انتخاباتو نه د بایکاټ اعلان کړی و او دا یې غیرقانوني بللي وو.

دوی پر کشمیر د هند خودمختاري چیلنجوي. الیکشن کمېشنر کی کی شرما پر ځايي ولس د رایو اچولو غږ کړی او ویلي یې دي چې د جمهوریت په یوه لویه پروسه کې دې برخه واخلي.

د ضلعي ترقیاتي کونسلو د ۲۸۰ څوکیو لپاره په اتو پړاوونو مشتمل انتخابات به د ډېسېمبر پر ۱۹مه پای ته رسېږي.

پاکستان کې کورونا ۴۵ نور کسان وژلي

ډاکټران وايي، د کورونا وبا دويمه څپه راغلې او د اکتوبر مياشتې له نيمايي راهیسې ورځ تر بله په دې وايرس د اخته کسانو شمېر مخ پر زیاتېدو دی.

د کورونا دوهمې څپې په پاکستان کې هم زیات شمېر ناروغه کړي او هره ورځ لسګونه کسان یې له وجې ژوند بایلي او زرګونه نور پر دې ناروغۍ اخته کېږي.

د پاکستان د روغتيا څانګې وېبپاڼې تر مخه کورونا وايرس د نومبر د ۲۶مې او ۲۷مې ترمنځ په ۲۴ ساعتونو کې تر درو زرو زيات کسان وهلي چې دا ډول په دې هېواد کې په کورونا وايرس د اخته کسانو ټول شمېر تر درې لکه ۹۲ زره اوښتی دی.

د نومبر تر ۲۸مې له دې وايرسه په پاکستان کې ۷،۹۴۲ کسان مړه شوي خو تر درې لکه ۵۵ زره زيات کسان بیرته ورڅخه رغېدلي هم دي.

په پاکستان کې چارواکي او ډاکټران وايي، د اکتوبر مياشتې له نيمايي راهیسې ورځ تر بله په دې وايرس د اخته کسانو شمېر مخ پر زیاتېدو دی.

په دې دوران کې د پېښور او اسلام اباد په ګډون د پاکستان په يوشمېر نورو ښارونو کې سلګونه ډاکټران او روغتياپالان هم پر کورونا وايرس اخته شوي دي.

حکومت د کورونا وايرس د مخنيوي په خاطر په ځېنو سيمو کې سمارټ لاکډوان يا نرم ټولبند هم لګولی دی.

بلخوا د پاکستان وزيراعظم عمران د نومبر پر ۲۵مه په لاهور کې د يوې وينا پر مهال ويلي چې ولس دې له احتياطي تدابيرو کار واخلي خو د ده په وينا دا ځل به کاروبارونه، کارخانې او له روزګار سره تړلي شيان نه بندېږي.

عراق: د حکومت پر مخالفینو ډزې، درې وژل شوي، ګڼ ژوبل دي

عیني شاهدانو وايي،د الصدر پلویانو د احتجاج کوونکو پر خېمه ډزې کړي او له پېټرولو جوړ بمونه یې پر غورځولي دي. – د ارشیف انځور.

په عراق کې د شیعه عالم مقتدا الصدر پلویانو د حکومت د مخالفینو پر یوه کیمپ په برید کې لږ تر لږه درې تنه وژلي او په لسګونه نور یې ټپي کړي دي.

د صحت څانګې سرچینو ویلي چې دا پېښه د نومبر پر ۲۷مه د عراق په جنوبي ښار ناصریه کې رامنځ ته شوې ده.

عیني شاهدانو ویلي چې د مقتدا الصدر پلویانو د احتجاج کوونکو پر خېمه ډزې کړي او له پېټرولو جوړ بمونه یې پر غورځولي دي او هغوی هم راپارېدلي او جګړه یې ورسره جګړه کړې ده.

د صحت څانګې سرچینو دا هم ویلي چې وژل شوي کسان په مرمیو ویشتل شوي وو.

ایران وايي د محسن فخريزاده په وژلو کې اسراییل لاس لري

د ایران اټومي ساینسپوه محسن فخريزاده

د ایران د تر ټولو مهم اټومي ساینسپوه محسن فخريزاده وژنې، له امریکا او د هغه له نېږدې اتحادي اسرایل سره، د ایران د اړیکو د خرابېدو خطر رامنځ ته کړی دی.

محسن فخريزاده د نومبر پر ۲۷مه د ایران پلازمېنې تهران ته نېږدې په یو غلچکي برید کې وژل شوی دی.

د ایران دفاع وزیر امیر حاتمي پر محسن فخري زاده د برید په تړاو دولتي ټلوېزیون ایریب ته د نومبر د ۲۷مې په ماښام وویل: "کوم راپورونه چې د پېښې له سیمې لرو دا ښکاروي چې لومړی د هغه په موټر ډزې شوي او لس پنځلس ثانیې وروسته یو نیسان موټر چې په کې چاودیدونکي مواد ځای پر ځای شوي وو چاودنه کوي. فخري زاده په دې پېښه کې ټپي کېږي چې د همدغو ټپونو په خاطر یي وروسته ساه ورکړه."

ایران د هغه تر وژل کېدو وروسته سمدستي تور پورې کړ چې دا د اسراییلو کار دی او د هغوی په وینا د پېښې تر شا امریکا هم نېغ په نېغه یا په غیر مستقیم ډول رول لرلو.

