د لاسرسي ځای

تازه خبر

خبرونه

پاکستان کې د کورونا وهلو شمېره ۲۶۳ زره نه واوښته

پاکستان کې نرم ټولبند یا سمارټ لاک ډاون له وجې خلک د سفر پر مهال ماسکونه کاروي.

پاکستاني چارواکي وايي، د جولای تر ۱۹مې نږدې ۲۶۳ نیم زره کسان پر کورونا اخته شوي دي چې پکې یو نیم زر نه زیات یې په تېرو ۲۴ ساعتونو کې ناجوړه شوي دي.

د کورونا د شمېرو په اړه معلومات خپرونکې سرکاري ویبپاڼه لیکي چې تر دې مهاله په ټول ملک کې د کوویډ ـ ۱۹ ناروغۍ نه ۵۵۶۸ کسان وژل شوي خو څه د پاسه دوه لکه او څلور زره ترې بېرته رغېدلي هم دي.

دا په داسې حال کې ده چې د هېواد په بېلا بېلو برخو کې سمارټ لاک ډاون یا نرم ټولبند دوام لري.

کورونا وایرس په اول وار د ۲۰۱۹م کال په وروستیو کې د چین په ووهان ښار کې راڅرګند شوی وو چې تر دې مهاله یې په نړۍ کې له شپږو لکو زیات کسان وژلي دي.

په نړۍ کې د کورونا په اړه شمېرې راټوونکي امریکايي جانز هاپکینز پوهنتون ترمخه کورونا وایرس تر اوسه له یو کروړ، ۴۲ لکو او شپږ څلویښت زرو زیات کسان ناروغه کړي او څه د پاسه ۷۹ لکه او ۹۷ زره ترې بېرته رغېدلي هم دي.

د نننۍ ورځې ټول خبرونه وګورئ

خیبر پښتونخوا کې د کورني تشدد مخنیوي بل منظور

د خېبر پښتونخوا اسمبلۍ کي نن د جمعې په ورځ د ښځو پرضد د کورني تشدد د مخنیوي بل منظور کړی دی.

دغه بل د خیبر پښتونخوا د ټولنیزې خير ښېګړې او د ښځو پرمختګ صوبايی وزیر هشام انعام الله اسمبلۍ ته وړاندې کړ.

د اسمبلۍ غونډي ته په خپله وینا کي هشام انعام الله وویل چې د دې قانون ترمخه به پر ښځو تشدد کوونکو ته د پنځوو کلونو د بند سزا ورکړل کيږي او په پنځلسو ورځو کي دننه به په عدالت کې د شوي تشدد خواست جمع کېږي او عدالت به په دوو میاشتو کي دننه د کورنې تشدد د قضیو د فیصلو کولو پابند وي.

د بل په مسوده کي لیکل شوي دي چې په کور کې په ښځو د وهلو ټکولو ترڅنګ معاشي، نفسیاتي، او جنسي فشار به هم تشدد ګڼل کېږي. د بل د مسودې ترمخه د کورني تشدد د پېښو د پلټنو لپاره به په هره ضلع کي یوه تحقیقاتي کمیټي جوړېږي او کمیټۍ به متاثره ښځو ته بیړنۍ طبي مرسته، سرپناه او د ژوند ضرورتونو لپاره د پېسو ضمینه برابروي.

خیبر پښتونخوا اسمبلۍ کي د کورني تشدد دا بل له تېرو اوو کلونو راهیسې ځنډنی وو او بیا وروستو د ټولو ګوندونو د اتفاق لپاره دا بل د اسمبلۍ ځانګړې کمیټۍ ته لېيږدول شوی وو او د بل په مسوده کي د ځینو ترمیمونو پس نن له اسمبلۍ منظور کړل شو.

سورلۍ کې د کورونا وایرس مثبتو پېښو پس چین ته پر پي ای اې بندیز

د پاکستان قامي هوايي شرکت پي ای اې

چين د پاکستان قامي هوايي شرکت پي ای اې پر پروازونو د درېوو اوونیو لپاره بندیز لګولی دی.

د راپورونو له مخې دا بندیز له هغه وروسته ولګول شو چې له اسلام اباده و بيجينګ ته دورغلې یوې الوتکې په ۱۰ مساپرانو کې د کورونا وایرس وو.

د جنورې پر ۱۵مه مشال راديو سره په خبرو کې د پي ای اې وياند عبدالله د چين لخوا د بندیز لګېدو پخلی وکړ.

نوموړي چې له پاکستانه د تلو پر مهال له دغو مساپرو سره د کورونا وایرس د معاينو منفي راپور وو خو بيجينګ ته له رسيدلو وروستو یې هلته راپور مثبت راغلی دی.

پاکستان سرکار د سکولونو پرانستلو پلان اعلان کړ

د جنورۍ له ۲۵ مې راهیسې به پرایمري سکولونه پرانستل شي او د لوړو زده کړو ادارې به د فېبرورۍ په لومړۍ نېټه پرانستل کېږي.

د پاکستان د تعلیم وفاقي وزیر د کورونا وبا له کبله د بندو سکولونو د پرانستلو لپاره پلان اعلان کړی دی.

په اسلام اباد کې د تعلیم او روغتیا وزارت د چارواکیو غونډې وروسته شفقت محمود یو خبري کانفرانس ته وویل چې های او هایر سیکنډري سکولونه به د جنورۍ په ۱۸مه نېټه بیرته پرانستل شي.

