په افغانستان کې د ناټو غوڅ ملاتړ ماموریت عمومي قومندان جنرال سکاټ میلر وايي، افغان امنیتي او دفاعي ځواکونو په جګړه کې وسله والو ته ماتې ورکړې او په دې وروستیو کې یې د ترهګرو مهم کسان له منځه وړي او ډېرې سیمې یې له هغوی بیرته نیولې دي.
د ارګ د خبرپاڼې د معلوماتو له مخې، جنرال میلر دا څرګندونې د یکشنبې په ماښام له ولسمشر اشرف غني سره په لیدنه کې کړي او د دغه هېواد د دولتي ځواکونو زیاتېدونکی ظرفیت او جنګي وړتیاوې یې ستایلي دي.
خبرپاڼې د جنرال میلر له خولې زیاته کړې چې د افغانستان امنیتي او دفاعي ځواکونو ترمنځ د همغږۍ او همکارۍ زیاتوالی د هغوی د وروستیو بریاوو سبب دی.
د ارګ د خبرپاڼې په وینا په دې لیدنه کې ولسمشر اشرف غني ټینګار وکړ چې "د افغانستان امنیتي او دفاعي ځواکونه د ترهګرۍ ضد مبارزې په لومړۍ کرښه کې دي او په دې برخه کې د نړیوالې ټولنې ګډه همکاري او ملاتړ مهم دی."