د ایران د بهرنیو چارو وزیر محمد جواد ظریف پر ټوېټر لیکلي چې د ده په خبرو "ترهګرو د ایران یو مخکښ ساینس پوه وواژه. اروپايي ټولنه دې د ترهګرۍ دا عمل وغندي."


اسرایل او امریکا دواړو په دې اړه له څه تبصرې ډډه کړې ده.

د ایران لوی روحاني مشر ایت الله علي خامنايي پوځي سلاکار هوډ ښودلی چې د محسن فخريزاده وژنونکو ته به د تندر په څېر ګزار ورکوي.

لویدیځو استخباراتي شبکو محسن فخري زاده د ایران د اټمي پروګرامونو متفکر مغز باله او دا باور لري چې هغه د اټمي پروګرام په نوم اټمي وسلې جوړولې.

سپینې ماڼۍ پرېښودو ته تیاریم که الیکټورل کالج د بایډن بریا تصدیق وکړي: ټرمپ

په امریکا کې الېکټورل کالج چې د انتخاباتو د ګټونکي اعلان کوي، د ډېسېمبر پر ۱۴مه، د جوبایډن د بریا اعلان لپاره غونډه لري.

د امریکا ولسمشر ډونالډ ټرمپ ژمنه کړې چې د انتخاباتو د نتایجو په اړه به خپلې مبارزې ته دوام ورکوي خو وايي، که د ملک الیکټورل کالج د منتخب ولسمشر جوبایډن د ګټلو تصدیق وکړي نو هغه تیار دی چې سپینه ماڼۍ پرېږدي.

تر دې وړاندې په کانګرس کې د رېپبلېکن ګوند لوړ رتبه غړو او د سپینې ماڼۍ مسوولینو ویلي وو، که الیکټورل کالج د نتایجو تصدیق وکړ نو ټرمپ به د جنورۍ پر ۲۰مه سپینه ماڼۍ پرېږدي، خو دا لومړی ځل دی چې ټرمپ پخپله دا خبره کوي.

په امریکا کې الېکټورل کالج چې د انتخاباتو د ګټونکي اعلان کوي، د ډېسېمبر پر ۱۴مه، د جوبایډن د بریا اعلان لپاره غونډه لري.

د امریکا په اوسنیو ولسمشریزو ټولټاکنو کې ډونالډ ټرمپ ۲۳۲ او جوبایډن ۳۰۶ انتخاباتې حلقې یا الیکټورل کالج ګټلې دي.

ټرمپ که څه هم تر اوسه په انتخاباتو کې خپله ماتې نه ده منلې خو د هغه انتظامیې د نومبر پر ۲۳مه، په رسمي ډول د واک لېږدولو منظوري ورکړه چې تر مخې به یې بایډن ته لاره هواره شي چې استخباراتي اورېدنې وکړي، فنډونو او دفترونو او فیدرالي چارواکو سره لیدوته لاس رسی پیدا کړي.

پېښور کې د انټرنېټ بحالۍ لپاره د قبایلي زده کوونکي مظاهرې

د سږني کال (۲۰۲۰) په اپرېل میاشت کې هم د جاني خېل قبایلي سیمې زده کوونکو د انټرنیټ لپاره په اسلام اباد کې لاریون کړی وو

د قبایلي سیمو زده کوونکیو د نومبر پر۲۷مه په پېښور کې د انټرنېټ د بحالۍ لپاره مظاهره وکړه.

د ځوانانو ټولنې یوه مشر مصباح الدین مشال راډیو ته وویل، حکومت د کورونا وایرس د ټولبند له وجې په پوهنتونونو کې پرلیکه/ انلاین زده کړې پیل کړي خو دا چې په قبایلي ضلعو کې د تري جي او څلور جي ( چټک انټرنیټ) سهولت نه شته نو څه نا څه ۳۰ زره قبایلي زده کوونکي ترې بې برخې پاتې کېږي.

د خیبر پښتونخوا د تعلیم وزیر شهرام خان ترکي د نومبر پر ۲۶مه په یو بیان کې ویلي، د قبایلي سیمو زده کوونکو ته به ډېر ژر د انټرنیټ سهولت ورکړل شي.

د پاکستان تعليم وزير شفقت محمود د نومبر پر ۲۳مه اعلان وکړ چې د نومبر له ۲۶مې د ډېسېمبر تر ۲۴مې به ټولې تعليمي ادارې تړل کېږي او د انټرنېټ له لارې به د زدکړو پروسه پرمخ وړل کېږي.

حکومت تر دې وړاندې په مارچ میاشت کې هم په هم دې موخه تعلیمي ادارې تړلې وې چې د څو میاشتو له ځنډ وروسته په سېپټمبر کې بیا پرانېستل شوې.

امریکا: تېر شواروز له کورونا ناروغۍ ۲،۴۰۰ تنه مړه شوي

په امریکا کې د مړو شمېره ۲۶۲،۰۸۰ ته رسېدلې ده، دا په نړۍ کې په یو هېواد کې د کورونا ناروغۍ څخه د مړو تر ټولو زیاته شمېره ده.

په امریکا کې په تېرو ۲۴ ساعتونو کې د کورونا وایرس له وجې تر ۲،۴۰۰ زیات کسان مړه شوي دي.

دا په تېرو شپږو میاشتو کې د دغه وایرس له کبله په یوه ورځ کې تر ټولو زیاته د مړو شمېره ده.