له حکومتي پلان سره سم به تعلیمي ادارې په مرحله واره توګه پرانستل کېږي.

د جنورۍ له ۲۵ مې راهیسې به پرایمري سکولونه پرانستل شي او د لوړو زده کړو ادارې به د فېبرورۍ په لومړۍ نېټه پرانستل کېږي.

د تعلیم وزیر وویل، د سکولونو له تړل کېدو سره زده کړې اغیزمنې شوي دي، خو د ماشومانو روغتیا حفاظت تر ټولو مهمه خبره وه، نو ځکه یې تعلیمي ادارې تړلې وې.

دا تعلیمي ادارې پروسږ کال د نومبر ۲۶ مې راهیسې تړلې پرتې دي خو کاروباري مرکزونه پرانستې دي او د ډاکټرانو په وینا په ډېرو ځایونو کې د کورونا مخنیوي په تدابیرو عمل نه کېږي.

د سکولونو پرانستلو په اړه پریکړه په داسې حال کې کېږي چې په پاکستان کې یو ځل بیا د کورونا د رنځورانو شمېره په ډیرېدو ده.

پاکستان کې د کورونا وایرس پېښې بیا زیاتې شوې

ډاکټران اندیښمن دي چې که چیرې بندیزونه عملي نه شي نو وایرس به لا خور شي خو حکومت وايي، نه غواړي چې خلک روزګارونه وبایلي او اقتصاد ته تاوان ورسي نو ځکه  ټولبند نه عملي کوي.

په پاکستان د کورونا څار مرکز ویلي چې د کورونا د رنځورانو شمېره بیا په ډېریدو ده او په تیرو ۲۴ ساعتونو کې د وایرس نورې ۳،۰۹۷ مثبتې پېښې ثبت شوي دي.


نېشنل کمانډ اپریشن سنټر په یو بیان کې ویلي چې په تیرو دوو میاشتو کې دا تر ټولو لویه شمېره ده.

په بیان کې راغلي چې په پاکستان کې د وایرس ناروغانو ټوله شمېره له پینځه لکه او ۱۰ زرو اوښتې ده او تر اوسه ترې له ۱۰ زرو ډېر کسان مړه شوي دي.

له وایرسه ۴۷۰،۰۰۰ کسان بیرته روغ شوي هم دي.

د جنورۍ پر ۱۴مه له مشال راډیو سره په خبرو کې د پاکستان انسټيیوټ اف میډیکل ساینسز ډاکټر فضل وهاب وویل چې په پاکستان کې لا واکسین نه شته نو د حفاظت یوازیني لاره په احتیاطي تدابیرو عمل کول دي. خو ډېر خلک یې نه عملي کوي چې ورسره وایرس لا خور شوی دی.

ډاکټران اندیښمن دي که بندیزونه عملي نه شي نو وایرس به لا خور شي خو حکومت وايي نه غواړي چې خلک روزګارونه وبایلي او اقتصاد ته تاوان ورسي نو ځکه ټولبند نه عملي کوي.

د تعلیم وفاقي وزیر د کورونا د وبا له کبله د بندو سکولونو د پرانستلو لپاره پلان اعلان کړی دی.

بایډن د کورونا وبا بحران مخنیوي لپاره مرستندویه پیکج وړاندې کړ

بایډن به د جنورۍ پر ۲۰ مه په رسمي توګه د خپلې ولسمشرۍ دوره پیل کوي.

د امریکا منتخب ولسمشر جو بایډن د کورونا وبا له کبله له رامنځ ته شوي بحران سره د مقابلې لپاره یو لوی مرستندویه پیکج وړاندې کړی دی.

نوموړی وايي، امریکا دغه پلان ته اړتیا لري.

بایډن به د جنورۍ پر ۲۰ مه په رسمي توګه د خپلې ولسمشرۍ دوره پیل کوي.

نوموړي موجوده صورتحال د انسانانو لپاره د کړاونو یو ژور بحران بللې او ویلي یې دي چې باید ستونزې بې له ځنډه هوارې شي.

بایډن د مالي مرستې د پیکج تجویز د جنورۍ پر ۱۴مه وړاندی کړ.

د مرستی ددغه پکیج ترمخه به ۴۱۵ اربه ډالر له دغه وایرس سره د مبارزې او د کوېد- ۱۹ واکسین وېشلو لپاره او یو ټریلیون ډالره مرستې به نیغ په نیغه امریکايي وګړیو ته ورکول کېږي.

دا لا یقیني نه ده چې ایا کانګرس به د بایډن پلان منظور کړي او که نه.

د ریپبلکن ګوند ګڼو استازو د ولسي مرستو په لوړ خرڅ او د پلان لپاره د قرض شوي رقم په کارولو اعتراضونه کړي دي. خو د کانګرس په دواړو ایوانونو کې د ډیموکریټ ګوند د استازو د شمېر ډېرېدل د پلان په منظورۍ کې مرسته کولی شي.

نړیوال ماهرین د کورونا وایرس سرچینې پلټنو لپاره چین ته ورسېدل

په مارچ کې د روغتیا نړیوال سازمان د وایرس خپرېدو ته په کتو جهاني وبايي حالت اعلان کړ.

د کورونا وايرس د ريښو معلومولو لپاره د صحت نړيوالې ادارې ماهرين تر اوږده ځنډ پس د جنورۍ پر ۱۴مه چين ته ورسېدل.

