د لاسرسي ځای

تازه خبر

خبرونه

د پاکستان ولسمشر چين ته تللی

عارف علوي

د پاکستان ولسمشر عارف علوي له نن څخه د چین دوه ورځنی سفر پېل کړ.

د نوموړي له دفتره پرون خپور شوي بیان کې راغلي چې ولسمشر علوي به په دې سفر کې د خپل چینايي سیال شي جین پینګ او له نورو اعلا چارواکو سره لیده کاته کوي.

د بیان ترمخه د دې سفر مقصد د چین او پاکستان ترمنځ تاریخي تعلقات لا نور مضبوطول دي ځکه چې دواړه هېوادونه نيزدې دوستان او کلک ملګري دي.

ولسمشر علوي د چین دا سفر په داسې وخت کوي چې دغه هېواد د کرونا وایرس د مخنیوي لپاره په هڅو بوخت دی. یاد وایرس د چین له ووهان ښار څخه شروع شوی چې تر اوسه د نړۍ ۱۵۷ هېوادونو ته رسېدلی دی.

چین ته د ولسمشر عارف علوي دا اولنی رسمي سفر دی، بیجنګ د پاکستان سټرېټیجیک همکار او د دې هېواد په اقتصاد کې یو لويي پانګه وال دی.

بیجنګ د یو کړۍ او یو سړک منصوبې لاندې د چین پاکستان اقتصادي راهدارۍ په منصوبه کې د لسګونو ملینونو پانګونې ژمنه کړې ده.

د نننۍ ورځې ټول خبرونه وګورئ

محسن داوړ یو وار بیا د کوټې په هوايي ډګر درول شوی

محسن داوړ

د پاکستان د قامي اسمبلۍ غړی او د پښتون ژغورنې غورځنګ یو مشر محسن داوړ د بلوچستان چارواکو له هوايي ډګره بیرته ګرځولی دی.


د بلوچستان نیشنل پارټۍ مشر اختر مېنګل پر دې کار د خپګان شریکولو سره په ټویټر لیکلي چې محسن دواړ له ایرپورټه د وتلو لپاره درول شوی او له مېلمنو سره داسې چلند باید ونشي. نوموړي لیکلي، د دې پېښې غندنه کوي او هیله ده چې حکومت به محسن داوړ ته په جلسه کې د برخې اخیستو اجازه ورکړي.


محسن داوړ د سېپټمبر پر څلورمه نېټه هم د بلوچستان د یو شمېر ضلعو د دورې کولو لپاره د کوټې هوايي ډګر ته له رسېدو وروسته نیول شوی و خو چارواکو د هغه نیونه رد کړې وه او ویلي یې ول چې داوړ یې د امنیتي ګواښونو له وجې له ایرپورټه بهر نه وو پرېښی.

ویل کېږي چې محسن داوړ په کوټه کې د اپوزیشن ۱۱ ګوندونو اتحاد پي ډي ایم د اکتوبر پر ۲۵مې غونډه کې د ګډون لپاره روان و. بلخوا د بلوچستان حکومت وايي، د امنیتي ګواښونو له وجې باید پي ډي ایم دا غونډه وځنډوي.

عمران خان له افغان پارلیماني پلاوي سره وکتل

د ارشیف انځور

د پاکستان وزیراعظم عمران خان ویلي چې هیواد یې له افغانستان سره په ټولو برخو کې د ورورولۍ اړیکې پیاوړې کول غواړي.

د پاکستان سرکاري راډیو د خبر له مخې د افغانستان د ولسي جرګې سپیکر رحمان رحماني او ۱۷ کسیزه پارلیماني وفد د اکتوبر پر ۲۳مه له وزیراعظم عمران خان سره و لیدل. په دغه موقع عمران خان وویل چې د افغانستان شخړه هېڅ پوځي حل نه لري. عمران خان د سیاسي جوړجاړۍ په ضرورت ټینګار وکړ او په افغانستان کې د سولې او ثبات لپاره د خپل هیواد د دوامدار ملاتړ خبره یې تکراره کړه.

د پاکستان وزیراعظم وویل، په افغانستان کې امن د دواړو هیوادونو لپاره ښه دی دی او زیاته یې کړه چې په تجارت کې همکاري دواړو ته ګټه رسولی شي.

افغان پلاوی چې د پاکستان د قامي اسمبلۍ د سپیکر اسد قیصر په بلنه اسلام اباد کې دی، په خپل شپږ ورځني سفر کې به د اکتوبر پر ۲۶ مه او ۲۷مه د دواړو هیوادونو د سوداګرو په یوه غونډه کې هم ګډون کوي.

افغانستان او پاکستان لا هم له پولیو سره لاس او ګرېوان دي

PAKISTAN-HEALTH-POLIO

د اکتوبر ۲۴مه، د پوليو يا ګوزڼ ناورغۍ مخنيوي نړيواله ورځ لمانځل کېږي. سږ کال د دې ورځې شعار "يوه ورځ، يو کار- د پوليو له منځه وړل" دی.


