د افغان ولسمشر ویاند صدیقي صدیقي وايي، ولسمشر اشرف غني قطر ته رسېدلی او ټاکل شوې چې نن او سبا له لوړپوړو قطري چارواکو سره د افغان سولې په خبرو او دغه شان د دواړو هېوادونو ترمنځ د اړیکو د پراختیا په اړه خبرې وکړي.
ښاغلي صدیقي د دوحې په هوايي ډګر کې رسنیو ته ویلي چې ولسمشر له قطر مخکې کویت ته ولاړ او د کویت د امیر د فاتحې په مراسمو کې یې ګډون وکړ او دغه شان یې د هغه هېواد له نوي امیر او وزیر اعظم سره هم لیدلي او د دواړو هېوادونو د اړیکو د پراختیا په اړه یې ورسره خبرې کړې دي.
صدیقي زیاتوي: "افغان ولسمشر به نن او سبا د قطر هېواد له لوړ رتبه چارواکو سره وګوري او دغه شان د افغان مرکچي پلاوي سره به هم نن وګوري."
صدیقي وايي، ټاکل شوې چې افغان ولسمشر د خپل دغه دوه ورځني رسمي سفر په ترڅ کې په قطر کې له یو شمېر مېشتو افغانانو سره هم وګوري.
