د لاسرسي ځای

تازه خبر

خبرونه

هېواد: جرمني غواړي د افغان سولې خبرو کوربه شي

د افغانستان بهرنيوو چارو وزارت وياند

د افغانستان بهرنیو چارو وزارت وايي جرمني غواړي چې د افغان حکومت او طالبانو ترمنځ د سولې خبرو کوربه شي.

د وزارت ویاند ګران هېواد پرون رسنیو ته وویل، د جرمني د بهرنیو چارو وزیر هایکو ماس د جولای پر ۱۵مه د افغانستان د بهرنیو چارو وزارت له سرپرست حنیف اتمر سره په ټېلېفوني خبرو کې وړاندیز وکړ چې که دواړه خواوې سلا شي نو برلېن د خبرو کوربه توب ته چمتو دی.

بلخوا په قطر کې د طالبانو سیاسي دفتر ویاند سهېل شاهین بد جولای په ۱۵مه مشال راډیو ته ويلي چې لومړنۍ خبرې به په دوحه کې کېږي او وروسته به د دواړو خواو په مشوره د خبرو ځای وټاکل شي.

شاوخوا دوه اوونۍ مخکې ولسمشر محمد اشرف غني هم ویلي ول چې زیات امکان دی چې له طالبانو سره لومړنۍ خبرې په قطر کې وشي.

د امریکا او طالبانو ترمنځ د فرورۍ پر ۲۹مه د سولې د موافقې لومړی پړاو روانه اونۍ بشپړ شو او له ژمنې سره سم، ۴۴۰۰ امریکايي سرتېري له افغانستانه ووتل. په دې خبرو کې یو شرط دا وو چې افغان حکومت به د طالبانو پينځه زره بنديان ورپريږدي او بيا به دا ډله بين الافغاني مذاکراتو ته حاضريږي. تر اوسه پورې د افغان چارواکو په وېنا ۴۵۰۰ طالب بنديان خوشي شوي دي.

د نننۍ ورځې ټول خبرونه وګورئ

اسلام اباد: د پولیو ضدکارکوونکيو احتجاج

اسلام اباد: د پولیو ضدکارکوونکيو احتجاج
تم شئ

هېڅ میډیايي سرچینه اوس نشته

0:00 0:01:32 0:00

له ټول پاکستانه اسلام اباد ته ورغليو د پولیو وایرس ضد کارکوونکيو احتجاج پېل کړی دی.

دوی وايي، د صحت نړیوالې ادارې د ګوزڼ ضد ۸۵۰ کارکوونکي له نوکریو لېرې کړي دي.

دا احتجاج چې د مارچ پر دويمه پېل شوی ګډونوال يې وايي، تر هغو به دوام لري تر څو د دغو کسانو نوکریانې نه وي بحال شوې.

په دې اړه يو احتجاج کوونکي عابد پرويز مشال راډیو ته وويل چې بغېر له څه وجې دوی بې روزګاره کړل شوي دي.

بلخوا د صحت نړیوالې ادارې چارواکيو احتجاج کوونکيو ته ویلي چې احتجاج دې ختم کړي او دوی به ورته نور روزګارونه برابر کړي خو احتجاج کوونکي ورسره دا خبره نه مني.

د صحت نړيوالې ادارې چارواکي وايي، دا کسان چې د يوې غېر دولتي ادارې په وسيله يې ورته روزګارونه ورکړي وو، له دوی سره يې شوي قراردادونه ختم شوي ځکه يې نوکريانې هم ختمې شوې دي.

ملګرو ملتونو مشر له یمن سره مالي مرستې ناکافي بللي

انتونیو ګوترېش ويلي، کمې مالي مرستې د یمن جنګ ځپليو سره د مرګ د سزا په معنا ده. ارشېف-انځور

ملګري ملتونه وايي، د نړيوالو مرستندويو له خوا د یو اشاريه اووه اربه ډالرو د بشري مرستو ژمنې به په جنګ ځپلي يمن کې د پراخې کچې کاختۍ مخه ونه نيسي.

د مارچ پر لومړۍ نېټه شوې انلاين غونډه کې د ملګرو ملتونو عمومي منشي انتونیو ګوترېش خواست وکړ چې سږ کال دې په يمن کې د پروګرامونو لپاره درې عشاريه ۸۵ اربه ډالره ورکړل شي . خو د مرستو دغه ژمنې له هغو کمې وې چې تېرکال ملګرو ملتونو ترلاسه کړې وې.

په يمن کې دا مهال د نړۍ ترټولو ناوړه بشري کړکېچ دی.ګوترېش له خبري غونډې وروسته وويل،

"په ميلينونه يمني ماشومان ښځې او سړي سختو مرستو ته اړتيا لري چې دارنګ دوی ژوند وکړي او له دوي سره په مرستو کې کمي د مرګ سزا په څېر ده"

ملګري ملتونه وايي، ۱۶ ميلينه يمنيان چې له نيمايې زياته ابادي جوړوي به له لوږې سره مخامخ شي. په دوی کې ۵۰ لکه خلک له کاختۍ ته نږدې شوي دي. په ۲۰۱۵ زکال کې په يمن کې کورونۍ چکړه پېل شوې وه چې پکې تراوسه پورې شاوخوا يو لاکه ۳۰ زره کسان وژل شوي او څه باندې ۳۰ لاکه بېکوره شوي دي. په دې هېواد کې ايران ملاتړي حوثي ياغيان چې سرښار ثنا او زياتره شمالي او غربي برخې په کنټرول کې لري د سعودي ملاتړي حکومت پرضد يې جګړه پېل کړې ده.