په نړۍ کې يوازې پاکستان او افغانستان هغه هیوادونو دي چې اوس هم پکې د پولیو ناروغي موجوده ده.

پنجاب حکومت د اکتوبر پر ۲۶مه د پوليو ضد شپږ ورځنی کمپاين پيلوي. د پاکستان سرکاري راډيو ترمخه په دې مهم کې به له پنځو کلونو کم عمر ماشومانو ته د پوليو ضد څاڅکي ورکول کېږي.

په پاکستان کې د پولیو مخنیوي ادارې شمېرې ښيي چې په ۲۰۱۹ م کې په دغه هیواد کې ۱۴۷ ماشومان ګوزڼ وهلي وو خو د روان کال د اکتوبر تر ۲۳مې دغه شمېر ۷۹ دی.

بلخوا په افغانستان کې د پولیو د له منځه وړلو د ملي پروګرام د عامه پوهاوي مشر میرجان راسخ مشال راډیو ته تایید کړه چې په هغه هیواد کې د ګوزڼ مثبتې پېښې زیاتې شوې دي.

اروپا کې د کرونا وبا دوهمې څپې ګڼ خلک نیولي

چېک کې روغتیاپالان د کرونا وایرس وهلي یوه ناروغ د درملنې پر مهال

په اروپا کې د کرونا وایرس دوهمه څپه زښته په چټکۍ خورېږي او په تېرو ۱۰ ورځو کې نوې پېښې څه باندې دوه برابره شوې دي.

روېټرز ویلي، په پنجشنبه په ټوله اروپا کې د لومړي ځل لپاره په ورځنۍ کچه د کرونا څه باندې دوه لکه پېښې ثبت شوي چې له دې سره په ټوله اروپا کې روغتونونه هم تر فشار لاندې راغلي دي.

په دغه لویه وچه کې تر ټولو زیاتې پېښې په چېک جمهوریت کې شوې دي او حکومت ‌یې هغه پلان تایید کړی چې له ناټو او اروپایي ټولنې دې ۳۰۰ پوځي روغتیایي کارکوونکي د ناروغانو درملنه کې مرسته وکړي.

بلجیم او یو شمېر نورو هېوادونو کې روغتونونه هغه ناروغان نه ‌مني چې سخت ناروغه نه وي.

د پولېنډ په وارسا ښار کې حکومت یو ملي لوبغالی په ګرځنده روغتون اړوي چې د ۵۰۰ ناروغانو درملنه به پ‌کې کېږي.

په فرانسه کې د روغتونونو ۴۴ په سلو کې بسترونه د 'کووېډ-۱۹' په ناروغانو ډک شوي دي.

تخار کې د ۱۲ ماشومانو د وژل کېدو د ادعا خپروونکي ته د صالح خبرداری

د افغانستان ولسمشر لومړی مرستیال امرالله صالح

د افغان ولسمشر لومړی مرستیال وايي، له هغو کسانو سره به قانوني چلند وشي چې په تخار کې د افغان ځواکونو په هوايي عملیاتو کې د ۱۲ ماشومانو وژل کېدو ادعاوې یې خپرې کړې دي.

د تخار د والي ویاند محمد جواد هجري ازادي راډیو ته وویل، د چهارشنبې په ورځ د مرکز تالقان په هزار لق سیمه کې پر یوه جومات د هوايي حملې په نتیجه کې ۱۲ ماشومان وژل شوي او ۱۴ نور ټپیان دي.

خو د ولسمشر لومړي مرستیال امرالله صالح پر فېس‌بوک په یو بیان کې لیکلي، دی باوري اسناد لري چې دا ادعا ناسمه ده.

د ولسمشر ویاند صدیق صدیقي هم په پنجشنبه ازادي راډیو په یوه بحث کې په دې اړه سپیناوی وکړ: "د ولسمشر لومړي مرستیال ویلي چې دا خبره دروغ ده او طالبان هره ورځ دروغ وايي، دوی د خلکو په کورونو کې پټېږي، له جومات څخه ‌یې قرارګاه جوړه کړې. په کوم هېواد کې تاسو لیدلي چې په جومات کې پوځي قرارګاه وي، خو طالبانو په هر جومات کې پوځي قرارګاه جوړه کړې."

ښاغلي صالح په خپل بیان کې د چا نوم نه‌دی یاد کړی، خو ویلي یې دي، له هغو کسانو سره به قانوني چلند وشي چې له اوازو څخه‌یې سرخطونه جوړ کړي.

په کابل کې د ملګرو ملتونو مرستندوی دفتر یا یوناما او د افغانستان د بشري حقونو خپلواک کمېسیون پر ټویټر په جلا بیانونو کې ویلي دي چې د دې ادعاوو په اړه‌یې پلټنې پیل کړې دي.

د ټرمپ او اوباما د امریکا انتخاباتي کمپېن کې یوبل ته سختې خبرې

د امریکا ولسمشر ډونالډ ټرمپ له پخواني امریکايي ولسمشر بارک اوباما سره خبرې کوي.

