امریکا د روغتیا بیړنۍ حالت اعلان کړ او ویې ویل، هغه بهرنیان چې په وروستیو کې چین ته تللي دي هغوی به پرې نېږدي چې هېواد ته داخل شي.
امریکایي ادارې د جنورۍ پر۳۱مه همداراز وویل، هغه امریکایان به چې په تېرو دوو اونیو کې د چین هوبې ولایت ته تللي دي خامخا تر ۱۴ ورځو معاینه کېږي که صحي وو نو به پرېښودل کېږي.
کوم امریکایان چې د چین له نورو برخو هېواد ته ستنېږي د هغوی روغتیایي معاینات به په هوایي ډګرونو کې کېږي او دا کسان به په خپلو کورونو کې د ۱۴ورځو په مخه ایسارېږي.
دا پریکړې به د فبرورۍ پر لومړۍ نېټه پلې کېږي.
هوبې ولایت او د هغه مرکز ووهان د کرونا وایرس اصلي مرکز دی.
د دې ناروغۍ له کبله تر اوسه لږ تر لږه ۲۵۹ کسان وژل شوي دي او نېږدې ۱۱۸۰۰نور په چین کې په دې وژونکي او اخیستونکې ناروغۍ اخته شوي دي.
تر اوسه د نړۍ په ۲۵ هېوادو کې دا تایید شوې ده چې ځیني کسان په کورونا وایرس اخته شوې دي.