که شرطونه مې ومنل شي نوو ټاکنو ته تيار یم: ارمينايي وزیراعظم

وزیراعظم نېکول پاشینیان

د ارمینیا وزیراعظم نېکول پاشینیان د مارچ په لومړۍ نېټه ويلي، که مخالفين يې ځينې شرطونه ومني نو له وخت وړاندې پارلېماني ټاکنې کولو لپاره تيار دی.

ارمینیا چې سياسي کړکيچ پکې زيات دی، د پاشنيان او د مخالفينو ملاتړو يې په پلازمينه کې بېل بېل پراخ لاريونونه وکړل.

پاشینیان وروسته له هغه د روان سياسي کړکيچ سره مخ دی چې پوځ تيره اوونۍ د نوموړي د لرې کيدو غوښتنه وکړه، خو پاشنيان د پوځ دا غوښتنه د پوځي کودنا يوه هڅه بللې ده.

نوموړي خپلو زرګونو پلويانو ته چې د یاریوانز (Yerevan’s) سېنټرل رېپبلک سکواير کې راجمع شوي وو ته وويل، که پارلېماني اپوزيشن د وخت وړاندې ټاکنو لپاره تيار وي نو دوی هم تيار دي.

پاشینیان ، تير (۲۰۲۰) کال په ناګورونو قره باغ کې د اذربايجان او ارمينيايي ځواکونو ترمنځ د شپږ اونيو د شخړې وروسته، د پراخو احتجاجونو سره مخ دی او اپوزيشن ترې د استعفې ورکولو غوښتنه کوي.

د ګانا ولسمشر لومړی کس دی چې نړيوال کمپاين په لړ کې يې کورونا واکسين ورکړل شوي

تر دې دمه ۱.۴ میلياره ابادۍ په دغه هیواد کې ۳.۵۶ فيصده خلکو ته واکسين ورکړې شوي دي.

د ګانا ولسمشر لومړنی کس دی چې د کوواکس نړيوال کمپاين په ترڅ کې د کورونا واکسين ورکړل شو.

کوواکس چې د نړۍ له بې وزلو هېوادونو سره د واکسین په برخه کې د مرستې نړیوال پروګرام دی، اراده لري چې د روان کال تر پای پورې به لږ تر لږه دوه میليارده خلکو ته واکسين رسوي.

په ورته وخت کې په چين کې د روغتيا ماهرين وايي، پلان لري چې سږ کال تر جون مياشتې ۴۰ فيصده خلکو ته واکسين ولګوي.

تر دې دمه یو اشاریه څلور میلياره ابادۍ په دې هېواد کې ۳.۵۶ فيصده خلکو ته واکسين ورکړل شوي دي.

په امريکا کې له ۵۰ میليونه زياتو يا ۱۵ فيصده خلکو د کووېډ-۱۹ واکسينو لږ تر لږه يو خوراک ترلاسه کړی دی خو ۲۵ میليونه وګړو ته د واکسينو دوه خوراکه ورکړل شوي دي.

په برتانیا، امریکا او کاناډا کې د کووېډ-۱۹ واکسیني بهیر
تم شئ

هېڅ میډیايي سرچینه اوس نشته

0:00 0:01:54 0:00

د واکسین په برخه کې د پرمختګ خبرونه داسې مهال ورکول کېږي چې په بریتانیا کې د یوې څېړنې ښوولې چې د فایزر او استرا زینېک شرکتونو واکسینونه په هغو زړو خلکو کې ښه نتېجه ورکړې چې جدي ناروغۍ لري.

ایران پر اسراییلۍ کښتۍ برید کړی: نتنیاهو

نتنیاهو دا هم وویل چې ایران به کله هم اټومي وسلې ترلاسه نه کړای شي - د ارشیف انځور.

اسراییلي وزیراعظم بین یامین نتنیاهو پر ایران تور لګولی چې تېره اوونۍ یې په خلیج عمان کې د اسراییلو پر کښتۍ برید کړی وو.

نوموړي د مارچ پر لومړۍ د اسراییلو سرکاري راډیو ته وویل، دا کار بې له شکه ایران کړی وو او دا څرګنده ده.

ده زیاته کړه چې ایران د اسراییلو تر ټولو لوی دښمن دی او دی یې د مخنیوي لپاره هوډ لري.

بین یامین نتنیاهو تهران ته د غبرګون ښودلو په اړه د یو پوښتنې په ځواب کې ویلي چې دوی په ټوله سیمه کې ایران په نښه کوي.

وزیراعظم نتنیاهو ویلي چې ایران به کله هم اټومي وسلې ترلاسه نه کړي.

ده ویلي، ایران به نه په تړون او نه له تړونه پرته اټومي وسلې ترلاسه کړي او دا ما خپل دوست بایډن ته هم ویلي دي.

ایران د ۲۰۲۰ز په نومبر میاشت کې د خپل لوړپوړي اټومي ساینسپوه د وژنې تور پر اسراییل پورې کړی وو او د بدل اخیستلو هوډ یې کړی وو.

منظور پښتین او محسن داوړ دې مفروران وګرځول شي: کراچۍ پولیس

ښي لاس ته منظور پښتین، محسن داوړ او علي وزیر

د پښتون ژغورنې غورځنگ (پي ټي اېم) د مخکښ او قامي اسمبلۍ غړ‎ي علي وزیر په قضيه کې نن د مارچ پر لومړۍ نېټه پوليسو خپل چالان (رپورټ) د ترهګرۍ ضد عدالت ته وړاندې کړ.