د امریکا ولسمشر ډانلډ ټرمپ او پخواني امریکایي ولسمشر باراک اوباما په خپلو انتخاباتي غونډو کې یو بل ته سختې خبرې کړې دي.

اوباما په لومړي ځل د خپل پخواني مرستیال ولسمشر جوبایډن لپاره د ګاډو-کاروان په یو انتخاباتي غونډه کې ګډون وکړ او پر ولسمشر ټرمپ یې سخت تنقید وکړ. د اکتوبر پر ۲۱ په فېلا ډېلفیا کې خلکو ته په خپله وینا کې اوباما د کورونا وایرس د وبایي صورتحال پر کنټرولو، خراب اقتصادي حالت او د صحت پالیسیو پر سر پر ولسمشر ټرمپ تنقید وکړ.

پخواني ولسمشر اوباما دا هم وویل چې ولسمشر ټرمپ د خپل کار جدي اخېستو صلاحیت نه لري.

بلخوا د شمالي کېرولاینا په ګېسټونیا کې ولسمشر ټرمپ په اوباما پسخند وواهه چې د ۲۰۱۶م کال د انتخاباتو نتیجو په اړه یې غلطه وړاندوینه کړې وه.

د امریکا انتخاباتو ته اوس تر دوو اونیو لږ وخت پاته دی. د امریکایي ادارې رییل کلییر پولېټکس د نظرپوښتنې ترمخه دا وخت جوباییډن له ولسمشر ټرمپه ۸.۶ فیصده نکتې مخکې دی.

نن برسلز کې د ناټو دفاع وزیرانو ۲ ورځنۍ غونډه پیلېږي

د ناټو یو شمېر دفاع وزیران

نن د بېلجیم په پلازمېنه برسلز کې د ناټو د دفاع وزیرانو دوه ورځنۍ غونډه پیلېږي.

په دې غونډه کې به د نورو موضوعاتو ترڅنګ په افغانستان کې د ناټو پر پوځي شتون خبرې وشي.

په ناټو کې د امریکا سفیرې کي بیلي هاتچیسن د اکتوبر پر ۲۲مه (پرون) د ناټو غونډې په درشل کې وویل: "څه چې له افغانستان سره ارتباط لري، موږ له خپلو متحدانو سره ورباندې سلا مشوره کړې، دا تېره اوونۍ په افغانستان کې زموږ د ځواکونو قوماندان د ناټو ۳۰ سفیرانو ته زموږ د پخوانیو خبرو په اړه چې ځواکونه به کموو، معلومات ورکړل."

په افغانستان کې د ناټو په مشرۍ د غوڅ ملاتړ ماموریت په چوکاټ کې د ۳۸ هېوادونو شاوخوا ۱۲،۰۰۰ سرتېري پراته دي.

کورونا وایرس د امریکا نېږدې درېو برخو ته په خپرېدو دی

نیویارک کې روغتیايي کارکوونکي

کورونا وایرس د امریکا نېږدې درېو برخو ته د خپرېدو په حال کې دی او په اروپا کې یې ډېرې خپرېدا حکومتونه اړ کړي چې نوي بندیزونه ولګوي او د نورو سختو هغو خبرداری ورکړي.

د امریکا په لوېدیځه او منځنۍ برخه کې یې چې د کورونا وایرس په چټکۍ د خپرېدو په حال کې دی، په شپږو ایالتونو کې یې تر ټولو زیاتې نوې پېښې ثبت شوې دي.

په امریکا کې په وروستۍ یوه اوونۍ کې د دغه وایرس له ا مله د مړو شمېر د ورځې په متوسط ډول ۷۵۷ تنو ته رسېږي. له دې سره په ټوله امریکا کې د مړو شمېر۲۲۲،۰۰۰ ته رسېدلی دی.

په اروپا کې د دغه وایرس د نوې څپې د لاخپرېدو د مخنیوي د هڅو په ترڅ کې پولینډ او پرتګال نوي بندیزونه لګولي او خبرداری یې ورکړی چې نور به هم ولګوي.

په هغو هېوادونو کې د ماسک (تمبوزک) کارول ضروري شوي، غونډې محدودې شوي، بارونه (میخانې) او رستورانونه بند شوي، او تقریباً بیا د پوره ټولبند یو حالت پیدا شوی دی.

قرغیزستان کې د بیاځلې پارلېماني انتخابانو نېټه اعلان شوه

د خلکو تر پراخو مظاهرو وروسته د قرغیزستان حکومت ړنګ شو (د ۲۰۲۰ز د اکتوبر پېنځمې انځور.)

د قرغیزستان د ټاکنو کمېسیون د پارلېماني ټاکنو لپاره د ډېسېمبر ۲۰مه نېټه وټاکله.

دا اقدام په داسې حال کې کېږي چې دغه هېواد کې د اکتوبر د څلورمې تر پارلېماني ټاکنو وروسته مظاهرو د قرغیزستان حکومت ړنګ کړ.

د قرغیزستان ولسمشر سورونبای جېنبېګوف د مظاهره کوونکو تر غوښتنو وروسته له دندې استعفا وکړه.