د نومبر پر ۲۶مه په امریکا کې د شکرانې ورځ هم ولمانځل شوه، په دغه ورځ امریکایان له خپلو کورنیو او ملګرو سره یو ځای کېږي او په ګډه ډوډۍ خوري.

د نومبر پر ۲۵مه په امریکا کې د کورونا وایرس له وجې ۲،۴۳۹ کسان مړه شوي چې له دغې سره د مړو شمېره ۲۶۲،۰۸۰ ته رسېدلې ده، دا په نړۍ کې په یو هېواد کې د کورونا ناروغۍ څخه د مړو تر ټولو زیاته شمېره ده.

د جان هاپکنز پوهنتون د شمېرو له مخې په امریکا کې د کورونا وایرس دوه لکه ۹۰ کېسونه رجسټر شوي دي.

بلخوا په ټوله نړۍ کې د نومبر پر ۲۷ مه د کورونا وایرس د ناروغانو شمېره له ۶۰ میلیونو نه اوښتې ده، او په تېرو نهو میاشتو کې د دغه وایرس له وجې په ټوله نړۍ کې ۱.۴ میلیونه کسان مړه شوي دي.

د کورونا وایرس لومړۍ پېښې د ۲۰۱۹ز کال په ډېسېمبر کې د چین په ووهان کې اعلان شوې چې د څو میاشتو په موده کې ناروغي د نړۍ تر شاوخوا هرې سیمې ورسېده.

په مارچ کې د روغتیا نړیوال سازمان د وایرس خپرېدو ته په کتو جهاني وبايي حالت اعلان کړ.

پاکستان: تېر شواروز له کورونا ناروغۍ ۵۴ تنه مړه شوي

ډاکټران وايي، د کورونا وبا دويمه څپه راغلې او د اکتوبر مياشتې له نيمايي راهیسې ورځ تر بله په دې وايرس د اخته کسانو شمېر مخ پر زیاتېدو دی.

د پاکستان د روغتيا څانګې وېبپاڼې تر مخه دا وايرس په تېرو ۲۴ ساعتونو کې تر ۳،۱۱۳ زيات کسان وهلي چې دا ډول په دې هېواد کې په کورونا وايرس د اخته کسانو ټول شمېر تر درې لکه ۸۹ زره اوښتی دی.

د نومبر تر ۲۶مې له دې وايرسه په پاکستان کې ۷،۸۹۷ کسان مړه شوي خو تر درې لکه ۳۵ زره زيات کسان بیرته ورڅخه رغېدلي هم دي.

په پاکستان کې چارواکي او ډاکټران وايي چې په دې هېواد کې د کورونا وبا دويمه څپه راغلې او د اکتوبر مياشتې له نيمايي راهیسې ورځ تر بله په دې وايرس د اخته کسانو شمېر مخ پر زیاتېدو دی.

په دې دوران کې د پېښور او اسلام اباد په ګډون د پاکستان په يوشمېر نورو ښارونو کې سلګونه ډاکټران او روغتياپان کورونا وايرس وهلي دي.

حکومت د کورونا وايرس د مخنيوي په خاطر په ځېنو سيمو کې سمارټ لاکډوان يا نرم ټولبند هم لګولی دی.

بلخوا د پاکستان وزيراعظم عمران د نومبر پر ۲۵مه په لاهور کې د يوې وينا پر مهال ويلي چې ولس دې له احتياطي تدابيرو کار واخلي خو د ده په وينا دا ځل به کاروبارونه، کارخانې او له روزګار سره تړلي شيان نه بندېږي.

په ملتان کې به هرومرو جلسه کوو:پيپلز ګوند

بلاول بټو زرداري وايي، د نومبر پر ۳۰مه په ملتان کې به په هر صورت کې د پاکستان جمهوري تحريک جلسه کوي - د ارشیف انځور.

پاکستان پيپلز ګوند ويلي چې دوی به د نومبر پر ۳۰مه په ملتان کې په هر صورت د پاکستان جمهوري تحريک جلسه کوي.

د ګوند د مشر بلاول بټو زرداري وياند سېڼېټر مصطفا نواز کوکر دا خبره د نومبر ۲۶مه له هغه وروسته رسنيو ته کړې چې د پاکستان د اطلاعاتو وزير شبلي فراز د نومبر پر ۲۵مه په اسلام اباد کې يوې خبري غونډې ته وويل چې د کورونا وايرس خپرېدو ته په کتو به اوس د اپوزيشن ګوندونو د جلسو د مخنيوي لپاره بنديزونه سختوي او د جلسو د منتظمينو او سياسي مشرانو پر ضد به مقدمې دايروي.

د نومبر ۲۵مه په ملتان کې پوليسو د پاکستان د پخواني وزيراعظم يوسف رضا ګيلاني زوی او د پيپلز ګوند غړی عبدالقادر ګيلاني له هغه وروسته نيولی چې نوموړي هلته د پيپلز ګوند په يو لاريون کې ګډون کړی و.

بلاول بټو زرداري د هغه زر تر زره خوشې کولو غوښتنه کړې او د ګيلاني ګرفتاري يې غېرقانوني کړنه بللې ده.

د چین ولسمشر جوبایډن ته په ولسمشريزو ټاکنو کې د بریالیتوب مبارکي ورکړه

بايډن ته د شي د مبارکۍ پيغام له هغه وروسته ورغلی چې ټرمپ د نومبر پر ۲۳مه منتخب ولسمشر جوبايډن ته د واک د رسمي لېږد پروسه پيل کړه.