د کراچۍ پوليسو په چالان کې د پي ټي اېم مشر منظور پښتين، محسن داوړ او نورو ملګرو د "مفرورانو" ګرځولو غوښتنه کړې.

عدالت د پوليسو دغه "چالان" منظور کړی او د پي ټي اېم مشر منظور پښتين، د قامي اسمبلۍ غړي محسن داوړ او نورو د نیولو وارنټ يې هم جاري کړ‎ی دی.

عدالت پوليسو ته امر کړي چې منظور پښتين، محسن داوړ او نور ملګري یې ونیسي او د روانې مياشتې پر نهم مارچ يي عدالت ته وړاندې کړي.

په مقدمه کې د پي ټي اېم د کراچۍ نورو پینځه غړي جاويد رحيم، طاهر، ابراهيم خان، نعمت الله او سرور هم نیول شوي دي.

منظور پښتین د اسد خان اڅکزي تر فاتحې وروسته صوبه بدر

منظور پښتین

د پښتون ژغورنې غورځنګ مشر منظور پښتین په چمن کې د اسد خان اڅکزي تر فاتحې وروسته له بلوچستان صوبې اېستل شوی دی.

ه منظور پښتین سره په دې سفر کې ملګري او د غورځنګ غړي بلال پښتون مشال راډیو ته وویل چې دوی له ډېره اسماعیل خان څخه د مارچ پر لومړۍ نېټه سهار اته بجې چمن ته ورسېدل.

ده وویل چې ځايي انتظامیې د فاتحې ځای ته ورپسې ورغلل او ورته ویل یې چې پر منظور پښتین بلوچستان ته پر ورتګ بندیز دی نو ځکه یې له صوبې باسي.

بلال پښتون وویل چې دوی د پولیسو او امنیتي چارواکو په بدرګه کې روان کړل شوي دي چې له صوبې و اېستل شي.

د بلوچستان حکومت د پښتون ژغورنې غورځنګ پر مشر منظور پښتین او ځیني نورو غړو بلوچستان ته پر ننوتو بندیز لګولی دی.

خو هغوی پر دې سربېره نن (د مارچ لومړۍ) د عوامي نیشنل ګوند د وژل شوي مخکښ اسد خان اڅکزي فاتحې ته په چمن کې د هغه کور ته ورغلي وو.

منظور پښتین د دې بندیزونو سره سره دوه واره مخکې هم بلوچستان صوبې ته ورغلی دی، لومړی وار د پښتون ژغورنې غورځنګ د یوه مخکښ ارمان لوڼي په جنازه کې د ګډون لپاره کلاسیف الله ته ولاړ او په دوهم ځل بیا په چمن کې د چمن-بولدک لارې بندېدو ضد احتجاج کې د ګډون لپاره تللی وو.

نن د پاکستان په لویو ښارونو کې ښوونځي خلاصېږي

پېښور کې نجونه ښوونځيو ته روانې دي

له حکومتي اعلان سره سم نن د پاکستان په ځینو لويو ښارونو کې تعليمي ادارې په مکمله توګه خلاصېږي.

حکومت د کورونا وبا مخنيوي په خاطر په هېواد کې ټولې ادارې تړلې وې خو تېره مياشت وفاقي او صوبايي حکومتونو په يوه غونډه کې د تعليمي ادارو د خلاصولو پرېکړه وکړه البته په کراچۍ، حېدر اباد، پېښور او لاهور کې يې په هفته کې درې ورځې د ادارو خلاصولو اجازه ورکړې وه. د فبرورۍ پر ۲۵مه نېټه د پاکستان د تعليم وزير شفقت محمود پر ټويټر پاڼه اعلان وکړ چې د مارچ له لومړۍ نېټې به په دغو ښارونو کې هم تعليمي ادارې په هفته کې پنځه ورځې خلاصوي.

د سيند د تعليم وزير سعيد غني د فبرورۍ پر ۲۸ مه نېټه په کراچۍ کې د خبري کانفرنس پر مهال ويلي، يوازې به ۵۰ فيصده زدکوونکيو ته تعليمي ادارو د ورتګ اجازه ورکوي.

چارواکي وايي، په پاکستان د کووډ-۱۹م ناروغانو شمېر مخ په کمېدو دی.

د صحت څانګې د مارچ پر لومړۍ نېټه پر ويبپاڼه تازه شمېرې ورکړې چې له مخې يې په دې هېواد کې په تېرو ۲۴ ساعتونو کې ۳۶ نور کسان له وبا مړه شوي، ۱۳۹۲ کسان په وايرس اخته شوي او هم په تېرو ۲۴ ساعتونو کې ۱۰۹۴ له ناروغی جوړ شوي هم دي.

سپریم کورټ وايي د سېنېټ انتخابات دې په پټو رایو وشي

پاکستان سپريم کورټ د سېنېټ په انتخاباتو کې په پټه د ووټونو ورکولو په حق کې رایه ورکړی دی.

د چيف جسټس ګلزار احمد په مشرۍ پینځو کسیزه جرګګۍ د مارچ پر لومړۍ نېټه د ولسمشر پر درخواست خپله رایه ورکړه او وېې ويل چې د ايين ۲۲۶مې مادې له مخې به د سېنېټ ټاکنې په پټه کېږي.

ولسمشر په خپل درخواست کې له سپريم کورټه غوښتي ول چې د ایین ۲۲۶مه ماده تشريح کړي.

دا ماده وايي چې ټاکنې به د پټو رايو له لارې کېږي خو د عمران خان په مشرۍ تحريک انصاف ګوند غوښتل چې د سېنېټ په راتلونکو ټاکنو کې رايې په ښکاره ورکړل شي.