د چين سرکاري رسنيو راپور ورکړی چې په لسو غړو مشتمله د پوهانو نړيواله ډله ووهان ته رسېدلې.

تمه څرګندېږي چې دوی به په هغه ښار کې يوه مياشت ايسار وي چېرته چې د ۲۰۱۹ ز کال په اخره کې په لومړي وار کورونا وايرس معلوم شوی و.

د امريکا، اسټراليا، جرمني، جاپان، برتانيا،روس، قطر، نېدرلېنډز او ويتنام دا ماهرين به په قرنطين کې خپل کار پیل کوي او چينايي ماهرينو سره به د ويډيو کانفرنس د لارې غونډه کوي.

د صحت نړيوالې ادارې ( ډبليو اېچ او) مشرتېره اوونۍ د دې سفر لپاره د انتظاماتو پر ځنډ د خپګان څرګندونه کړې وه.

نوموړي ويلي ول چې د ساينس پوهانو تمرکز به پر دې وي چې څرنګه په لومړی ځل کورونا وايرس انسانانو ته ولګېدو.

د کورونا وايرس د ريښو په اړه داسې اټکل کېږي چې دا خاپرکو راوړی او د هغه ځناور په وسيله انسانانو ته خور شوی چې د ووهان په مارکېټ کې د خوراک يا دوايي لپاره خرڅ شوی و.

چينايي حکومت بيا دا نظرې خورې کړي دي چې کورونا وايرس د درامد شوي خراب سمندري خوراک له وجې مخې ته راغلی دی خو نړيوال ساينس پوهانو او ادارو بيا دغه دريځ رد کړی دی.

د پوځ مشر کوټه کې د وژليو هزاره کانکیندونکيو له کورنیو سره وليدل

د پاکستان پوځ مشر جنرال قمر باجوه

د پاکستان پوځ مشر په کوټه کې د وژليو هزاره کانکیندونکيو له کورنیو سره ليدلي دي.

د پوځ عامه اړيکو ادارې" ای اېس پي ار" په بيان کې ويلي چې جنرال قمر باجوه د جنورۍ پر ۱۳مه د وژل شويو کسانو کورنيو ته ډاډ ورکړ چې د دې پېښې عاملينو ته به سزا ورکول کېږي.

دغه ۱۰ کانکیندونکي د جنورۍ پر څلورمه د مچ په سيمه کې وژل شوي ول چې ذمه واري يې داعش وسله والې ډلې منلې وه.

د وژل شوو هزاره ګانو مړي خاورو ته وسپارل شو
تم شئ

هېڅ میډیايي سرچینه اوس نشته

0:00 0:01:56 0:00

له دې وروسته هزارګانو له مړو سره په کوټه کې تر شپږو ورځو پورې درنا ورکړه.

د پوځ بيان زياتوي چې جنرال باجوه ته د غونډې پر مهال د بلوچستان پر امنيتي حالاتو مالومات ورکړل شول.

وروسته نوموړي پوځي افسرانو ته په وينا کې وويل چې بلوچستان ډېر سټرېټېجک ارزښت لري چې نو ځکه د ده په ادعا د دښمنانو ورباندې نظر دی.

خو زياته يې کړه چې د دښمنانو لخوا د حالاتو ګډوډولو هڅې به کاميابۍ ته پرې نه ښوول شي.

د افغانستان او ترکمنستان ولسمشران درې مهمې پروژې پرانیزي

افغان ولسمشر محمد اشرف غني او ترکمنستان قربان قلي بردي محمدوف د ویډیو کانفرانس له لارې د پرانستې دغو مراسمو کې برخه اخلي او ویناوې هم کوي.

ټاکل شوې چې د افغانستان او ترکمنستان ولسمشران د جنورۍ پر ۱۴مه د دواړو هېوادونو ترمنځ درې مهمې پروژې پرانیزي.

په دغو پروژو کې یوه یې د اقینې-اندخويي ترمنځ د ریل پټلۍ ده چې د جوړېدو کارونه یې په دې وروستیو کې مکمل شوي او دوه نورې پروژې د برښنا د لېږد او شمسي فایبر دي.

افغان ولسمشر محمد اشرف غني او ترکمنستان قربان قلي بردي محمدوف د ویډیو کانفرانس له لارې د پرانستې دغو مراسمو کې برخه اخلي او ویناوې هم کوي.

د تېرې جمعې په ورځ د ترکمنستان د بهرنیو چارو وزیر د همدغو پروژو په تړاو د بحث لپاره په یوه دوه ورځني سفر کابل ته تللی و.

شاوخوا یوه میاشت وړاندې د ایران او افغانستان ترمنځ د هرات- خواف د اوسپنې پټلۍ هم پرانستل شوه چې ۲۲۵ کیلو متره اوږدوالی لري.

جلال اباد کې درې داعش وسله وال وژل شوي

چاوراکي وايي، په دې عملیاتو کې ولسي وګړو ته کوم زیان نه دی اوښتی.

د ننګرهار چارواکي ادعا کوي، بېګا شپه د ملي امنیت ځانګړو ځواکونو د جلال اباد ښار په باګرامیو کې درې تنه داعش وسله وال د نښتې پر مهال وژلي دي.