تر دې استعفا وروسته صادر جپاروف د لنډمهالي وزیراعظم په توګه وټاکل شو.

د قرغیزستان له اساسي قانون سره سم، جپاروف نه شي کولای ځان انتخاباتو ته نوماند کړي.

پاکستان کې د کورونا وایرس ۶۶۰ تازه پېښې ثبت شوي

حکومت خلکو ته سپارښتنه کړې چې د تمبوزک وهلو په ګډون د وایرس مخنیوي ټول احتیاطي تدابیر عملي کړي.

په پاکستان کې په تېرو ۲۴ ساعتونو کې د کورونا وایرس ۶۶۰ مثبې پېښې ثبت شوې دي.

د کووېډ-۱۹ په اړه د پاکستان حکومتي ووبپاڼې د اکتوبر پر ۲۱مه وویلي، ناروغۍ په ۲۴ ساعتونو کې ۱۹ کسان وژلي دي.

له ووبپاڼې سره سم، په هغه هېواد کې د اکتوبر تر ۲۱مې د کورونا وایرس مثبتو پېښو رسمي شمېر ۳۲۴،۷۴۴ ته ورسېد.

خو په پاکستان کې له کووېډ-۱۹ ناروغۍ ۳۰۹،۰۰۰ کسان رغېدلي هم دي.

دا مهال په هېواد کې د ناروغانو شمېر تر ۹،۳۰۰ زیات دی.

د پاکستان حکومت د اکتوبر پر ۲۰مه د هېواد صوبې انتظامي چارواکو ته سپارښتنه کړې چې د وایرس مخنیوي احتیاطي تدابیر عملي کړي.

حکومت په تېرو اوونیو کې په بیا بیا اندېښنه ښوولې چې که خلک احتیاط ونکړي، د کورونا وایرس پېښې لا زیاتېدای شي.

د فرانسې ولسمشر له عراقي وزیر اعظم سره د ترهګرۍ ضد مبارزه پر ارزښت غږېدلی

د فرانس ولسمشر ایمانيول مېکرون او د عراق وزيراعظم مصطفی الکاظمي

د فرانس ولسمشر ایمانيول مېکرون او د عراق وزيراعظم مصطفی الکاظمي د ترهګرۍ پر وړاندې د مبارزې پر ارزښت خبرې کړې دي.

د اکتوبر پر ۲۰مه د مېکرون له دفترخپره شوې خبرپاڼه وايي،دواړو مشرانو د اکتوبر پر ۱۹مه په پېريس کې له يو بل سره وکتل.

مېکرون په سېپټېمبر میاشت عراق ته د سفر پر مهال د دې هیواد د خپلواکۍ ملاتړ کړی و او ویلي یې ول چې د اسلامي دولت ډلې وسله وال او د عراق په چارو کې د بهرنیانو مداخله مهم چېلنجونه دي چې بغداد ورسره مخامخ دی.

په خبرپاڼه کې دا ډول ویل شوي چې دواړو مشرانو د یوه فرانسوي شرکت د هغه پلان ستاینه وکړه چې په بغداد کې د مېټرو جوړولو لپاره یې وړاندې کړې ده.

الکاظمي د روان کال په مې میاشت کې د وزيراعظم په توګه دنده پیل کړه. د هغه حکومت ژمنه کړې چې هغه وسله والې ډلې به وځپي چې د عراق د بې ثباته کولو هڅې کوي.

افغان ولسمشر ولسي جرګې ته نوې کابینه ورپېژندله

د افغانستان ولسي جرګه

د اکتوبر پر ۲۱مه نېټه (نن) د افغانستان ګډ حکومت ټول نوماند وزیران او د دوو ادارو رییسان د باور رایې اخیستو لپاره ولسي جرګې ته وروپېژندل شول.

ولسمشر اشرف غني د کابینې ټول ۲۶ غړي او د دوو ادارو ریسان دې جرګې ته وروپېژندل.

اشرف غني د مارچ په نهمه د ولسمشر په توګه د لوړې په مراسمو کې ژمنه کړې وه چې په دوو اوونیو کې به خپله کابینه ولسي جرګې ته د باور رایې اخیستو لپاره وروپېژني، خو له هغه وخته څه باندې اووه میاشتې تېرې شوې دي.

د ولسي جرګې منشي اسدالله شهباز مشال راډیو ته وویل، د جرګې پنځه کمېسیونونه به د دغو نوماندانو اسناد څېړي او وروسته به ‌یې اداري پلاوي ته سپاري.

په ولسي جرګه کې نوماند وزیرانو ته د باور رایو پخوانیو بهیرونو ته په پام داسې نه‌ ښکاري چې دغه پروسه به له ستونزو خالي وي.

جماعت اسلامي د حکومت پر ضد احتجاج پېلوي

د جماعت اسلامي مشر، سراج الحق

د جماعت اسلامي مشر سینیټر سراج ا لحق وايي ګوند به يي له نومبر مياشتې حکومت خلاف تحریک پېلوي.