سپريم کورټ د تېرې شنبې پر ورځ په دې اړه خپله فيصله خوندي کړې وه.

په پینځو کې څلورو ججانو د پټو رايو په حق کې فيصله ورکړې خو يوازې جسټس یحیا اپرېدي يې مخالفت کړی دی.

په پاکستان کې به د مارچ پر درېیمه نېټه د سېنېت ټاکنې کېږي.

د افغانستان د بشري حقونو خپلواک کمېشن وايي، طالب قومندان د وژلي خبریال درې خپلوان وژلي

د افغانستان د بشري حقونو خپلواک کمېشن د غور ولایت چارواکي 

د افغانستان د بشري حقونو خپلواک کمېشن ويلي چې د وسله والو طالبانو يو قوماندان په غور ولایت کې د وژلي خبریال د کورنۍ درې غړي وژلي دي.

خبريال بسم الله عادل ایماق، د غور په ولایت کې د شخصي راډيو مدیر وو چې د جنورۍ پر لومړۍ نيټه نامعلومو وسله والو وژلې وو.

وسله والو د فبرورۍ پر ۲۵مه له فيروز کوه ښاره بهر د خبريال ايماق د پلار پر کور بريد وکړ. د برید ترشا وجوهات معلوم نه دي.

د بشري حقونو خپلواک کمېشن د فبرورۍ پر ۲۸مه وویل چې د درې کسانو د وژنې ترڅنګ وسله والو طالبانو په برید کې څلور کسان زخميان کړي او د خبريال د کورنۍ درې نور غړي یې تښتولي دي.

کمېشن پر چارواکو غږ کړی چې د قضیه پلټنې دې وکړي. تر اوسه کومې ډلې د ایماق پر کورنۍ د برید ذمه واري نه ده منلې.

د طالبانو ویاند ذبیح الله مجاهد د فبرورۍ پر ۲۶مه په دې پېښه کې لاس لرل رد کړي.

په دې وروستیو میاشتو کې په افغانستان کې پر خبریالانو بریدونه ډیر شوي دي.

په افغانستان کې د خبريالانو سازمان (نی) په وینا په تېر ۲۰۲۰ز کال کې لږ تر لږه ۱۱ خبريالان وژل شوي دي. د افغانستان حکومت د دي ذمه پر طالبانو اچولې خو وسله واله ډله يې نه مني.

د بې پولې خبریالانو سازمان وايي چې اوس افغانستان د خبریالانو لپاره د نړۍ یو له خطرناکو ځایونو څخه دی.

په برما کې د پوځي کودتا ضد څلور مظاهره کوونکي وژل شوي 

برما چې د میانمار په نامه هم پیژندل کېږي، د فبرورۍ له لومړۍ نيټي راهیسې د ګډوډۍ ښکار دی.

په برما کې پولیسو د فبرورۍ پر ۲۸مه د پوځي کودتا پرضد لاریون کوونکو ډزې وکړې چې پکې لږ تر لږه څلور کسان وژل شوي او يو شمېر نور ژوبل دي.

پولیسو د ینګون په مرکزي ښار کې د ښوونکو احتجاج منتشرولو لپاره لاسي بمونو وکارول او هلته د يوې ښځې په اړه فکر کېږي چې د زړه دورې له وجې مړه شوې.

برما چې د میانمار په نامه هم پیژندل کېږي، د فبرورۍ له لومړۍ نيټي راهیسې د ګډوډۍ ښکار دی.

پر هغې ورځ پوځ واک ترلاسه کړ او د منتخبې مشرې انګ سان سوچي په ګډون د هغې د ګوند مشران يې ونيول.

پوځي چارواکو د تېر کال په نومبر کې په ټاکنو کې د درغلیو تورونه پوره کړي چې پکې د انګ سان سوچي ګوند پراخه بریا ترلاسه کړې وه.

پولیس د فبرورۍ پر ۲۸مه سهار وختي په يو شمېر ښارونو کې پر مظاهره کونکو د لاسي بمونو ، اوښکو بهونکی ګيس او هوايي ډزي کړي.

اسرایل وايي پر کښتۍ یې ښايي‌ایران برید کړی وي 

ګانټز د اسراییل کان ټیلي ویژن ته ویلي چې دا کښتۍ له ایران سره نیږدې وه او له دې ښکاري چې د برید ذمه واره ایران دی خو د دې خبرې تصدیق لا هم پاتې دی.

د اسراییل دفاع وزیر بیني ګانټز د فبرورۍ پر ۲۷مه ویلي، ښايي څو ورځې وړاندی په خلیج عمان کې د اسراییل په کښتۍ د برید ترشا ایران لاس لري.

د ایم وي هیلیوس ریۍ په نامه دا کښتۍ د سعودي عرب له دمام بندر څخه سینګاپور ته روانه وه چې پرې د فبرورۍ پر ۲۵مه برید وشو.

ګانټز د اسراییل کان ټیلي ویژن ته ویلي چې دا کښتۍ له ایران سره نیږدې وه او له دې ښکاري چې د برید ذمه واره ایران دی خو د دې خبرې تصدیق لا هم پاتې دی.

ایران پر اسراییل د خپل یو لوړ پوړي ساینسپوه د وژنې تور پورې کړی وو او ویلي ول چې د دې به بدله اخلي.

ګانټز زیاته کړه چې دا معلومه وه چې ایران د اسراییل انفراسټرکچر او د وګړيو په نښه کولو هڅې کوي

سعودي عرب وايي پر ریاض ښار یې د توغندي برید ناکامه کړی

د سعودي په مشرۍ ایتلاف ویلي چې حوثیانو د ریاض په لور بيلېسټک توغندي ويشتي او د جیزان صوبې اړخ ته يې يو شمېر ډرونونه استولي دي.

