د لاسرسي ځای

تازه خبر

د پاکستان بشري حقونو کمېشن: حکومت دې ورک کسان زر پیدا کړي


د پاکستان بشري حقونو کمېشن تر دې وړاندې هم د ورکو کسانو د موندلو لپاره مظاهرې کړي دي.

کوټه ـ د پاکستان د بشري حقونو سازمان پر حکومت غږ کړی چې لادرکه کسان دې پیدا کړي او د هغوی له کورنیو سره دې مرستې هم وکړي.

د یاد کمېشن د بلوچستان څانګې لخوا د اګست پر ۳۰مه په کوټه کې دپرېس کلب په مخکې خاموشه مظاهره هم وشوه چې پکې وکیلانو، د خیریه ادارو کارکونکیو او د ژوند د نورو طبقو سره تړاو لرونکو کسانو ګډون درلود.

مظاهره کونکیو بینرونه پورته کړي ول چې پرې لیکل شوي ول، حکومت دې ورک کړل شوي کسان پیدا کړي.

د پاکستان د بشري حقونو د کمېشن د بلوچستان څانګې مشر حبیب طاهر ايډوکیټ مشال راډیو ته وویل:

"قانون شته، پولیس شته، که یو چا جرم کړی وي، نو د قانون مطابق دې ورسره چلند وشي خو د خلکو ورکول یو ډېر خطرناک ګام دی."

نوموړي دا هم وویل چې په بلوچستان صوبه کې د تېرو شلو کلونو راهېسې د خلکو په مرموز ډول د ترۍ تم کېدو لړۍ روانه ده.

د یاد دفتر یو بل غړي شمس مندوخېل وویل، حکومت له پکار دي چې ورک کسان ومومي او د هغوی د کورنیو سره یې مخامخ کړي او که څه جرم یې کړی وي نو پرې کیسونه دې وچلوي. نوموړی زیاتوي:

"که چېرې دوی (ورک کړل شویو کسانو) د ریاست خلاف څه کړي وي، بیا دې بې شکه دوی ته سزا ورکړي، او که داسې نه وي نو بیا پکار ده چې عدالتونو ته یې وړاندې کړي."

د بلوچستان هایکورټ وکیل حبیب ناصر ایډوکیټ وايي، کله چې خلک په مرموز ډول د حکومتي ادارو لخوا پورته کړل شي نو ولس له دغو ادارو ناهیلی کېږي او باور یې پرې ختمېږي او کورنۍ یې له ریاسته لرې کېږي.

د بلوچستان د کورنیو چارو وزیر ضیا لانګو دوه میاشتې مخکې مشال راډیو ته ویلي وو چې د حکومت په هلو ځلو تر ۲۰۰ پورې ورک کسان تر موندل کېدو وروسته د هغوی کورنیو ته سپارل شوي دي. نوموړي ویلي وو، هغه هیلمن دی چې نور کسان به هم د وخت په تېرېدو سره و موندل شي.

د بلوچستان د کورنیو چارو وزارت وايي د لادرکه کسانو د موندلو لپاره کار په چټکۍ سره روان دی او د سېپټمبر پر ۱۶مه به په کوټه کې د لادرکه کسانو لپاره جوړ شوی حکومتي کمېشن د لادرکه کسانو د کیسونو اورېدنه بیا پیل کړي.

تبصرې وګورئ

XS
SM
MD
LG