نوموړي د اکتوبر په ۲۰مه له مشال رېډیو سره په ځانګړو خبرو کې وویل د وزیراعظم عمران خان په حکومت کې ګراني او بېروزګاري زیاته شوې چې له وجې یې عام خلک له مشکلاتو سره مخ دي. سراج الحق زیاته کړه چې د حکومت ضد اولنۍ جلسه به په باجوړ ضلع کې کوي.

نوموړي وویل د اپوزیشن ګوندونو په اتحاد یا پاکستان جمهوري تحریک کې ځکه نه شامېلېږي چې د ده په وینا په دې کې شاملو ګوندونو، مسلم لګ نواز او پیپلز پارټۍ په تیرو دوو کلونو کې د تحریک انصاف د حکومت ملاتړ کړی دی.

دا په داسې حال کې چې پاکستان جمهوري تحریک یا پي ډي ایم د وزیراعظم عمران خان حکومت نسکورولو لپاره د اکتوبر له ۱۶ مې احتجاجي جلسې شروع کړي دي او تر اوسه یې په ګجرانواله او کراچۍ کې جلسې کړي دي

ملګري ملتونو پر اذربايجان او ارمينيا د اوربند ساتلو غږ کړی

د اذربايجان او ارمينيا ترمنځ په نورګونو قره باغ کې د سپتمبر له ۲۷مې جګړه پېل شوې

د ملګرو ملتونو امنیتي کونسل په ارمینیا او اذربایجان غږ کړی چې د نوي اوربند احترام دې وکړي. یادې ادارې دا بیان پرون، د لانجمنې سیمې ناګورنو ـ کاراباغ د وضعیت په اړه د مشاورت د پای ته رسېدو نه پس خپور کړی دی.

د کونسل ۱۵ غړو، د ملګرو ملتونو د مشر انتونیو ګوتیریس هغه غوښتنه هم یو وار بیا تکرار کړه چې پر دواړو خواوو یې غږ کړی و چې د اکتوبر په ۱۷مه د اعلان شوي تړون احترام دې وکړي.

د سپټمبر له ۲۷مې نېټې راهېسې چې په یاده سیمه کې سخته جګړه پیل شوې، دا دوهم ځل دی چې د اوربند هڅه پکې کېږي. دوهم اوربند هم له خطر سره مخامخ دی او پرون په سیمه کې ډزې شوې. ارماني نژاده ځواکونه او ازربایجان پر یو بل تور پورې کوي چې ډزې مقابل لوري پیل کړې وې. روسیه چې دا مهال د ملګرو ملتونو د امنیت شورا نوبتي مشري پر غاړه لري، د فرانسې د خبري اژانس په وینا، په یو بیان کار کوي چې پر دواړو خواوو به د اوربند د عملي کولو غږ کوي.

د ازربایجان ولسمشر الهام علي ییف او د ارمینیا ولسمشر نیکول پشینین د روسیې تاس خبري اژانس ته ویلي، هغوی په مسکو کې خبرو ته تیار دي.

د امریکا ولسمشرۍ مباحثې ته نوی چوکاټ: هممهاله خبرې بندې

ولسمشر ډونالډ ټرمپ او د هغه انتخاباتي سیال جو بایډن د ۲۰۲۰ ز کال ولسمشریزه کمپاین په ترڅ کې خپله لومړنۍ مباحثه کې برخه واخېستله.

د امریکا ولسمشریزو انتخاباتو د مباحثو کمېشن وايي د ولسمشرۍ امیدوارانو ډونلډ ټرمپ او جو بایډن ترمنځ راتلونکیو مباحثو کې به چې یو تن خبرې کوي نو د بل مایک به بندوي چې دا راز د یو بل په خبرو کې مداخلت نه کېږي.

یاد کمېشن دا بدلون پرون ( د اکتوبر ۱۹ مه) په داسې حال کې اعلان کړ چې د ولسمشرۍ انتخاباتو لپاره شوې اولنۍ مباحثه کې دواړو امیدوارانو پر یوه بل لفظي حملې وکړې او په نتیجه کې یې د دغه بحث ځینې برخې د ګډوډۍ ښکار شوې وې.

له هغه سمدستي وروسته د ولسمشریزو انتخاباتو د مباحثو کمېشن د مایک بندولو وړاندیز مخې ته راوړه چې مقصد یې د اکتوبر په ۲۲ مه کیدونکې مباحثه په درناوي ترسره کول دي.

د یاد کمېشن په یو بیان کې هیله څرګنده کړل شوې چې دواړه ولسمشریز امیدواران به د یو بل د خبرو لپاره ټاکل شوي وخت احترام وکړي چې په ترڅ کې به یې د کتونکو لپاره ګټه ور بحث پرمخ لاړ شي.

د ولسمشر ټرمپ انتخاباتي ډلې په دې بدلون نیوکه کړې خو ویلی یې دي چې نوموړی به په مباحثه کې برخه اخلي.

د مایک بندولو په ترڅ کې به هر امیدوار د مباحثې په سر کې بغیر له مداخلې دوه، دوه منټه وخت ولري چې ورپسې به بیا د ازاد بحث لپاره د دواړو مایکونه خلاص کړل شي.