د چین ولسمشر شي جین پینګ د امریکا منتخب ولسمشر جوبایډن ته د نومبر د درېمې نېټې په ولسمشريزو انتخاباتو کې د بریالیتوب مبارکي ورکړې ده.

د چين سرکاري رسنۍد نومبر پر ۲۵مه راپور ورکړ چې شي جين پينګ بايډن ته په خپل پيغام کې د دې هيلې څرګندونه وکړه چې د چين او امريکا اړيکې به د دواړو ملتونو له ګټو سره په مطابقت او د نړيوالې ټولنې د عامه هيلو سره سم لا زيات پرمختګ وکړي.

په راپورونو کې دا هم ويل شوي چې د چين مرستيال ولسمشر وانګ اويشان کمالا هېريس ته د امريکا د مرستيالې ولسمشرې پر منتخب کېدو مبارکي ويلې ده.

د چين بهرنيو چارو وزارت وار له مخه لا بايډن ته مبارکي ويلې وه خو شي په داسې حال کې خاموشي غوره کړې وه چې ولسمشر ډونلډ ټرمپ اوس هم د امريکا په يوشمېر عدالتونو کې د ولسمشريزو انتخاباتو نتيجې چېلنج کړي او خپله ماتې نه مني.

بايډن ته د شي د مبارکۍ پيغام له هغه وروسته ورغلی چې ټرمپ د نومبر پر ۲۳مه منتخب ولسمشر جوبايډن ته د واک د رسمي لېږد پروسه پيل کړه خو پر دې سربېره هغه اوس هم په ولسمشريزو انتخاباتو کې خپله ماتې نه ده منلې.

د فوټبال نامتو ستوری دیيېګو مرادونا ومړ

دییېګو مرادونا د نړۍ له تر ټولو ښه لوبغاړو یو بلل کېږي - د ارشیف انځور.

د فوټبال د نړۍ يو تر ټولو نامتو لوبغاړی ديیېګو مرادونا د نومبر پر ۲۵مه ومړ.

د هغه د وکيل په وينا د ارجنټینا فوټبال لوبډلې دغه مخکينی لوبډلمشر د ۶۰ کلنو په عمر په پلازمېنه بيونس ايرس کې په خپل کور کې د زړه له درېدو ومړ.

مرادونا په دا وروستيو کې ناروغه وو او څو اونۍ وړاندې يې په دماغ کې د وينې بهېدو د مخنيوي لپاره عمليات هم کړي ول.

نوموړي د بېساري لوبې په کولو سره د "زرین هلک" نوم هم ګټلی وو.

مرادونا هغه مهال د ارجنټاين د ملي لوبډلې کپتان و چې دغه هېواد په ۱۹۸۶ز کال کې يې د فوټبال نړیوال جام وګاټه.

نوموړي په ۱۹۹۷ز کال کې د ۳۷ کلونو په عمر له نړیوال فوټباله استعفا ورکړې وه.

په نشو له روږدېدو، زیاتو خوړو او شراب ځښلو له مرادونا د لوبې کولو توان ورڅخه واخیست او یو ځل په ۲۰۰۰ز کال کی نېږدی وو چې د کوکینو له خوړولو ومري.

د ارجنټينا ولسمشر د مرادونا د مړينې له کبله په ټول هېواد کې درې ورځنی وير اعلان کړی دی.

د هغه مړی یې د وروستي دیدار لپاره د ولسمشر ماڼۍ ته وړی دی.

ولس دې د کورونا وايرس ضد مبارزه دوچنده کړي: بايډن

د امريکا منتخب ولسمشر جوبايډن

د امريکا منتخب ولسمشر جوبايډن پر امريکايانو غږ کړی چې له کورونا وايرس سره د مبارزې لپاره دې خپلې هڅې دوچنده کړي.

نوموړي د نومبر پر ۲۵مه په دې هېواد کې د مننې ورځې په شپه په خپله وينا کې پر کورنيو هم ټينګار وکړ د رخصتۍ په دې ورځ دې د پخوا پرتله له غونډېدو ډډه وکړي.

بايډن دا ومنل چې هېواد يې د کورونا پرضد جګړې څخه ستومانه شوی خو د ده په وينا امريکايانو ته دا يادول پکار دي چې دوی د وايرس پرضد جګړه کوي خو د يو بل پر ضد نه.

په امريکا کې هر کال د نومبر پر څلورمه پنجشنبه د مننې ورځ لمانځل کېږي چې د رخصتۍ په دې ورځ د کورنۍ ټول غړي سره راغونډېږي او ځانګړي خواړه خوري.

د عامې روغتيا پوهانو هم خبرداری ورکړی چې دا ډول غونډې د کورونا وايرس د لا خپرېدو سبب ګرځېدای شي.

په امريکا کې په دا وروستيو کې د کورونا وايرس خپرېدل زيات شوي او يوازې د نومبر پر ۲۵مه په دې هېواد کې تر ۱۷۲،۰۰۰ زيات کسان په دې وايرس اخته شوي.

په امريکا کې تر دې دمه تر يو کروړ ۲۷ لکه زيات کسان کورونا وهلي چې ۲۶۲،۱۷۷ ورڅخه مړه شوي خو شاوخوا ۷۸ لکه بېرته ورڅخه رغېدلي هم دي.

