د ایران ولسمشر حسن روحاني ویلي چې د مې له څلورمې څخه په هغو سیمو کې جوماتونه یو وارې بیا پرانیزي چې پکې د کورونا وایرس خطر کم شوی دی.
په ایران کې، د مارچ په لومړیو کې چې کورونا وایرس زیات کسان وځپل، جوماتونه وتړل شول.
حسن روحاني د مې پر درېیمه پر دولتي ټېلېوېژن د خبرو پر مهال وویل، د ملک له درو څخه په یوه برخه کې د مې له څلورمې جوماتونه پرانېستل شي.
روحاني وايي، خلکو ته په جوماتونو کې د لمونځ کولو یوازې سپارښتنه شوې نور هغوی ته په کار دي چې د عبادت پر مهال ټولنیز واټن او نور حفاظتي اقدامات په پام کې ونیسي.
نوموړي ویلي، د مې له ۱۶مې د سکولونو بیا پرانیستل هم په پام کې نیول شوي چې د اوړي تر رخصتیو (چوټیو) مخکې لږ تر لږه د یوې میاشتې لپاره زده کوونکي ښوونځيو ته ورشي.
په ایران کې د کورونا وایرس ناروغۍ تر ۶،۱۵۰ زیات کسان وژلي او تر ۹۶،۰۰۰ زیات یې ناروغه کړي.
