د ايران سرښار تهران په یوه روغتیايي مرکز کې اورلګېدنې ۱۹ کسان وژلي او ۱۴ نور یې ټپیان کړي دي.
د ایران بیړنیو پېښو ادارې ویلي چې اورلګېدنه د جون پر ۳۰مه شپه شاوخوا نهه بجې د تهران په سینا اطهر روغتیايي مرکز کې رامنځ ته شوه.
چارواکو ویلي چې اور لګېدنې لامل د اکسیجن د درو ډبو چاودل و.
د راپورونو پر اساس په وژل شويو کې ۱۵ ښځې او څلور نارینه دي.
د پېښې ډېر زیان عملیات خونه کې ډاکترانو او ناروغانو ته رسېدلی. اور د اور وژونکو له خوا په دوو ساعتونو کې مړ شو او په همدې موده کې شاوخوا ۲۰ کسان د دغه روغتیايي مرکز له ودانۍ وژغورل شول.