د امریکا د ولسمشریزو انتخاباتو مباحثې هره برخه ۱۵ منټه وخت لري. په دغه هېواد کې ولسمشریز انتخابات د نومبر په درېیمه کېدونکي دي او له دې وړاندې بله مباحثه به د دغو انتخاباتو اخرنۍ مباحثه وي.

د خوست د ځاځي میدان ولسوال یوه برید کې ووژل شو

د خوست د ځاځي میدان وژل شوی ولسوال عبدالحی ځاځی

د خوست د ځاځي میدان ولسوال نن په یوه وسله‌وال برید کې ووژل شو.

د پکتیا د والي ویاند عبدالرحمن منګل رسنیو ته په استولي پیغام کې ویلي چې عبدالحی ځاځی له خپل یوه ساتونکي سره هغه مهال ووژل شو چې له خوست څخه کابل ته روان وو.

ښاغلی منګل زیاتوي: "د خوست د ځاځي میدان ولسوال عبدالحی ځاځی چې له خوست څخه کابل ته روان وو، د لوګر ولایت په التمور سیمه کې برید ورباندې شوی. ولسوال او یو ساتونکی یې وژل شوي، یو بل قومي مشر حاجي حسن جان ټپي شوی او موټر چلوونکي ته زیان نه ‌دی رسېدلی."

ښاغلي منګل ونه‌ویل چې دا برید چا کړی، خو په دې وروستیو کې د ځینو نورو چارواکو د هدفي وژنو تور پر وسله‌والو طالبانو پورې شوی دی.

طالبانو تر اوسه د وروستۍ پېښې په اړه څه نه‌دي ویلي.

اروپایي هېوادونو کې د کویډ-۱۹ پېښې ۴۴ فیصده زیاتې شوې

ارشيف

په اروپا کې د کرونا ویروس له کبله د مړیو شمېر تر ۲۵۰ زرو واوښت.

دا خبر نن داسې مهال خپور شوی چې اروپایي هېوادونه د کرونا ویروس د تازه پېښو د خورېدو مخنیوي لپاره مبارزې ته دوام ورکوي.

اروپایي هېوادونو په تېرو اوو ورځو کې د کرونا ویروس د نویو پېښو د ۴۴ سلنې ډېروالی ثبت کړی دی.

همدا د دې سبب شوی چې یو شمېر هېوادونه نوي محدودیتونه ولګوي.

شمالي او جنوبي امریکا هم د کرونا ویروس د مخنیوي مبارزې ته دوام ورکوي.

په امریکا متحده ایالاتو کې د اکتوبر پر ۱۷ څه باندې ۵۲ زره کسان تازه په دې ناروغۍ ککړ شوي دي.

په ټوله نړۍ کې په کرونا ویروس د اخته کسانو شمېره تر څلویښت میلیونه اوښتې ده.

ظریف: ایران د افغانستان سولې بریا خپله بریا ګڼي

عبدالله عبدالله په تهران کې د ایران د بهرنیو چارو وزیر جواد ظریف سره د کتنې پرمهال

د ایران د بهرنیو چارو وزیر وايي هېواد یې د افغانستان د سولې بریا خپله بریا ګڼي او د سولې لپاره د کابل د روانو هڅو ملاتړ کوي.

محمد جواد ظریف دا خبره د اکتوبر پر ۱۸مه په تهران کې د روغې جوړې ملي عالي شورا له مشر عبدالله عبدالله سره په کتنه کې وکړه.

د دې شورا مطبوعاتي په یوه اعلامیه کې ویلي، چې عبدالله څرګنده کړې، په افغانستان کې د سولې لپاره یو استثنايي فرصت برابر شوی دی.

عبدالله عبدالله د اکتوبر پر ۱۸مه ایران ته لاړ، هغه تر دې مخکې پاکستان او هندوستان ته هم سفر کړی وو.

ګلګت بلتستان کې د کمر نړېدو پېښه کې ۱۰ تنه وژل شوي

په ګلګت بلتستان کې د ۲۰۲۰م کال د مارچ پر نهمه هم یو مسافر وړونکی بس تر کمر لوېدلی وو چې لږ تر لږه ۲۵ تنه پکې وژل شوي وو. 

د پاکستان په ګلګت بلتستان کې د کمر نړېدو په پېښه کې لږ تر لږه ۱۰ کسان وژل شوي.

يو پوليس چارواکی وکيل خان وايي، د ۱۵ مساپرو وړونکی هغه يو بس تر کمر لاندې شوی چې له راولپنېډۍ څخه سکردو ته روان وو.

ده وویل چې د ژغورنې عمليات روان دي.

په ګلګت بلتستان کې د ۲۰۲۰م کال د مارچ پر نهمه هم یو مسافر وړونکی بس تر کمر لوېدلی وو چې لږ تر لږه ۲۵ تنه پکې وژل شوي وو.

چارواکي وايي چې په پاکستان کې د سړکونو پیښې بې احتیاطه موټر چلولو ، خرابو موټرو، او د کنډکپر سړکونه له وجې رامنځ ته کيږي.