پاکستان: تېر شواروز له کورونا ناروغۍ ۵۹ تنه مړه شوي

ډاکټران وايي، په دې هېواد کې د کورونا وبا دويمه څپه راغلې او د اکتوبر مياشتې له نيمايي راهیسې ورځ تر بله په دې وايرس د اخته کسانو شمېر مخ پر زیاتېدو دی.

د پاکستان د روغتيا څانګې وېبپاڼې تر مخه دا وايرس په تيرو ۲۴ ساعتونو کې تر ۳،۰۰۰ زيات کسان وهلي چې دا ډول په دې هېواد کې په کورونا وايرس د اخته کسانو ټول شمېر تر درې لکه ۸۲ زره اوښتی دی.

د نومبر تر ۲۶مې له دې وايرسه په پاکستان کې ۷،۸۰۳ کسان مړه شوي خو تر درې لکه ۳۲ زره زيات کسان بېرته ورڅخه رغېدلي هم دي.

په پاکستان کې چارواکي او ډاکټران وايي چې په دې هېواد کې د کورونا وبا دويمه څپه راغلې او د اکتوبر مياشتې له نيمايي راهیسې ورځ تر بله په دې وايرس د اخته کسانو شمېر مخ پر زیاتېدو دی.

په دې دوران کې د پېښور او اسلام اباد په ګډون د پاکستان په يوشمېر نورو ښارونو کې سلګونه ډاکټران او روغتياپان کورونا وايرس وهلي دي. حکومت د کورونا وايرس د مخنيوي په خاطر په ځېنو سيمو کې سمارټ لاکډوان يا ټولبند هم لګولی دی.

بلخوا د پاکستان وزيراعظم عمران د نومبر پر ۲۵مه په لاهور کې د يوې وينا پر مهال ويلي چې ولس دې له احتياطي تدابيرو کار واخلي خو د ده په وينا دا ځل به کاروبارونه، کارخانې او له روزګار سره تړلې شيان نه بندېږي.

قریشي د اسلامي هېوادونو سازمان غونډې ګډون لپاره نیجر ته رسېدلی

د پاکستان حکومت وايي، قریشي به په غونډه کې د کشمیر پر موضوع غږېږي - د ارشیف انځور.

د پاکستان د بهرنیو چارو وزیر شاه محمود قریشي د اسلامي هېوادونو د سازمان په غونډه کې د ګډون لپاره نیجر ته رسېدلی دی.

د سازمان د بهرنیو چارو د وزیرانو ۴۷ مه غونډه د نومبر پر ۲۷مه پیلېږي.

په دې غونډه کې د سازمان د ۵۷ غړو هېوادونو استازي برخه اخلي.

د بهرنیو چارو وزارت د نومبر پر ۲۶مه په بیان کې ویلي چې قریشي به په کنفرانس کې د هند او پاکستان تر منځ د کشمیر پر لانجه خبرې کوي او د غونډې پر مهال به د اسلامي هېوادونو له یو شمېر وزیرانو او مشرانو سره ملاقانونه هم کوي.

تر دې مخکې، پاکستان څو ځلې د کنفرانس د غونډې جوړولو لپاره سعودي عرب ته خواست کړی وو خو بریالی شوی نه وو.

سږکال افغانستان کې له ښځو سره تاوتریخوالی ۲۰٪ زیات شوی

افغانستان یو له هغو هېوادونو دی چې له ښځو سره پکې تاوتریخوالی زیات دی.

نن د نومبر ۲۵ د ښځو په وړاندې د تاوتریخوالي د ختمولو نړیواله ورځ ده.

په افغانستان کې د ملګرو ملتونو مرستندویه ماموریت یوناما ټینګار کړی چې د ښځو او نجونو پروړاندې د تاوتریخوالي د پای ته رسولو هڅې باید چټکې شي.

یوناما په دې اړه په اعلامیه کې زیاته کړې چې سږ کال د ښځو پروړاندې د تاوتریخوالي د ختمولو د ورځ په دې شعار لمانځل کیږي چې د جنسیت په اساس د تاوتریخوالي پر ضد مبارزه چټکه شي او له دې پدیدې سره هېڅ زغم نه دی پکار.

افغانستان یو له هغو هېوادونو دی چې له ښځو سره پکې تاوتریخوالی زیات دی.

د افغانستان د ښځو چارو وزارت ویلي سږ کال د ښځو په وړاندې د پروسږ کال په پرتله شل فیصده زیات تاوتریخوالی زیات شوی دی.

د نړۍ په ګوټ ګوټ په تېره بیا هغو هېوادونو کې چې د ښځو په وړاندې تاوتریخوالی زیات دی سر له نن نه د شپاړسو ورځو په مخه یو کمپاین هم پیل شوی.

په دې کمپاین کې د ښځو په وړاندې د تاوتریخوالي د پای ته رسولو هڅې کیږي.

بامیان: له چاودنو ۱۵ تنه وژل شوي، ۸۵ ژوبل

بامیان کې د چاودنې وروسته د سیمې یو انځور

د افغانستان په بامیان ولایت کې د پرونیو بمي چاودنو د مرګژوبلو شمېر زیات شوی دی.

د بامیان د عامې روغتیا رییس علي اقا ایوب ناصري نن مشال راډیو ته وویل چې د وژل شویو کسانو شمېر پنځلسو او د ټپیانو هغه ۵۸ ته رسیدلی دی.


