محمود خان اڅکزي ویلي چې په ټوله نړۍ کې پوځ له سیاسته پاک وي خو د ده په وینا، له بده مرغه په پاکستان کې چې څوک د آیین د بالادستۍ خبره کوي هغه ته د غدار په توګه کتل کیزي.
نوموړي وویل چې د اسلام اباد په غوڼده کې اپوزېشن پرېکړه کړې چې په دې ملک کې به د ایین واکمني وي او هره اداره به د ایین په چوکاټ کې دننه کار کوي او د ولس له لوري ټاکل شوی پارلمان به د طاقت سرچشمه وي.
محمود خان اڅکزي دا څرګندونې د سېپټمبر پر ۲۶مه په کوټه کې د پاکستان د خبریالانو اتحادې - پاکستان فیډرل یونین آف جرنلسټس - د مرکزي کمټۍ غړو ته په وینا کې کړې دي.
پاکستان د بیلا بیلو قامونو ملک دی او دلته مېشت قامونه د یو فیډریشن په چوکاټ کې ژوند کوي.
نوموړي وویل چې د پاکستان په اساسي قانون کې ټولو اوسېدونکو ته برابر حقونه ورکړل شوي دي.
نوموړي ویلي، “ پښتنو او بلوڅو د انګریز غلامي نه ده منلې او د هغه پرضد یې مبارزه کړې ده، خو پر هغه سربېره که څوک نن په دې هیواد کي پښتانه د غلام قام په توګه ساتل غواړي نو دا امکان نه لري.
محمود خان اڅکزي د پاکستان پر بهرنۍ تګلاره هم نیوکې وکړې او ویې ویل چې د ده په وینا، د غلطې بهرنۍ تګلارې له کبله دا وخت پاکستان له یو لوی خطر سره مخامخ دی.
هغه دا هم وویل چې په افغانستان کې د امن لپاره هلې ځلی باید ګړندۍ کړل شي.
د پاکستان د خبریالانو اتحادیې مشر شهزاده ذوالفقار دې غوڼدې ته وویل چې دا وخت د پاکستان میډیا له یو لوی مشکل سره مخامخ ده.
ده وویل چې په تیرو ۲ کلو کي د میډیا ۸ زره کارکونکي له بې روزګارۍ سره مخامخ شوي دي.
ده وویل چې په هیواد کې د میډیا د خوندي ساتلو لپاره پکار ده چې ټول سیاسي ګوندونه خپل کردار ادا کړي.
د پاکستان وزیر اعظم عمران خان د ټي وي چینلو له مشرانو سره د لیدو پرمهال ویلي چې که اپوزېشن ګوندونو د اسمبلۍ له چوکیو استعغا وکړې نو بیا دغه چوکۍ بیرته نشي ګټلای.
د عمران خان په مشرۍ د تحریک انصاف حکومت وايي اپوزېشن د دې لپاره د حکومت پرضد غونډې او احتجاجونه کوي چې خپلې درغلۍ پټې کړي.
خو اپوزېشن ګوندونه تور پورې کوي چې د عمران خان حکومت د درغلیو په نتیجه کې راغلی دی او باید چې استعفا وکړي.
