ملګرو ملتونو د يویشتمۍ پېړۍ دوهمه لسیزه یانې له ۲۰۱۰ څخه ۲۰۱۹ پورې چې په څو ورځو کې به ۲۰۲۰ ته واوړي په ياده موده کې د نجونو زدکړو لپاره د ملالې يوسفزۍ مبارزه، په هېټي کې راغلې زلزله او د شام شخړه ياده کړې ده.
ملګري ملتونه وايي، ملالې يوسفزۍ به لا په وړوکوالي د خپلې طالب علمۍ په زمانه کې د نجونو زدکړه لپاره ږغ پورته کاوه او د طالبانو ظلمونو به یې په ډاګه کول.
د خېبرپښتونخوا د ښکلې سېلانۍ سيمې سوات ملاله یوسفزۍ هله نومیاتې شوه چې په ۲۰۱۰ز کال د امريکا نیويارک ټايمز د هغې پر ژوند ډاکومېنټري فلم جوړ کړ.
ملالې به په سوات کې د تندلارو طالبانو د واک په وخت کې هلته روان حالات او د جينکو د تعليم حال د بي بي سي دپاره د بلاګ په شکل کې د ګل مکۍ په نوم وړاندې کول.
هغه په کال ۲۰۱۲م کې طالبانو هغه وخت په ډزو وويشته چې د سکول په ګاډي کې د نورو جینکو سره روانه وه. هغه په سر ويشتل شوې خو بچ پاتې شوه.
په ملاله یوسفزۍ شوی برید په ګرده نړۍ کې په پراخه کچ غندل شوی وو.
د ملګرو ملتونو د بیان له مخې په هم هغه کال د بشري حقونو په نړیواله ورځ په پېرس کې د ملګرو ملتونو د تعليم، ساینس او کلتور څانګې يونيسکو په مرکزي دفتر کې ملالې يوسفزۍ ته پيروزنې وړاندې کړل شوې او سپارښتنه شوې وه چې د هرې نجلۍ ښوونځي ته تګ باوري کول، او د نجونو تعلیمي پرمختیا یو بیړنی اولیت ګرځول دي.
پر ملالې برید هغه په جهاني کچه مشهوره کړه، ګڼې نړیوالې جایزې ورکړل شوې او په ۲۰۱۴ ز کال يې د هند له کيلاش سيتيارتي سره په ګډه د سولې نړیوال نوبېل جایزه هم وګټله.
ملاله په ۲۰۱۷ز کال کې د ملګرو ملتونو د سولې او په ځانګړي ډول د نجونه تعليم استازې وټاکل شوه.
د فېسبوک تبصرې