د پېښو اکثر قربانیان ملکیان دي. اخوا ارګ ماڼۍ د افغانستان د ولسمشر اشرف غني په حواله دا چاودنې غندلي او زیاته کړې یې ده چې "طالبان او نورې ترهګرې ډلې د هېواد په بېلابېلو سیمو کې د تاوتریخوالي په زیاتولو سره پر ولسي وګړو بریدونه کوي او عامه ګټو ځایونو ته زیان رسوي."

وسله والو طالبانو ویلي چې دوی په بامیانو کې په دې بمي چاودنو کې لاس نه لري.

افغانستان کې د ځواکونو کمولو ترڅنګ ناټو ماموریت دوام کوي:ستولتنبرګ

د ناټو عمومي منشي ینس ستولتنبرګ

د ناټو جنرل سېکرېټري وايي، سره له دې چې ناټو په افغانستان کې د خپلو ځواکونو د کمولو پرېکړه کړې، خو د دې تړون ماموریت به دوام وکړي.

ینس ستولتنبرګ د نومبر پر ۲۳مه د ناټو په ۶۶ کالنۍ پارلېماني غونډه کې وویل، د ناټو هېڅ اتحادي هېواد دا خطر منلی نه شي چې افغانستان دې د بېلابېلو هیوادونو لپاره په خطر بدل شي.

نوموړي زياته کړه چې امریکا اعلان کړی چې په افغانستان کې د خپلو پوځیانو شمېر کموي خو د ناټو ماموریت به دوام کوي.

د ده په وينا، دوی به افغان امنیتي ځواکونو ملاتړ جاري وساتي.

ستولتنبرګ وویل، په افغانستان کې د دې تړون د موجودګۍ د راتلونکې په اړه به د ناټو د دفاع وزیرانو په غونډه کې چې ټاکل شوې ده د راتلونکي کال په فبرورۍ کې جوړه شي، پرېکړه وشي.

د امریکا د دفاع سرپرست وزیر کریسټوفر میلر تېره اوونۍ وویل چې د ولسمشر دونالډ ټرمپ په امر به په افغانستان کې د امریکايي پوځیانو شمېر د جنورۍ تر نیمايي پورې ۲۵۰۰ ته راکم کړي.

شمالي وزیرستان کې د څلورو وسله والو د وژلو ادعا

د پاکستان پوځ وايي په شمالي وزیرستان کې یې د نومبر پر ۲۲مه نېټه د خپلو عملیاتو پر مهال څلور وسله وال وژلي دي.

د پاکستان پوځ د عامه اړیکو څانګې (ای اېس پي آر) بیګا په خپل بیان کې ویلي چې د شمالي وزیرستان په سپین وام کې یې د خفیه معلوماتو په اساس د نومبر پر ۲۲مه نېټه په ځانګړیو عملیاتو کې یو عسکر وژل شوی او دوه نور ژوبل شوي هم دي.

پوځ د وژل شویو څلورو واړو وسله والو لاشونه په ولکه کې اخیستي او تصویرونه یې له رسنیو سره شریک کړي دي.

وسله والو لا هم په دې اړه څه نه ي ویلي.

د پوځ د بیان ترمخه په سیمه کې یې د لټون عملیات هم پیل کړي دي.

د پوځ یو چارواکي بیګا د نوم نه څرګندولو په شرط مشال رېډیو ته وویل چې په شمالي وزیرستان کې پوځ په تیر یو کال کې د خفیه معلوماتو په اساس په ځانګړو عملیاتو کې ۹۵ وسله وال وژلي دي.

دا په داسې حال کې ده چې په شمالي وزیرستان کې وخت په وخت هدفي وژنې، بمي بریدونه او د وسله والو او امنیتي ځواکونو ترمنځ نښتې کېږي او خلکو یې پرضد احتجاجونه هم کړي دي.

 کورونا وبا: پاکستان حکومت تر یوې میاشتې ټولې تعلیمي ادارې تړي

د اسلام اباد یو ښوونځی

د پاکستان وفاقي حکومت د کورونا وایرس وبا د دوهمې څپې مخنیوي په موخه په ټول هېواد کې د نومبر له ۲۶ مې د ډیسېمبر تر۲۵مې د سکولونو په ګدون د ټولو تعلیمي ادارو د بندولو پرېکړه کړې ده.

د نومبر پر ۲۳مه په اسلام آباد کې د تعلیم وفاقي وزیرشفقت محمود او د څلور واړو صوبو د تعلیم وزیرانو په غونډه کې دا پرېکړه وشوه.

بلخوا د شخصي سکولونو مالکانو اتحادیې ویلي چې دوی ته د سکولونو بندولو حکومتي پرېکړه د منلو نه ده. د دوی په وینا لا تراوسه ماشومانو ته د نصاب ښوونه نه ده پوره شوې او له دې امله دوی او استادان له مالي ستونزو سره مخامخېږي.

خلیلزاد د افغانستان-پاکستان اړیکو مثبت پرمختګ ته هرکلی ویلی

د افغان سولې لپاره د امریکا ځانګړی استازی زلمی خلیلزاد

زلمی خلیلزاد وايي، که د افغانستان او پاکستان ترمنځ هوکړه‌لیک عملي شي په سیمه کې به د سولې او پرمختګ زمینه برابره کړي.

د افغان سولې لپاره د امریکا ځانګړي استازي خلیلزاد دا خبره بېګا پر خپل ټویټر لیکلې ده.

