د افغانستان او پښتونخوا ځوانان وايي چې افغان جنګ تر ټولو زيات زیان ځوانانو ته رسولی دی، هغوی په دغه تېره څه باندې ۴۰ کلنه جګړه کې تعليمونه، روزګارونه او د ژوند ګڼې نورې خوشالۍ له لاسه ورکړي دي.
دوی وايي، نور دې افغان ځوانان د پردو ټوپک له خپلې اوږې لیرې کړي او د نورو ګټو لپاره دې خپل وطن افغانستان نه برباد نکړي.
دوي وايي اوس په د نړۍ وګړي په جنګونو کې نه بلکې په ساينس،تحقيق او ټېکنالوژۍ کې له يو بل سره سيالۍ کوي.
دا په داسې حال کې ده چې په قطر کې د افغان دولت او طالبانو ترمنځ د سولې د خبرو نن اوومه ورځ ده.
په خپرونه کې موږ سره ميلمانه دي له جلال اباده دوه مدني فعالان عبدالبصير سباون او ملالۍ ميوندۍ او له پېښوره د قبايلي ځوانانو جرګې مشر ارشد اپرېدی.
د ځوانانو غږ خپرونې کوربه اسرار عالم مومند دی.