د پکتیا په ډنډپټان ولسوالۍ کې یو ځل بیا د منګلو او خروټو قبیلو ترمنځ د ځمکې او غره په سر جګړه شوې چې له دواړو خواوو ۷ کسان پکې وژل شوي دي.
چارواکي وايي په سربدالي سیمه کې د دې جګړې د پای ته رسولو لپاره یې مداخله کړې ده.
د پکتیا سرپرست والي عبدالولي سهي د یادو قبیلو ترمنځ د نښتو پخلی کړی دی.
د منګلو او خروټو قبیلو ترمنځ پخوا تر دې هم جګړې شوي او په تېرو دوو کالونو کې په دې جګړو کې دواړو خواوو ته درانه تلفات اوښتي دي.