د سعودي عرب چارواکو د فبرورۍ پر ۲۷مه ویلي چې پوځ یې پر ریاض ښار د میزایل حمله ناکامه کړې ده.

د سعودي عرب چارواکو د دې حملې تور د یمن په حوثي یاغیانو پورې کړی دی.

د سعودي په مشرۍ ایتلاف ویلي چې حوثیانو د ریاض په لور بيلېسټک توغندي ويشتي او د جیزان صوبې اړخ ته يې يو شمېر ډرونونه استولي دي.

تراوسه حوثیانو په دې اړه څه نه دې ویلي او د مرګ ژوبلې یا زیانونو په اړه هم راپورونه مخې ته نه دې راغلي.

د سعودي عرب پر ټیلي ویژن او ټولنیزه میډیا په خپرو شوو ویډیوګانو کې د ریاض ښار په فضا کې چاودنې ښودل شوې دي.

شنونکو ويلي دي چې دا ښايي د امريکا جوړ دفاعي نظام توغندي وي چې هدف ته يې د مزايل رسيدو مخه نيوله.

بلخوا په ریاض کې د امریکا سفارتخانې امریکایانو ته د محتاطه اوسیدو خبرداری ورکړی دی.

د امریکا "استازو جرګې" د ولسمشر بایډن د کورونا وایرس د مرستو پروګرام منظور کړ

دې سېنېټ په امریکا کې د یو ساعت کار په بدل کې کم تر کم ۱۵ ډالره ورکول ټاکلي دي چې د پخوا په نسبت یې په دې پیسو کې دوه چنده اضافه کړې ده.

د امریکا استازو جرګې د ولسمشر جو بایډن د کورونا وایرس یو اعشاریه نهه ټریلیونه ډالرو د مرستو پروګرام منظور کړی دی.

د فبرورۍ پر ۲۷مه سهار وختي د بیل په حق کې ۲۱۹ رایې وکارول شوې خو هېڅ ریپبلکن استازي خپله رایه ونه کاروله. دا بیل به اوس د ډیموکریټ ګوند اکثریت لرونکي سېنېټ ته وړل کېږي.

جو بایډن په انتخاباتي کمپین کې د یو ساعت کار په بدل کې د څه د پاسه اوو ډالرو پر ځای د ۱۵ ډالره ورکولو ویلي ول. د بایډن د دې مرستو له لارې به زیاتره امریکایانو ته سړي سر ۱۴۰۰ ډالره ورکول کېږي او دغسې په اربونو ډالره به د واکسینو د رسايۍ زیاتولو، د سکولونو بیرته پرانیستو او د ولسي او ریاستي حکومتي ادارو د مرستو لپاره کارول کېږي.

د کورونا وایرس د مرستو پروګرام به د بې روزګاره کسانو د مراعاتو لړ کې او هغو خلکو سره هم مرسته وکړي چې د کورونو کرایې نه شي ورکولای.

ولسمشر بایډن وايي چې دا مرستې به د اقتصادي ستوزنو سره مخ امریکایانو سره کومک وکړي خو د ریپبلکن ګوند غړي وايي چې دا پلان له حده زیات دی او پکې هغه پالیسیانې موجودې دي چې له وبا سره تړلې نه دي.

سکر کې د تحریک طالبان پاکستان دوه غړي وژل شوي: کراچۍ پولیس

د پاکستان امنیتي چارواکي وايي، دې وسله والو د سند صوبې په حساسو ځایونو کې د بریدونو پلان درلوده. ارشیف- انځور 

د کراچۍ پولیس د فبرورۍ پر ۲۷مه په سکر کې د تحریک طالبان پاکستان ډلې د دوو وسله والو د وژلو ادعا کوي.

د سي ټي ډي پولیسو مشر مظهر شهواني لخوا په یوه خبرپاڼه کې ویل شوي چې دې وسله والو د سند صوبې په حساسو ځایونو کې د بریدونو پلان درلوده.

پاکستان ټوډې ورځپاڼې لیکلي، د تحریک طالبان پاکستان یا ټي ټي پي سره تړاو لرونکي دوه وسله وال ولایت خان او شاه محمود د پولیسو سره د ډزو پر مهال ژوبل شوي ول چې وروسته یې په روغتون کې د ژورو زخمونو له کبله ساه ورکړه. د سي ټي ډي پولیسو مشر مظهر شهواني ویلي چې ځانګړو پولیسو د یوې پټې اطلاع د ترلاسه کولو نه پس په سکر سیمه کې د تحریک طالبان پاکستان پر غړو چاپه وهلې وه. پولیسو د ډزو په تبادله کې خپلې غاړې ته د اوښتي ځاني زیان په اړه رسنیو ته څه نه دي ویلي.

بلخوا د پاکستان پوځ هم په جنوبي وزيرستان کې د وسله والو طالبانو د يوه مهم قومندان د وژلو ادعا کړې. د پوځ د عامه اړيکو څانګې د فبرورۍ پر ۲۶مه په يوه اعلاميه کې ويلي ول، نورستان چې په حسن بابا يې هم شهرت درلود، د جنوبي وزيرستان په تيارزه سيمه کې له امنيتي ځواکونو سره د دوه اړخيزو ډزو پر مهال ووژل شو.