د ننګرهار ولایت مطبوعاتي مسوول عطاالله خوږیاڼي د جنوري پر ۱۳مه مشال راډیو ته وویل چې له دغه داعش وسله والو څخه درې دانې کلاشنکوفونه، ۱۸ شاژورنه، يو قبضه راکټ له څلور فايره مرميو سره، ۵ کړۍ لاسي بمونه، دوه عرادې موټرونه، يوه هندي ريکشا، يو پايه لب ټاپ کمپيوټر، ۳ سيټه موبايلونه، يو عدد هارډسک، او ۱۰ متره ثانيه سوز لين د امنیتي ځواکونو لاسته ورغلل.

د خوږیاڼي په دې عملیاتو کې ولسي وګړو ته کوم زیان نه دی اوښتی.

پاکستان کې له کووېډ-۱۹ ناروغۍ نور ۵۵ تنه مړه شوي

په پاکستان کې د کورونا وایرس تر ټولو زیاتې پېښې په سېند صوبه کې مخې ته راغلي خو تر ټولو زیات کسان یې په پنجاب کې مړه کړي دي.

په پاکستان کې په تېرو ۲۴ ساعتونو کې د کورونا له وجې نور ۵۵ کسان مړه شوي چې ورسره په دې هېواد کې له یادې ناروغۍ له وجې د مړو شویو کسانو ټول شمېر ۱۰،۷۷۲ ته ورسېده.

د کورونا وايرس په اړه د حکومتي ويبپاڼې ترمخه، په تېر شوا روز کې د کورونا وایرس نور ۲۱۲۳ کیسونه ثبت شوي چې ورسره په پاکستان کې د کورونا وایرس وهلو ټول شمېر پنځه لکه اته زره ۸۲۴ ته ورسېده. خو څلور لکه، ۶۴ زره او نهه نیم سوه ترې بېرته رغېدلي هم دي دي.

دا مهال په دې هېواد کې د کورونا د فعالو کېسونو شمېر ۳۳ زره یو سل او دوه ده.

بلخوا د کورونا نړیوالې شمېرې راټولوونکی امریکايي جان هاپکینز پوهنتون وايي، د جنورۍ تر ۱۳ مې دې وبا په ټوله نړۍ کې له نهو کروړو، ۱۵ لکو او ۳۹ زرو زیات کسان ناروغه کړي چې پکې یې څه د پاسه ۱۹ لکه او ۵۹ زره مړه کړي خو له پنځو کروړو، پنځو لکو او ۷۶ زرو څخه زیات ترې بېرته رغېدلي هم دي.

افغانستان کې پروسږکال د ساه او زړه ناروغۍ څخه نېږدې ۵۰۰۰ کسان مړه شوي

د وزارت په خبره، د دې ناروغیو وجه د هوا ککړتیا ښکاري.

د افغانستان روغتیا وزارت وايي، پروسږکال په دې هېواد کې د ساه او زړه ناروغیو له کبله نېږدې ۵۰۰۰ کسان مړه شوي دي.

د وزارت په خبره، د دې ناروغیو وجه د هوا ککړتیا ښکاري.

ډي پي اې خبري اژانس خبر ورکړی چې د وزارت له معلوماتو سره سم، په دې کې لس فيصده په کابل کې مړه شوي دي.

د وزیر اکبر خان روغتون مشر ډاکټر عبدالله احمدي ډي پي اې ته ویلي چې هره ورځ په اوسط ډول ۲۰ د ساه ناروغان روغتون ته ورځي.

نوموړي زیاته کړه، دامسلې زیاتره د هوا ککړتیا له وجې دي.

د ماحولیاتو د خوندیتوب ملي ادارې یو چارواکي ویلي، د هوا ککړتیا زیاتېدو مهم وجوهات په یخنۍ کې د سکرو زیات استعمال، پخواني ګاړي او ناسم سړکونه دي.

دا مسلې د بجلۍ کمیښت، د پیټرولو لوړ قیمتونه او د غیر معیاري تیلو له وجې هم دي.

د روغتیا نړیواله اداره ډبلیو ایچ او وايي، د هوا ککړتیا یوه نړیواله مسله ده او له اټکل سره سم، هرکال ترې په نړۍ کې اووه میلیونه کسان مړه کېږي.

اسلام اباد کې د پاکستان، ترکیې او اذربایجان د بهرنیو چارو وزیرانو غونډه

د پاکستان، ترکیې او اذربایجان ترمنځ د دا ډول خبرو لومړۍ پړاو د ۲۰۱۷ز کال پر نومبر کې په باکو کې شوی وو.

د جنورۍ پر ۱۳ مه د پاکستان، ترکیې او اذربایجان د بهرنیو چارو وزیران په اسلام اباد کې غونډه کوي.

د پاکستان د بهرنیو چارو وزارت په خپله ویبپاڼه لیکلي چې وزیران به پر نړیوالو او سیمه ییزو مسلو، د سیمې امنیت ته د ګواښونو، د کوېډ -۱۹ له کبله راپورته شوو ننګونو، اب او هوا بدلون او د اقتصادي پرمختیا پر اهدافو خبرې کوي.

وزارت زیاتوي، په غونډه کې به د شریکو ګټو په برخو کې د درېوو واړو هېوادونو ترمنځ د همکارۍ زیاتولو په ګډون امنیت، تجارت او سرمایه کارۍ، ساینس او ټیکنالوژۍ، تعلیم او کلتور په اړه هم خبري کېږي.

د پاکستان، ترکیې او اذربایجان ترمنځ د دا ډول خبرو لومړۍ پړاو د ۲۰۱۷ز کال پر نومبر کې په باکو کې شوی وو.