هغه ویلي چې د افغانستان او پاکستان په اړیکو کې د مثبت پرمختګ او هم د هغې پاکستانۍ ژمنې هرکلی کوي چې په افغانستان کې به د تاوتریخوالي د کمولو او د اوربند راوستو لپاره کار کوي.

د افغانستان او پاکستان ترمنځ ګډ هوکړه‌لیک کابل ته د پاکستاني وزیر اعظم عمران خان د سفر پر مهال لاسلیک شو.

د دغه هوکړه‌لیک په اساس د افغانستان او پاکستان حکومتونو ژمنه کړې چې د سولې او امنیت، اقتصادي پراختیا، هېواد ته د افغان کډوالو د ستنېدو او ګډو همکاریو ته به دوام ورکړي.

"خیبرپښتونخوا کې دې د تیزاب پاشلو مخنیوي لپاره  قانوني مسوده ژر تر ژره منظوره شي"

له تیزابو اغیزمنه کسانو د درملنې لپاره د ادارې ایسډ سروایور فاونډیشن پاکستان مشرې ویلري خان مشال راډيو ته وويل چې بايد دا قانوني مسوده ژر تر ژره منظور کړل شي.

په خیبرپښتونخوا کې د بشري حقونو مبارزان او ځینې سیاستوالان وايي، حکومت دې د تیزاب پاشلو پېښو مخنیوي لپاره وړاندې شوې قانوني مسوده ژر تر ژره منظوره کړي.

په صوبايي اسمبلي کې د پیپلز ګوند غړې نګهت اورکزۍ د نومبر پر ۲۱مه مشال راډیو ته وویل چې د تيزاب شیندلو د پيښو مخنیوي لپاره یې د - ایسډ اینډ برن کرایم ایکټ ۲۰۲۰ - په نامه یو مسوده وړاندې کړې ده.

د دې په وینا، په دې مسوده کې مجرم ته د اوو کالو د قید سزا ورکولو، جرمانې، د حکومت لخوا د متاثره تن درملنې لپاره د مالي مرستو او د دې کار لپاره د صوبايي کمیشن غوښتنه شوې ده.

له تیزابو اغیزمنه کسانو د درملنې لپاره د ادارې ایسډ سروایور فاونډیشن پاکستان مشرې ویلري خان مشال راډيو ته وويل چې بايد دا قانوني مسوده ژر تر ژره منظور کړل شي.

د ښځو د حقونو لپاره د کارکونکې ادارې عورت فاونډیشن یو غړی عاصم ملک وايي چې په هېواد کې قوانین موجود دي خو په سمه توګه عملي کولو ته اړتیا ده.

ایسډ سروایور فاونډیشن پاکستان په یو راپور کې ویلي چې په ملک کې په ۲۰۱۶ او ۲۰۱۷م کې د تیزاب شیندلو ۷۱ پېښې ثبت شوې وې خو په ۲۰۱۸ او ۲۰۱۹م کالونو کې بیا دا ډول ۶۲ پېښې مخې ته راغلي دي.

د امریکا یو وفاقي جج د ولسمشر ټرمپ د انتخاباتي کمپاین ډلې مقدمه ختمه کړه

د پینسلوینیا ریاست چارواکي اوس کولی شي چې د انتخاباتو د نتیجو تصدیق وکړي.

د امریکا د پينسلوینیا ریاست یو وفاقي جج د ولسمشر ډونلډ ټرمپ د انتخاباتي کمپاین د ډلې لخوا جمع کړل شوې هغه مقدمه ختمه کړې چې پکې په ډاک د استول شویو ملینونو رایو د تصدیق د مخنیوي غوښتنه شوې وه.

عدالت دا پرېکړه د نومبر پر ۲۱ مه د ولسمشر ټرمپ د هغو هڅو لپاره ورستۍ ضربه وه چې پکې نوموړی د یو شمېر مقدمو او بې مثاله طریقو په ترڅ کې د انتخاباتو نتیجې په بل مخ اړول غواړي.

د امریکا ضلعي جج مېتهیوبران په خپله فېصله کې لیکلي چې د ټرمپ انتخاباتي ډلې په دې مقدمه کې داسې اوږده دلایل ورکړي وو چې په قانوني معیار برابر نه وو او تورونه یې د بې ثبوته ګنګوسو په اساس وو.

نوموړي زیاته کړې چې په امریکا کې په دې تورونو د یو تن رایې هم نه شي رد کېدلی دا خو پرېږده چې د هېواد د ابادۍ په لحاظ په شپږم نمبر لويي ریاست د ټولو خلکو رایې دې باطلې وګرځول شي.

د پینسلوینیا ریاست چارواکي اوس کولی شي چې د انتخاباتو د نتیجو تصدیق وکړي.

د دې نتیجو ترمخه په دې ریاست کې دا مهال د ډیموکرېټ ګوند امیدوار جوبایډن څه د پاسه په ۸۰ زرو ووټونو بریا ترلاسه کړې ده.

د نومبر د درېیمې په ولسمشریزو انتخاباتو کې جو باییډن په لويي اکثریت بریا ترلاسه کړې چې پکې یې د الیکټورل کالج ۳۰۶ رایې اخیستي او د هغه مخالف امیدوار ډونلډ ټرمپ د الیکوټورل کالج ۲۳۲ رایې ترلاسه کړي دي.