اعلاميه زياتوي چې پوځ ته د تيارزه په ښاروانګې سيمه کې د نوموړي د موجودګۍ پټ خبر رسېدلی و. د اعلاميې له مخې، نورستان د سړک غاړې ماينونو جوړولو ماهر او له ۲۰۰۷ز کال راهيسې تر ۵۰ زياتو امنيتي سرتيرو په وژنه کې ککړ و.

تر اوسه وسله والو طالبانو د دې دواړو پېښو په اړه څه نه دې ويلي.

نایجیریا کې له یوه ښوونځي څخه ۳۱۷ نجونې لا درکه شوي

 پولیسو د فبرورۍ پر ۲۶مه ناوخته له سکول څخه د ۳۱۷ نجونو اغوا کېدل تایید کړل. ارشیف- انځور

د نایجیریا په شمال کې د فبرورۍ پر ۲۶مه پر یو سکول د ګڼو وسله والو تر حملې وروسته په سلکونو نجونې لا درکه شوې دي.

پولیسو د فبرورۍ پر ۲۶مه ناوخته له سکول څخه د ۳۱۷ نجونو اغوا کېدل تایید کړل. د زمفاره ایالت په سرکاري سیکنډري سکول کې دا پېښه، په نایجیریا کې په تېرو لسو ورځو کې دا د خپل نوعیت دوهمه پېښه ده چې مخې ته راځي.

یو پلار نصیرو عبدالاهي ایسوشيټیډ پریس ته ویلي چې د سکول د معلوماتو له مخې ۳۰۰ نجونې لادرکه دي. د عبدالاهي دوه لوڼې چې عمرونه یې لس او دیارلس کاله دي، په تښتول شوو کې شاملې دي.

د سیمې اوسېدونکي موسا مصطفا ویلي چې وسله والو په پوځي کیمپ او پوستې هم بریدونه کړي.

د اطلاعاتو ایالتي کمیشنر سلیمان توناو انکا ویلي چې وسله وال په ګاډو کې سکول ته ورغلي ول او ځینې نجونې یې په زوره له ځانه سره بېولې دي.د نوموړي په وینا امنیتي ځواکونه د پېښې پر پلټنه بوخت دي.

په شام کې د امریکا بریدونه د ایران لپاره خبرداری دی: بایډن

د امريکا ولسمشر جوبايډن

د امريکا ولسمشر جوبايډن وايي، په شام کې د ايران ملاتړې ملېشې پرضد بريدونو ته بايد تهران داسې وګوري چې دا د نورو څه قسمه جارحانه کارروايانو پرضد يو خبرداری دی.

د فبرورۍ پر ۲۶مه چې کله خبريالانو له جوبایډن پوښتنه وکړه چې په شام کې د امریکايي بریدونو اجازت ورکولو له لارې هغه څه پېغام لېږل غوښتل؟ نو امریکايي ولسمشر وویل: " تاسو له خپلو اعمالو مستثنا نه ياست."

نوموړي زياته کړه چې (محتاطه اوسئ). بايډن دا څرګندونې په طوفان ځپلي ايالت ټېکساس کې د امدادي هلو ځلو د جاج اخيستو پر مهال په هيوسټن کې وکړې.

د امريکا دفاع وزارت د فبرورۍ پر ۲۵مه هوايي بريدونه د هغو راکټي بريدونو په ځواب کې اعلان کړل چې د دې مياشتې په لومړيو کې پر هغه عراقي پوځي مرکز شوي ول چې امريکايي او ايتلافي ځواکونه پکې وو.

وزارت وايي، په داسې کولو سره يې يو واضح پيغام ورکړ چې ولسمشر بايډن به د امريکايي او ايتلافي اهلکارو د خونديتوب لپاره ګام اخلي.

د امريکا دفاع وزارت وايي، دوو اېف ۱۵ ای جنګي الوتکو يې د شام په مشرقي برخه کې پر هغو تنصيباتو اووه هدف ويشتونکې وسلې کارولي چې اورپکو کارول.

ګمان کېږي چې دا اورپکي پر امريکايي او نورو ځواکونو په بريدونو کې ککړ ول.

دفاع وزارت وايي، د بايډن لخوا د ولسمشرۍ څوکۍ تر سنبالولو وروسته د نوموړي انتظاميې لخوا په دې لومړي پوځي اقدام کې يې د عراق او شام پر سرحد د کنټرول پر نقطه يوشمېر هغه تنصيبات په نښه کړي دي چې يو شمېر ايران ملاتړو ملېشو کارول. په دې کې عراقي شيعه ډلې هم وې.

برما کې د کودتا ضد لاریونونه دوام لري

برما په تر ټولو لوی ښار ينګون کې امنيتي ځواکونو تر ۱۰۰۰ زياتو کودتا ضد مظاهرچيانو تيت و پرک کولو لپاره د خبردارۍ ډزې کړې دي.

دغه مظاهرچيان نن سهار د ينګون د يو مشهور سوداګريز مرکز مخ ته راغونډ شوي ول او د کودتا غندنه يې کول او پر ضد يې شعارونه ورکول.

پر دې مهال د امنيتي ځواکونو شمېر زيات و او ساحې ته يې اوبه شیندونکی توپ هم راوړی و.

کله چې شاوخوا ۵۰ بلوه ضد پوليس د مظاهرچيانو مخې ته راغلل نو د خبردارۍ ډزې واورېدل شوې او لږ تر لږه يو مظاهرچي ونيول شو. امنيتي ځواکونو مظاهرچيان تر پايه تعقيبول کله چې هغوی پر لوی سړک او نورو لارو روان ول.