د سرکاري شمېرو ترمخه هر کال نزدي ۹۰۰۰ ټرافيکې پېښو کې شاوخوا ۴۰۰۰ کسان وژل کېږي.

ایران وايي دې هیواد ته د وسلو پر انتقال بندیز ختم شوی 

د ایران د بهرنیو چارو وزیر جواد ظریف

د ایران د بهرنیو چارو وزارت ویلي د ملګرو ملتونو لخوا پر دې هېواد د وسلو د خرڅولو بندېز د اکتبر پر ۱۸ مه د هغه نړیوال تړون ترمخه ختم شو چې تهران په ۲۰۱۵م کال کې د نړۍ له شپږو ځواکمنو هېوادونو سره کړی وو.

یاد وزارت په یو بیان کې دا اعلان کړی او ویلي یې دي چې ایران ته د وسلو منتقل کولو، له دې سره تړلو هلوځلو او دې هېواد ته پر مالي راکړه ورکړه بندېز پخپله ختم شو.

امریکا پر ایران د وسلو بندېز د ختمېدو سخت مخالفت کړی او د ایران لخوا په ممکنه توګه د وسلو د اخیستلو غندنه یې کړې چې د واشنګټن په اند د نړۍ امنیت له خطر سره مخ کوي.

خو د ایران د بهرنیو چارو وزارت په دې بیان کې ویلي چې دا هېواد په بیړه کې د وسلو اخیستلو ته اړتیا نه لري.

بلخوا د دې اوونۍ په سر کې د ایراني ولسمشر حسن روحاني په ګډون یو شمېر چارواکو د وسلو بندېز په ختمېدو لا له وړاندې د خوشالۍ څرګندونې کړې وې.

ارمنیا او اذربایجان پر يو بل له اوربنده د سرغړونو تور پورې کړی 

د ارمينيا د دفاع وزارت ویاندې وویل چې نن سهار وختي د دښمن له لوري راکټ ويشتل شوي او د توپ ډزې شوي.

ارمينیا او اذربایجان پر يو بل د هغه اوربند سرغړونو تورونه پوري کړي چې هدف يې د ناګورنو قره باغ پر سيمه د جګړې مخه نيول دي.

اوربند نن، د اکتوبر پر ۱۸مه، عملي شوی.


د ارمينيا د دفاع وزارت ویاندې وویل چې نن سهار وختي د دښمن له لوري راکټ ويشتل شوي او د توپ ډزې شوي.

خو د اذربایجان دفاع وزارت وروسته د ارمينیا پر ځواکونو تور پورې کړ چې پر هغه ځاي يې توغندي ورولي.

دا تورونه وروسته له هغې لګول شوي چې ارمينیا او اذربایجان څو ساعته مخکې ویلي ول چې دوی د نوي اوربند په اړه يې موافقه کړې او د اکتوبر پر ۱۷مه ناوخته د دواړو هېوادونو بهرنيو چارو وزارت ويبپاڼو ورته څرګندونې خپرې کړې.

اوربند د ځاي وخت په نیمه شپه عملي شوي وو.

د اکتوبر پر ۱۷مه بيانونو کې وويل شوي چې دا پریکړه د دې میاشتې په سر کې د فرانس، روس او امريکا ولسمشرانو چې په اروپا کې د امنیت او همکارۍ سازمان (OSCE) د مینسک ډلې د همکاره هېوادونو په استازیتوب کې له څرګندونو وروسته کړی.

د ارمينيا او اذربایجان ترمنځ تازه جګړو چې د سېپټمبر پر ۲۷مه پیل شوی لږ تر لږه ۶۰۰ پوځيان او ملکي وګړي وژل شوي. دا د ۱۹۹۴ کال کې اوربند وروسته چې جنګ يې ختم کړي وو تر ټولو زياته مرګ ژوبله ده.

په غلام خان بندر کې مو کارونه ځنډول کېږي: تجاران

تجاران وايي، پاکستان دې په غلام خان بندر کې د مامورینو شمېره زیاته کړي.

د شمالي وزیرستان د مېوو او سبزیانو سوداګرو له حکومته غوښتنه کړې ده چې پر غلام خان بندر دې د هغوی د ګاډو او اموالو د کتلو پروسه تېزه کړي.

د شمالي وزیرستان د تجارانو د ټولنې مشر ملک عبدالله خان د اکتوبر پر ۱۶مه مشال راډیو ته وویل، د هغوی لارۍ چې پکې مېوې او سبزیانې بار وي، په ورځو ورځو په بندر کې ولاړې وي چې له وجې یې مېوې او سبزیانې خرابېږي او د هغوی د لکونو روپو تاوان کېږي.

ملک عبدالله خان وايي، د افغانستان لوري ته د ګاډو د کلیر کولو یا کتلو پروسه چټکه ده خو د پاکستان غاړې ته د عملې د کمبوت له وجې د هغوی کارونه د ځنډ سره مخ کېږي. نوموړي له حکومته غوښتنه وکړه چې په غلام خان بندر کې دې د خپلو مامورینو شمېره زیاته کړي چې د هغوی ستونزې هوارې شي.