جوبایډن د پینسلوینیا په شمول د دې انتخاباتو د یو شمېر مهمو ریاستونو په ګټلو کې بریالي شوی دی.

مایک پامپیو په افغانستان کې د تشدد کمولو غوښتنه کړې

مایک پومپیو په قطر کې د افغان دولت د مرکچي پلاوي له مشرتابه سره هم لیده کاته او خبرې اترې کړې دي. 

د امريکا د بهرنیو چارو وزیر مایک پامپیو په قطر کې د نومبر پر ۲۱مه تر یوې غونډې وروسته په طالب مشرانو غږ وکړ چې په افغانستان کې د دایمي اوربند په هکله ګړندي خبرې وکړي.

په قطر کې د طالبانو د سياسي دفتر مشر ملا عبدالغني برادر او د طالبانو له مذاکراتي ډلې سره د مایک پامپيو تر ليدو وروسته د امریکا د بهرنیو چارو وزارت يو وياند وويل چې پومپيو د تشدد د کمولو غږ هم وکړ.

د وزارت ویاند وویل پامپيو په خبرو کې په تاوتریخوالي کې د پام وړ کمولو غوښتنه وکړه او دوی یې سیاسي لار نقشې، دايمي او جامع اوربند په اړه د خبرو اترو تېزولو ته وهڅول.

پامپیو تر غونډو وروسته پر ټويټر پاڼه ليکلې چې له دوحې لاړم خو باور لرم دي چې د هلو ځلو په نتيجه کې به په سیمې کې امنیت او ثبات راشي.

مایک پومپیو په قطر کې د افغان دولت د مرکچي پلاوي له مشرتابه سره هم لیده کاته او خبرې اترې کړې دي.

پامپيو د اروپا او منځني ختيځ د اوو هېوادونو په سفر دی. نوموړي په قطر کې د دې هېواد واکمن او د بهرنيو چارو وزير سره هم ملاقات وکړ.

د افغان دولت او طالبانو ترمنځ دا تاریخي خبرې اترې د سپټمپر له ۱۲مې په قطر کې پیل شوې خو د طريقه کار له کبله له خنډ سره مخامخ شوې دي.

د نړۍلويو اقتصادي هېوادونو د کورونا په وړاندې د یووالي غوښتنه وکړه

د سعودي عرب پاچا سلمان د شلو لويو اقتصادي هېوادونو سرمشريزه پرانسته او ژمنه یې وکړه چې دا ډله به د نړیوالې همکارۍ په مرسته پر دې بحران قابو موندي.

د نړۍ ۲۰ لويو اقتصادي هېوادونو دوه ورځنۍ سرمشريزه د نومبر پر ۲۱مه پيل شوه.

دوی د کورونا وايرس وبا په وړاندې مبارزه کې د یووالي غوښتنه وکړه.

د سعودي عرب پاچا سلمان د شلو لويو اقتصادي هېوادونو سرمشريزه پرانسته او ژمنه یې وکړه چې دا ډله به د نړیوالې همکارۍ په مرسته پر دې بحران قابو موندي.

پاچا سلمان د کورونا وايرس مخنيوي لپاره د سفر محدودیتونو له وجې ویډیو کنفرانس له لارې وينا وکړه.

د جرمني چانسلرې انګیلا میرکل غونډې ته په خپله وینا کې د نړیوالې همکارۍ غوښتنه هم وکړه.

هغې وویل که چیرې هیوادونه له يو بل سره ودریږي نو دوی پر وايرس او له وجې يې پر رامینځ شويو حالاتو قابو موندلي شي.

د امريکا ولسمشر ډونالډ ټرمپ په سرمشريزه کې له دوو ساعتونو څخه لږ وخت تیر کړ او وروسته د ګالف لوبې کولو لپاره ولاړ.

تمه ده چې ټرمپ نن د نومبر پر ۲۲مه په سرمشریزه کې برخه واخلي. ټرمپ د نومبر درېمي انتخاباتو کې له جو بایډن ماته خوړولې خو تراوسه یې شکست نه دي منلي.

یمن کې به قحطي د میلیونونو خلکو ژوند اغېزمن کړي: انتونیو ګوتېريش

ملګري ملتونه په یمن کې د تاریخۍ قحطۍ خبر ورکوي.

د ملګرو ملتونو عمومي مشي انتونیو ګوتېريش ویلي، جنګځپلی یمن ډېر نېږدې د قحطۍ د یوې داسې خرابې څپې سره مخ کېدونکی دی چې نړۍ به په تېرو څو لسیزو کې نه وي لیدلې او د مېلیونونو خلکو ژوند به اغېزمن کړي.

د ملګرو ملتونو لخوا، په یمن کې د قحطۍ په اړه د نومبر د ۲۰مې نېټې دا خبرداری په داسې حال کې ورکول کېږي چې امریکا په پام کې لري د یمن د حوثي ياغیانو ډله د بهرنۍ ترهګرۍ ډلې په نوملړ کې شامله کړي چې پر ایران فشار واچول شي څوک چې د دغې ډلې ملاتړ کوي.

خو خیریه ادارې وايي، که امریکا دا ګام پورته کړي نو د یمن د ۲۴ ميلیونه وګړو ۸۰ فيصده برخې ته به د مرستو رسول په خطر کې واچوي، ځکه چې له حوثي یاغیانو سره به خبرې کول ګرانې شي.

نور پورته کړئ

ځانګړې پاڼې

له موږ سره اړیکي

XS
SM
MD
LG