کرک کې د ګوزڼ کیمپېن بدرګه پولیس وژل شوی

په پاکستان کې وخت ناوخته د پولیو ضد کمپاین پر امنیتي ساتونکو پولیسو بریدونه کېږي.

د خیبر پښتونخوا په کرک کې نامعلومو وسله والو د ګوزڼ څاڅکو ورکوونکې ډلې پر امنیت مامور پولیس په ډزو وژلی دی.

د کرک د پولیسو مشر عرفان خان مشال راډیو ته وویل چې دا پېښه د جنورۍ پر ۱۲مه سهار د کرک په ګړدي بانډه سیمه کې شوې ده.

ده وویل چې وژل شوی پولیس جنیدالله نومېږي او د پولیو ضد کمپاین پر مهال یې ډیوټي کوله.

چا تر اوسه د دې ذمه واري نه ده منلې.

په پاکستان کې وخت ناوخته د پولیو ضد کمپاین پر امنیتي ساتونکو پولیسو بریدونه کېږي.

په ټوله امریکا کې د وسله والو احتجاجونو خبرداری

د جنورۍ پر شپږمه پر کانګرس د بريد يوه صحنه.اریشف -انځور

د امریکا تحقیقاتي وفاقي ادارې – اېف بي ای – خبرداری ورکړی دی چې د جنورۍ پر ۲۰مه د منتخب ولسمشر جو بایډن د لوړې تر مراسمو وړاندې په ټوله امریکا کې د وسله والو احتجاجونونو امکان دی.

امریکايي رسنیو ته د جنورۍ پر ۱۱مه د یادې ادارې له خوا په تر لاسه شوي بیان کې ویل شوي چې په ټولو ۵۰ ریاستونو او د پلازمېنې پر ودانیو د وسله وال احتجاج لپاره پلانونه روان دی.

بیان زیاتوي، امکان دی چې دا احتجاجونه د جنورۍ له ۱۶مې د جنورۍ تر ۲۰مې ترسره شي.

په امریکا کې له پلازمینې واشنګټن ډي سي پرته په زیاتره ریاستونو کې په ښکاره د وسلو ګرځول قانوني دي.

د واشنګټن او کانګریس امنیت ساتنه پر داسې وخت لا ټینګېږي چې تېره اونۍ د بلوه ګرو له خوا د کانګریس پر ودانۍ په تشدد کې پنځه تنه ووژل شو.

دا له هغه وروسته وه چې ولسمشر ډونلډ ټرمپ په ولسمشریزو ټاکنو کې د درغلیو په اړه په بې اساسه ادعاوو خپل پلویانو راپارولي وو.

پر هغه وخت د کانګریس غړو د ولسمشریزو ټاکنو د نتیجو پخلی کاوی.

شمالي وزیرستان کې برید یو عسکر وژلی، دوه ژوبل

په شمالي وزیرستان کې نامعلومو وسله والو د پاکستان یو عسکر وژلی او دوه نور یې ټپي کړي دي. ځايي امنیتي چارواکي وايي چې وسله والو نن غرمه په میرعلي د امنیتي ځواکونو پر پوسته برید کړی دی.

یو لوړپوړي چارواکي د نوم نه خپرولو په شرط مشال راډیو ته وویل چې دا پېښه له ایدک پله سره نژدې شوې ده.

د ده په وینا ، په دې برید کې یو عسکر وژل شوی او دوه نور ټپي شوي دي.

دا په شمالي وزیرستان کې په روان کال کې پر امنیتي ځواکونو دویم برید دی.

د سرکاري شمېرو له مخې په ۲۰۲۰م کال کې هلته د امنیتي ځواکونو او وسله والو ترمنځ ۵۷ پېښې شوې وې.

د امریکا کانګرس د ولسمشر ټرمپ لیرېکولو بهیر پیل کړ

دا ارټيکل د ټرمپ هغه رول له وجې مخې ته راوړول شو، چې نوموړي د جنورۍ پر شپږمه په کانګرس ودانۍ د خپلې ملاتړې ډلې په بريد کې لوبولی و.

که مرستيال ولسمشر مايک پېنس او کابينه د امريکا ولسمشر ډانلډ ټرمپ له خپلې څوکۍ څخه نه لیرې کوي نو د امريکا استازیو جرګه (کانګرس) کې ډموکراټانو د جنورۍ پر ۱۱ مه په دويم وار د ولسمشر ډانلډ ټرمپ د مواخذې بهیر پیل کړی دی.

ډموکراټانو د يو قرارداد د لارې د امريکا په مرستيال ولسمشر مايک پنس غږ وکړ چې ۲۵م اييني ترميم عملي کړي او ډانلډ ټرمپ له سپينې ماڼۍ هیسته کړي.

د ريپبلکن غړیو پر دې قرارداد د سمدستۍ رايې اچونې مخه ونيوله چې ورپسې ډموکراټانو "بلوې ته د پارونې" له کبله د ټرمپ مواخذې ارټيکل مخې ته راوړو.

دا ارټيکل د ټرمپ هغه رول له وجې مخې ته راوړول شو، چې نوموړي د جنورۍ پر شپږمه په کانګرس ودانۍ د خپلې ملاتړې ډلې په بريد کې لوبولی و.