بلخوا پرون د پوځ ملاتړ لرونکو پر کودتا ضد مظاهرچيانو د اوسپنې په راډونو او چاقووانو سره بريد وکړ او ډېری يې ژوبل کړل. د برما پوځ د روان ۲۰۲۱ز کال د فبرورۍ پر لومړۍ نېټه د انګ سان سوچي منتخب حکومت پر ضد کودتا وکړه او هغه يې ونيول. نوموړې له کودتا راهيسې نه ده ليدل شوې. نن د انګ شاوخوا ۵۰ پلويانو په ينګون کې د هغې د کور مخې ته عبادت وکړ.

لوېديځ هېوادونه دې د م م له قرارداد سره سم چلند وکړي: جواد ظریف

د ایران بهرینو چارو وزیر جواد ظریف.

له هغه وروسته چې امريکا د شام په ختيځ کې د ايران پلوه مليشو پر مرکزونو هوايي بریدونه وکړل، ايران پر لوېديځو هېوادونو غږ کړی چې د ملګرو ملتونو له قرارداد سره سم چلند وکړي.

د ايران د بهرنيو چارو وزير جواد ظريف نن(د فبرورۍ پر ۲۶مه) له خپل شامي سيال سره له هغه څو ساعته وروسته خبرې وکړې چې د امريکا دفاع وزارت اعلان وکړ چې دا هوايي بريدونه يې تېره مياشت په عراق کې د امريکا او ايتلافي ځواکونو پر اډه د راکټي حملو په غبرګون کې کړي دي.

د ايران يوې حکومتي وېبپاڼې ويلي چې د ايران او شام د بهرنيو چارو وزيرانو د ټېليفوني خبرو پرمهال ټينګار وکړ چې لوېديځ هېوادونه بايد د شام په اړه د ملګرو ملتونو پر قرادادونو عمل وکړي.

خو دا لا څرګنده نه ده چې دوی د ملګرو ملتونو د کوم قرارداد خبره کوي. د امريکا دفاع وزارت ويلي و چې دغه بریدونه يې د شام او عراق پر پوله د کنټرول پر نقطه پر هغو ګڼ شمېر تاسیساتو کړي چې د ایران پلوه ملیشه ډلو لخوا کارول کېدل.

په دې ډلو کې عراقي شيعه ډلې کتيب حزب الله او کتيب سید الشهدا هم شاملې دي. دا د امريکا د نوي ولسمشر جوبايډن د ادارې لخوا لومړی پوځي اقدام و.

جنوبي وزیرستان کې مو کمندان نورستان وژلی: د پوځ ادعا

پاکستان پوځ په جنوبي وزيرستان کې د وسله والو طالبانو د يوه مهم کومندان د وژلو ادعا کړې ده.

د پوځ د عامه اړيکو څانګې نن په يوه اعلاميه کې ويلي چې نورستان چې په حسن بابا يې هم شهرت درلود، د جنوبي وزيرستان په تيارزه سيمه کې له امنيتي ځواکونو سره د دوه اړخيزو ډزو پر مهال ووژل شو.

اعلاميه زياتوي چې پوځ ته د تيارزه په ښاروانګې سيمه کې د نوموړي د موجودګۍ پټ خبر رسېدلی و. د اعلاميې په وينا نورستان د سړک غاړې ماينونو جوړولو ماهر و او له ۲۰۰۷ز کال راهيسې تر ۵۰ زياتو امنيتي سرتيرو په وژنه کې ککړ و.

وسله والو طالبانو لا تر اوسه په دې اړه څه نه دې ويلي.

پرامنه افغانستان د پاکستان په ګټه دی: قریشي

عمر داودزی پاکستان ته څلور ورځې سفر. ۰۸/۰۱/۲۰۱۹

د پاکستان بهرنیو چارو وزیر شاه محمود قریشي ویلي دي چې باثباته او پرامنه افغانستان د پاکستان په ګټه دی.

د پاکستان سرکاري راډيو د فبرورۍ پر ۲۵مه خبر ورکړ چې د افغانستان ولسمشر ځانګړي استازي محمد عمر داودزي له بهرنيو چارو وزير سره په اسلام اباد وليدل.

د ملاقات پرمهال قریشي د دواړو هېوادونو ترمینځ د لوړې کچې سفرونو یادونه وکړه او هیله یې وښوده چې دا راشه درشه به د دوه اړخیزو همکاریو پیاوړتیا کې مرسته وکړي.

شاه محمود قریشي د افغانستان سولې پروسې سره د پاکستان پر دوامداره ملاتړ ټینګار وکړ.

هغه زیاته کړه چې وزیر اعظم عمران خان تل ټینګار کړی چې د افغانستان شخړې پوځي حل نه شته.

نوموړي هیله څرګنده کړه چې بين الافغاني خبرې اترې د یو خپلواک، سوله ایز او ثبات لرونکي افغانستان لپاره خپلو مطلوبو اهدافو ته ورسوي.

امریکا په شام کې پر ایران پلوه ملېشو هوایي بریدونه کړي

په اعلامیه کې ویل شوي چې دغه بریدونه د شام او عراق پر پوله د کنټرول پر نقطه په یو شمېر تاسیساتو شوي چې د ایران پلوه ملیشه ډلو لخوا کارول کیده. ارشیف- انځور

د امريکا دفاع وزارت پنټاګون ویلي دي چې د شام په ختیځ کې د عراق پر پوله د ایران پلوه ملېشو پر تاسیساتو يې هوايي بريدونه کړې دي.

د دفاع وزارت وویل چې د فبرورۍ ۲۵مې بریدونه د دې میاشتې په سر کې د امريکا او ایتلافي ځواکونو پر اډو د راکټي حملو په ځواب کې شوي.