بل پلو د شمالي وزیرستان چارواکو د اکتوبر پر ۱۶مه مشال راډیو ته وویل چې د تجارانو له ستونزو خبر دي او د حل کولو لارې چارې یې سنجوي.

ایمانویل میکرون: ترهګر فرانسویان نشي وېشلی

میکرون وايي، ټول ملک د وژل شوي استاد تر شا ولاړ دی او ترهګر نشي کولی فرانسه ووېشي.

د فرانسې پوليسو هغه کس ویشتلی چې د هغوی په باور د سر ښار پاریس په څنډو کې یې د سکول یو استاد وژلی او سر یې ترې غوڅ کړی و.

د فرانسې ولسمشر ایمانویل میکرون دغه پېښه اسلامي ترهګریز برید بللی دی.

د فرانسې ولسمشر چی دهغه منځني ښوونځي تر څنګ ولاړ وو چیرته چی دا پیښه رامینځته شوې وه، وویل:"ددې هیواد یو شهري په دې خاطر ووژل شو چی یو استاد وو او د بیان د ازادۍ درس یی ورکاوه."

نوموړي وړاندې وویل، ټول ملک د وژل شوي استاد تر شا ولاړ دی او ترهګر نشي کولی د فرانسویانو ترمنځ تفریق راولي.

د فرانسې پولیس وايي، د وژل شوي تن سره په خوا کې یې اسناد تر لاسه کړي، د هغې له مخې برید کوونکی ۱۸ کلن ځوان و چې په مسکو کې زوکړی او د چیچنیا سره یې تړاو درلودلو. خو بلخوا د فرانسې د ترهګرۍ ضد ادارې چارواکي وايي چې د پېښې پلټنه روانه ده او دم ګړۍ ته هغوی دا نه شي تاییدولی چې موندل شوي اسناد د هغه تن دي او که نه؟

پاکستان کې د کورونا وایرس بیا په خپرېدو دی

یوه روغتیايي کارکوونکې د کورونا ټېسټ کوي.

په پاکستان کې د کورونا وايرس په اړه د معلومات خپرونکې حکومتي ویبپاڼې له مخې د اکتوبر د ۱۶مې او ۱۷مې نېټې ترمنځ په ۲۴ ساعتونو کې د کورونا وايرس ۶۴۱ نوې مثبتي پېښې ثبت شوي او ۱۷ کسان ترې مړه شوي دي.

د ويبپاڼي ترمخه په هېواد کې د اکتوبر تر ۱۷مې پورې د کورونا وايرس د مثبتو پېښو شمېره ۳۲۲,۴۵۲ ته رسيدلې ده.

خو له دې ناروغۍ تر ۳۰۰,۰۰۰ زيات کسان رغېدلي هم دي.

دا وخت په پاکستان کې د کورونا وايرس د فعالو کيسونو شمېره له ۹۰۰۰ زياته ده.

دا په داسي حال کې ده چې په پاکستان کې د کورونا وايرس په اړه لوړ پورو حکومتي چارواکو د وايرس د بيا خپرېدو خبرداری ورکړی دی.

د منصوبه بندۍ او ترقۍ وفاقي وزیر اسد عمر د اکتوبر پر ۱۵مه پر خپله ټویټر پاڼه په یو بیان کې ویلي ول چې مخکې د کوویډ -۱۹ ناروغۍ د مثبتو پېښو شرح دوه اعشاریه اووه دېرش ده کومه چې په تېرو نږدې دوو میاشتو کې د مثبتو پېښو تر ټولو لوړه کچه ده.

د پاکستان د روغتیا ادارې پر خلکو غږ کړی چې د کورونا وايرس مخنيوي لړ کې دې پر حکومتي لارښونو عمل وکړي.

خیبر: ناټو ته وړونکي پوځي ګاډي او ټرالرې سوځول شوې

خیبر دروازه

د خيبر په باړه کې په افغانستان کې میشت ناټو ځواکونو لپاره پوځي ګاډو وړونکو دوو ټرالرونو ته اور اچول شوی او څلور پوځي ګاډي پکې سوځېدلي دي.

پولیس او عیني شاهدان وایي نن د خیبر پښتونخوا د خيبر په باړه کې پر فرنټيېر سړک باندې ناڅرګندو وسله والو دغه ټرالرونه راایسار کړل، ډزې یې پر وکړې او ډرایوران یې یو خوا ته کړل. وروسته يې په ټرالرو کې پوځي ګاډو باندې پیټرول واچول او ويې سوځول.

د خیبر ریسکیو ۱۱۲۲ کارکوونکي وایي دوی له پېښې سمدستي وروسته ور رسېدلي او په ګاډو کې لګېدلی اور یې وژلی دی. بلخوا د خیبر انتظامي چارواکي وایي امنیتي ځواکونه هم د پېښې ځای ته رسېدلي او د پېښې د عاملينو پر ضد يې د لټون عملیات پیل کړي دي.

نور پورته کړئ

ځانګړې پاڼې

له موږ سره اړیکي

XS
SM
MD
LG