په قرارداد کې دې حقيقت ته اشاره شوې چې د ټرمپ ملاتړو لخوا تر بريد لږ مخکې ډانلډ ټرمپ يو لاريون ته وينا کړې وه او هغه داسې بيان ورکړی و چې بريدکونکي يې تشويق کړي و او داسې معلومېږي چې په نتيجه کې يې په کانګرس ودانۍ دغه غېر قانوني عمليات رامنځ ته شول.

بلخوا مايک پنس د ۲۵ اييني ترميم د عملي کولو لور ته هېڅ اشاره نه ده ورکړې.

دویم ځل مواخذه ولې کېږي؟

د جنورۍ پر شپږمه نېټه په کانګرس کې د امریکا انتخاباتي استازو (الېکټورل کالج) رایې شمېرلې چې د نومبر درېیمې ولسمشریزه ټاکنو ګټونکی اعلان کړي خو د ولسمشر ډونلډ ټرمپ پلویانو د کانګرس مشترکه غونډه په تشدد له ګډودي سره مخامخ کړه. د رایو شمېرلو بهیر وځنډېدلو چې بیا وروسته د ډېموکراټ ګوند جو بایډن رسمي ګټونکی اعلان شو. د هغې ګډوډۍ تور پر ډانلډ ټرمپ لګېږي ځکه خو یې ډموکراټان موخذه کوي چې تر ټاکلې نېټې یې مخکې له واکه وباسي. په هغه بلوه کې د یوه پولیس افسر په ګډون پنځه تنه وژل شوي ول.

د امریکا نوی منتخب ولسمشر جو بایډن او د هغه مرستیال کاملا هیرېس به د جنورۍ پر ۲۰مه نېټه لوړه کوي.

پاکستان کې کورونا نور ۴۲ تنه مړه کړي

په سیند کې روغتیاپالي د کورونا وایرس له ناروغۍ مړ شوي یوه تن مړی په اېمبولینس کې ږدي. ۲۰۲۰، ۰۹ نومب

د پاکستان د روغتيا څانګې وېبپاڼې تر مخه دغه وایرس په تيرو ۲۴ ساعتونو کې ۲،۴۰۸ کسان وهلي چې دا ډول په دې هېواد کې په کورونا وايرس د اخته کسانو ټول شمېر څه باندې پنځه لکه ۶۰ زرو ته رسېدلی دی.

د جنورۍ تر ۱۲مې له دې وايرسه په پاکستان کې ۱۰،۷۱۷ کسان مړه شوي خو تر څلورو لکو او نېږدې ۶۲ زرو زیات ترې بېرته رغېدلي هم دي.

په پاکستان کې د کورونا وایرس تر ټولو زیاتې پېښې په سېند صوبه کې مخې ته راغلې دي خو تر ټولو زیات کسان یې په پنجاب کې مړه کړي دي.

امریکا د خیبر پښتونخوا زندانونو محکمې ته د کورونا وبا مخنیوي توکي ورکړي

د پېښور زندان

په پاکستان کې امريکا سفارت د خيبر پښتونخوا جېل خانه جاتو محکمې ته د کورونا وايرس مخنيوي توکي ورکړي دي.

په اسلام اباد کې د امريکا سفارت د جنورۍ پر ۱۱مه نېټه بيان کې ويلي چې په سفارت کې په نړيواله کچه د نشيي توکو د مخنيوي او په دې اړه د قانون عملې کولو څانګې (ای اېن اېل) د ډېسېمبر له ۲۸ مې څخه د جنورۍ تر اوومې پورې تر نهه نيم لکه زيات سامانونه ورکړي دي چې په دې کې دستانې، د لاس وينځلو جراثيم وژونکې دوايي او صابونان شامل دي.

بیان وايي چې دا سامانونه د جېل په عمله او قيديانو کې وېشل شوي دي چې هدف يې په زندانونو کې د کورونا وايرس د خپرېدو مخنيوی دی.

امریکا حوثي یاغیان ترهګر ګرځوي

یمن کې حوثي یاغیان

امريکا به حوثي ياغيان د مرستندويه ډلو د اندېښنو سربېره هم يوه ترهګره ډله وګرځوي.

دا ډلې وايي چې دا ګام به په داسې حال کې جګړه ځپلي هېواد ته د بشري مرستو رسول اغېزمن کړي چې له نږدې يوې پراخې کاختۍ سره مخامخ دی.

د امريکا بهرنيو چارو وزير مايک پامپيو دا متوقع ګام د جنورۍ پر ۱۰مه اعلان کړ. نوموړي ويلي، حوثي ياغيانو داسې پوځي کمپاين کړی چې له کبله يې يو شمېر کسان وژل شوي، د سيمې بې ثباتی ته يې دوام ورکړی او يمينيان يې د خپل هېواد د شخړي له سوليزه حل څخه بې برخه کړي دي.

پامپيو په بیان کې ويلي، د ترهګر نومولو هدف دا دی چې له انصار الله سره د خپلو ترهګرو کړنو حساب وشي. د بيان په خبره، په دې کې د پولې هغې غاړې حملې شاملې دي چې ولسي ابادي، بنيادي ډانچه او د کاروباري مالونو لېږدول يې له ګواښ سره مخامخ کړي دي.

پامپیو په بيان کې د حوثي غورځنګ نوم کارولی دی. حوثي مشر علي الحوثي د جنورۍ پر ۱۱مه د امريکا دا ګام غندلی دی او ويلي دي چې ډله يې د بنديز د غبرګون حق که د تلونکې انتظاميې يا هرې يوې انتظاميې له خوا وي له ځان سره خوندي ساتي.