پنټاګون وویل"عملیات یو څرګند پیغام استوي: ولسمشر جو بایډن به د امریکایي او ایتلافي ځواکونو ساتنه کوي."

په اعلامیه کې ویل شوي چې دغه بریدونه د شام او عراق پر پوله د کنټرول پر نقطه په یو شمېر تاسیساتو شوي چې د ایران پلوه ملیشه ډلو لخوا کارول کېده.

په دې کې عراقي شيیعه ډلې کتيب حزب الله او کتيب سید الشهدا هم شاملې دي.

د فبرورۍ پر ۱۵مه د عراق نیمه خودمختاره کردستان سیمې د پلازمینې اربیل نړیوال هوايي ډګر پر نظامي اډه د توغندیو بريد کې یو ملکي قراردادي وژل شوی وو او يو امريکايي ژوبل شوي وو.

يو ورځ وروسته د بغداد په شمال کې د امریکایي ځواکونو پر استوګنځي بريد کې يو ټېکېدار ژوبل شوی وو.

د دې اوونۍ په سر کې په بغداد کې د امريکا پر سفارت هم راکټي بريد شوي وو.

د پنجاب، ډسکه ضمني -ټاکنې کالعدم، پر ۱۸ مارچ بیا ټاکنې کېږي

د پاکستان انتخاباتي کمېشن د مارچ پر ۱۸مه د پنجاب په سیالکوټ کې د ډسکې پر حلقې د بیا انتخاباتو کولو اعلان کړی دی.

دا اعلان د انتخاباتي کمېشن مشر سکندر سلطان راجا په مشرۍ یوې پینځه کسیزه کمېټۍ نن په ضمني انتخاباتو کې د درغلۍ د تورونو په اړه د قضیې تر اورېدنې وروسته کړی.

د فبرورۍ پر ۱۹مه د پاکستان مسلم لیګ (ن) نوماندې نوشین افتخار د قامي اسمبلۍ د ۷۵مې حلقې په ضمني انتخاب کې د درغلۍ او د پریزایډینګ افسرانو ورکولو تور پورې کړی وو.

په عین وخت کې د واکمن تحریک انصاف نوماند علي اسجد د حلقې په ۲۰ انتخاباتي مرکزونو کې د بیا انتخاباتو غوښتنه کړې وه. انتخاباتي کمېشن وار له مخې د قامي اسمبلۍ د څوکۍ لپاره د انتخاباتو نتیجه ځنډولې وه.

د جرمني څارنوالانو پر خپل یوه وګړي د جاسوسۍ تورونه لګولي

د څارنوالانو په خبره، د روسي سفارت کارکوونکی "اصلاً د روسیې پوځي استخباراتو (جي ار یو) لپاره کار" کوي. ارشیف- انځور

پر دې سړي شک دی چې په برلېن کې یې د جرمني د پارلېمان ودانۍ نقشه روسیو استخباراتو ته ورکړې.

چارواکو د مشکوک کس نوم یوازې ینز اېف ښوولی او وايي چې هغه له یوه شرکت سره کار کاوه چې بونډسټاګ یا د جرمني ولسي جرګې ورسره په ودانۍ کې د برېښنايي الاتو د باقاعده معاینې قرارداد کړی وو.

څارنوالانو ویلي، ودانۍ ته د لاسرسۍ له وجې دې کس د پارلېمان نقشې غونډې کړې وې او د ۲۰۱۷ز کال په اوړي کې یې په برلېن کې د روسي سفارت یوه کارکوونکي ته ورکړې وې.

د څارنوالانو په خبره، د روسي سفارت کارکوونکی "اصلاً د روسیې پوځي استخباراتو (جي ار یو) لپاره کار" کوي.

د جرمني چارواکو په سمدستي ډول پر دې موضوع نور تفصیل نه دی ورکړی.

د ارمنیا پوځ پر وزیراعظم د استعفا ورکولو غږ کړی

وزیراعظم نېکول پاشینیان

د ارمنیا پوځ له وزیراعظم نېکول پاشینیان او د هغه له حکومته د استعفا ورکولو غوښتنه کړې، خو وزیراعظم دعوه کړې چې دا د پوځي کودتا هڅه ده.

د پوځ د مشر دفتر مطبوعاتي ویاند سموېل اساتریان نن(د فبرورۍ پر۲۵مه) په بیان کې ویلي چې دا غوښتنه یې د غیر معقولو دلایلو پر اساس د پوځ د مشر د لومړي مرستیال د ګوښه کولو پر ضد د کلک احتجاج په توګه کړې.

د پوځ بیان وايي،" حکومت دا کار د ارمنیا د ملي او دولتي ګټو ته له پام کولو پرته کړی. او په داسې سختو شرایطو کې دا ډول پرېکړه د دولت ضد ده او غیر مسوولانه اقدام دی."

پوځي بیان زیاتوي: "د ارمنیا جمهوریت وزیراعظم او حکومت به په دې مشکل وخت کې د ارمنيو وګړو لپار نور مناسبې فیصلې ونکړای شي."

تر اوسه دا روښانه نه ده چې ایا پوځ به د خپل بیان د ملاتړ لپاره ځواک وکاروي او که نه.

پاشینیان د دندې پرېښودو غوښتنه رد کړې او پر ځای یې د پوځ د مشر اونېک ګاسپریان د ګوښه کولو اعلان کړی.

نوموړي همدارز پر خپلو ملاتړیو غږ کړی چې د ارمنیا د پلازمېنې یرېوان مرکز ته ورغونډ شي.

نور پورته کړئ

ځانګړې پاڼې

له موږ سره اړیکي

XS
SM
MD
LG