په کابل کې په ځانمرګي بريد کې لږ تر لږه درې کسان وژل شوي او ۱۵ نور ټپیان شوي دي.
د افغانستان کورنیو چارو وزارت ویاند طارق ارین وايي، برید نن سهار اته بجې د چهاراسیاب ولسوالۍ په ریشخور سیمه کې شوی دی.
د نوموړي په خبره ځانمرګي بریدګر د ولسي وګړو په منځ کې خپلځان الوزولی دی.
د افغانستان کورنیو چارو وزارت که څه هم د دغې حملې د هدف په اړه څه نه وايي، خو زیاتوي چې د دغې حملې ټول وژل شوي او ټپیان ولسي وګړي دي.
د کابل چهاراسیاب ولسوالۍ ریشخور سیمه کې د افغانستان ملي اردو د ځانګړو عملیاتو قومانداني هم موقعیت لري.
تر اوسه د دغې حملې مسولیت چا نه دی منلی.