مرستندويه ډلو او ملګرو ملتونو خبرداری ورکړی چې پر حوثي غورځنګ د ترهګر ټاپه وهل به د بشري مرستو لېږد له خطره سره مخامخ کړي. د دوی په وينا، ۸۰ فيصده یعني ۲۴ مليونه کسان د ژوند کولو لپاره پر دې مرستو تکيه کوي او دا امريکايي ګام به له ياغيانو سره د دوی تماسونه محدود کړي.

نیمزوز کې نهه تنه پاکستانیان له نورو وسله والو سره وژل شوي: افغان ځواکونه

د افغانستان دفاع وزارت په نيمروز ولايت کې د نهه پاکستانيو په ګډون د ۱۴ وسله والو د وژلو ادعا کړې ده.

وزارت د جنورۍ پر ۱۱مه نېټه بيان کې ادعا کړې ده چې هوايي ځواکونو د جنورۍ پر نهمه نېټه د هاشرود ولسوالۍ منځرۍ سيمه کې د طالبانو يو پټنځای په نښه کړ.

د بيان په ادعا په بريد دې کې د پنځو پاکستانيو په شمول ۱۴ وسله وال وژل شوي او شپږ ټپيان شوي دي. خو طالبانو او نه هم خپلواکو سرچينو د دې ادعا تصديق کړی دی.

کراچۍ کې جعلي کرنل ګرفتار، یو بل جعلي برېګېډییر په تېښته دی

د پاکستان هوايي ځواک یو سرتېری په کراچۍ کې د هېواد د بنسټ ایښودونکي محمد علي جناح له مزار سره ولاړ دی - د ارشیف انځور.

د کراچۍ پولیس وايي، یو تن یې له خپل ساتونکی سره نيولی چې خپلځان يې د يوې امنيتي ادارې د کرنل په توګه خلکو ته ورپېژانده او پېسې يې ترې اخيستې.

د پولیسو په وینا، يو بل تن چې خپلځان يې د پوځ برېګيډيیر ښوده، په تېښته بريالی شوی دی.

د کراچۍ د ختیزې ضلعې د پوليسو مشر ساجد سدوزي د جنورۍ پر ۱۱مه مشال راډيو ته وويل چې د جنورۍ په نهمه یې غلام مصطفی، اسلم او معين علي نيولي دي او د يو بل تورن زين العابدين چې ځان ته برېګډيیر وايه، د نيولو کوښښونه روان دي.

د ده په خبره، له دې کسانو سره د استخباراتي ادارو کارډونه او مهرونه هم نيول شوي دي.

تېره مياشت په سوات کې هم دوه داسې کسان نيول شوي ول چې خپلځانونه یې د پوځ لوړپوړي چارواکي ښودل او له خلکو یې د تری تم کړو کسانو د موندلو په بهانه پیسې لوټلې.

د ضيا ودان مړی په خوست کې خاورو ته وسپارل شو

ضيا ودان د جنورۍ پر ۱۰مه په کابل کې ووژل شو.

د افغانستان د عامه ساتنې ملي تصدۍ وياند ضيا ودان مړی د جنورۍ پر ۱۰مه ناوخته په خپل پلرني ټاټوبي خوست کې خاورو ته وسپارل شو.

نوموړی د یکشنبې (اتوار) پر سهار په کابل کې د مقناطیسي بم په حمله کې وژل شوی وو.

ودان د څلورو لوڼو او يو درې مياشتني زوی پلار وو.

هغه پر ټولنيزو مطبوعاتو د طالبانو او داعش وسله والو ډلو پر ضد د خبرو لپاره پېژندل کېده.

خو تر اوسه یې د مرګ ذمه واري چا نه ده منلې.

د خوست مدني فعالانو، روڼ اندو او د وژل شوي مدني فعال او د عامه ساتنې تصدۍ ویاند ضیا ودان د کورنۍ غړو له افغان حکومت وغوښتل چې د ټولنې د مخکښو او فعالو کسانو د ژوند خوندیتوب ته پام ډېر کړي.

دوی وویل، دا ډول پېښې د حکومت او ولس تر منځ واټن پیدا کوي او د خلکو باور زیانمنېږي.

دوی یادې څرګندونې د جنورۍ پر ۱۰مه خوست ته د ملي پوځ په یوه الوتکه کې د ضیا ودان د جنازې رسېدو په ځای کې مشال راډیو ته وکړې.


افغان ولسمشر محمد اشرف غني په يوه خبرپاڼه کې پر ودان بريد غندلی او د پلټنو امر یې کړی دی.

پاکستان د افغان سکالرشېپونو ازموینې ځنډولې

پاکستان د ۲۰۲۱ز کال لپاره افغان زده کوونکو ته ۳،۰۰۰ بورسونه اعلان کړي.

د پاکستان حکومت د افغان زده کوونکو لپاره د کلنیو سکالرشېپونو د ازموینې نېټه ځنډولې.

د افغانستان لپاره د پاکستان ځانګړي استازي، محمد صادق د جنورۍ پر ۱۰مه پر ټوېټر ليکلي چې دا امتحانونه د جنورۍ له ۱۵مې څخه تر ۱۹مې کېدل خو اوس ښايي په فبرورۍ کې وشي چې وروسته به یې په اړه نور معلومات خپرېږي.

نوموړي د دې ځنډ لامل نه دی ښوولی.

د صادق په خبره، هر کال ورکول کېدونکي دې سکالرشېپ لپاره دا ځل ۲۲،۰۰۰ افغانانو غوښتنليکونه ورکړې دي.

د کابل یو زده کوونکی مطیع الله حکیمي چې د اسلام اباد په نړیوال اسلامک پوهنتون کې په څوارلسم کې په خپله خرڅه زده کړې کوي، وايي او اوس يې د شپاړسم لپاره دغه سکالرشېپ ته غوښتنلیک ورکړی دی او که یې وشو نو خپلې لوړې زده کړې به په ښه توګه ترسره کړي.

د نوموړي په وینا دا مهال مالي ستونزې لري.

د مېدان وردګو محمد بصیر کریمي بیا د اسلام اباد په بحریه پوهنتون کې پر سکالرشېپ دی. دی زیاتوی چې د بورس په دغه پیسو د خپلو زده کړو، استوګنې او د جیب خرڅه پوره کوي.

د پاکستان حکومت وخت په وخت افغان زده کونکیو ته د لوړو زده کړو لپاره بورسونه (سکالرشېپونه) ورکوي او سږ کال یې هم د ملک په بېلابېلو پوهنتونونو کې د افغان زده کوونکو لپاره ۳،۰۰۰ سکالرشېپونه اعلان کړي دي.

د امریکا استازو جرګې د ولسمشر ټرمپ مواخذې تیاری چټک کړی

دا په داسې حال کې ده چې د جنورۍ پر شپږمه د بلوه ګرو لخوا د کانګریس پر ودانۍ تر برید وروسته ټویټر د ولسمشر ټرمپ اکاونټ په مستقله توګه بند کړ.

د امريکا په کانګرس کې به ډموکراټان روانه اوونۍ هڅه کوي چې ولسمشر ډانلډ ټرمپ یا خو پر مرستيال ولسمشر او کابينې باندې په فشار اچولو چې د خپلو اييني واکونو په کارولو سره هغه له څوکۍ ليرې کړي يا بيا دا کار د مواخذې له لارې وکړي.

د استازو جرګې سپیکرې نېنسي پيلوسي دا اعلان د جنورۍ پر لسمه نېټه د پارلمان غړيو ته په يو ليک کې وکړ.

دا په داسې حال کې ده چې ولمسشر د خپلې مودې وروستيو ورځو کې د خپل هغه رول له کبله له زياتېدونکي فشار او يوازيتوب سره مخامخ دی چې يوه بلوه ګره ډله يې د کانګرس په ودانۍ بريد ته هڅولې وه.

نېنسي پیلوسي وويل چې د ډموکرټانو اکثريت لرونکۍ استازيو جرګه به د جنورۍ پر ۱۱مه نېټه يو پرېکړه ليک وړاندې کوي چې په مرستيال ولسمشر مايک پېنس غږ کوي چې د کابينې غونډه راوغواړي او دې ته يې وهڅوي چې د اساسي قانون ۲۵م ترميم عملي کړي چې ولسمشر د خپلو فرايضو ادا کولو صلاحيت نلري.

نوموړې زياته کړه، که مايک پينس په ۲۴ ساعتونو کې غبرګون ونه ښود نو ډموکراټان به د مواخذې قانوني مسوده پارلمان ته راوړي.

مېرمن پيلوسي وويل چې د امريکا د اساسي قانون او جمهوريت د خونديتابه لپاره دوی بايد په بیړنۍ توګه دا ګام واخلي، ځکه چې ولسمشر د دواړو لپاره متوقع ګواښ دی.

د انډونیزیا لوېدلې الوتکه وموندل شوه 

دا الوتکه د جنورۍ پر اتمه د  -کالي منتان - په نامه ښار ته روانه وه او د کارکوونکو په ګډون ۶۲ کسان کسان پکې سپاره وو.

د انډونیزيا د هوايي کمپنۍ - شري ویجایا اییر- په سمندر کې د مسافر وړونکې هغې الوتکې ملبه او انساني اعضاء موندلي چې د دې هېواد له پلازمېنې جکارتې تر پورته کېدو وروسته غورځېدلې وه.

دا الوتکه د جنورۍ پر اتمه د -کالي منتان - په نامه ښار ته روانه وه او د کارکوونکو په ګډون ۶۲ کسان کسان پکې سپاره وو.

د چارواکو په وینا، دا الوتکه تر پورته کېدو څلور منټه وروسته له رېډاره ورکه شوه.

د اواز په ذریعه د سګنلو ترلاسه کوونکې آلې له لارې انډونیزیايي چارواکو ته معلومه شوې چې دا الوتکه په جاوا سمندر کې ۲۵ میټره لاندې پرته ده.

له هغې وروسته د لټون او ژغورنې په عملیاتو کې د انساني بدن او الوتکې برخې ترلاسه شوې دي.

چارواکي دا مهال د الوتکې معلومات ریکارډ کوونکي تورې بکسې - بلېک باکس - په لټه کې دي او هیله لري چې دغه به د دې پېښې سبب معلومولو کې مرسته وکړي.

په انډونیزیا کې تر دې وړاندې په ۲۰۱۸ م کال کې د یوې بلې کمپنۍ (لاین اییر بوینګ) مسافر وړونکې الوتکه غورځېدلې وه چې د کارکوونکو په ګډون ۱۸۹ کسان پکې وژل شوي وو.

نور پورته کړئ

ځانګړې پاڼې

له موږ سره اړیکي

XS
SM
MD
LG