د لاسرسي ځای

تازه خبر

خبرونه

د کونړ چارواکي: د ولسمشر دفتر مو د پاکستانيو توغنديو په تلفاتو خبر کړ

د افغانستان د کونړ ولايت د والي مرستيال وايي، په دانګام ولسوالۍ کې يې د پرونۍ (د اګست ۲۸مې) پېښې په اړه په کابل کې د دلسمشر دفتر ته خبر ورکړی دی.

پرون په دې ولسوالۍ کې د پاکستان له خاورې د ويشتل شوي توغندي په چاودنه کې درې ماشومان ووژل شول او شپږ ماشومان ټپيان شول.

د والي مرستيال ګل محمد بيدار په دې اړه پرون ناوخته مشال راډيو ته د پېښې د مرګ ژوبلې حال ورکړ او دا يې هم وويل چې د افغان ولسمشر دفتر ته يې په د پېښې حال ورکړی او د هغوى لارښوونې ته په تمه دی.

په ملګرو ملتونو کې د افغانستان سفارتي ماموريت ويلي چې دوى د پاکستان د دغو سرغړونو په اړه د اګست پر ۲۲مه امنيت شورا ته شکايت وړاندې کړى و.

د کونړ چارواکي وايي په تېره يوه مياشت کې د پاکستان له خاورې د کونړ پر ختځيو سيمو تر ٧٠٠ زيات توغندي ويشتل شوي دي.

پاکستان وایي چې افغانستان په پوله د ډزو د وروستیو پیښو په اړه / حقیقتونه په سمه توګه نه وړاندی کوي.

بلخوا د اګست پر ۲۸مه د پاکستان د بهرنیو چارو وزارت لخوا په خپور شوي یو بیان کې د وزارت ویاند ډاکټر محمد فیصل ویلي چې وسله وال د پولې له هغې خوا څخه ترهګر بریدونه کوي او پاکستاني ځواکونه ورته د خپلې دفاع لپاره ځواب وايي.

د نننۍ ورځې ټول خبرونه وګورئ

د ایران د پارلېماني ټاکنو لومړۍ نتیجې ښايي نن اعلان شي

په ایران کې د پارلېماني ټاکنې

په ایران کې د فبرورۍ پر ۲۱مه، ماخوستن د رایو مرکزونه وتړل شول.

د ایران د ټاکنو ادارې درې واره د رايې ورکولو وخت تمدید کړ څو ډېر خلک د رایې اچولو موقع پېدا کړي.

لومړنۍ پایلې به د فبرورۍ پر ۲۲مه معلومې شي خو وروستۍ پایله به یې د دوشنبې په ورځ اعلانېږي.

په ایران کې ۷۱۴۸ کسانو ته اجازه ورکړ شوې وه چې ځانونه کاندید کړي او نږدې ۹۰۰۰ وګړي له کاندیدۍ منع شوي وو.

د کاندیدانو لېست د ایران د اسلامي رژیم د سختدریځې شوراي نګهبان د یوې څارونکې ډلې تر نظر تېر شوی و او له دې کبله زرهاوو داسې کاندیدان چې د اصلاحاتو ملاتړ یې کاوه، له لېسته وایستل شول.

د ایران اوسني پارلېمان ۹۰ غړي هم په کاندیدانو کې و چې د شورای نګهبان پلاوي یې کاندیدي رد کړه.

په ایران کې ۵۸ میلیونه وګړي د رایې ورکولو په شرایطو برابر ګڼل شوي دي.

د امریکا ولسمشر ډونلډ ټرمپ هند ته ځي

ارشیف

په داسې حال کې چې د امریکا ولسمشر ډونلډ ټرمپ د فبرورۍ پر ۲۴مه هند ته سفر کوي د سپینې ماڼۍ چارواکي وايي تمه نه لري چې د دواړو هیوادونو ترمنځ به د سوداګرۍ یوه محدوده تړون هم لاسلیک شي.

امریکايي چارواکي او کاروباري کمپنۍ وايي، د دې وجه د هند لخوا لګول شوي سوداګریز محدودیتونه دي.

د ټرمپ انتظامیې یو لوړ پوړي چارواکي د فبرورۍ پر۲۱مه خبریالانو ته وویل چې د دواړو هیوادونو ترمنځ د کرکیلې، طبي الاتو، ډیجیټیل سوداګرۍ او د مجوزه نوو بیو په سر اختلاف لا نه دې هوار شوی.

نوموړي زیاته کړې چې ولسمشر ټرمپ به له وزیر اعظم نریندرا مودي سره د دغه موضوعاتو په ګډون په هغه تړون هم خبرې کوي چې له مخه يې هند له روسیې د پنځه بیلیونه ډالره په بدل کې له ځمکې په هوا کې د توغندیو ویشتلو نظام اخستی دی.

ولسمشر ټرمپ به د فبرورۍ پر ۲۴مه د هند په احمداباد کې د نړۍ تر ټولو لوی کرکټ لوبغاړې کې له وزیر اعظم مودي سره شریکې ولسي غونډې ته وینا کوي.

ایټالیا کې یو تن د کورونا وایرس له کبله مړ شوی دی

په ایټالیا کې د کورونا وایرس پېښه

په داسې حال کې چې کورونا وایرس په چین کې له ۲۳۰۰ نه ډېر کسان وژلي دا په اروپا کې له دې وایرس څخه د چا مړه کېدو لومړۍ پېښه ده.

د ایټالیا روغتیا چارواکیو د فبرورۍ پر ۲۱مه وویل چې په دغه سړي کې وایرس موندل شوی وو او په روغتون کې يې ساه ورکړې ده.

په ایټالیا کې له دې وړاندې د کورونا وایرس مخنیوي لپاره ۱۰ ښار ګوټي تړل شوي دي او د شاوخوا ۳۳۰۰ کسانو د وینې نمونې اخستل کېږي.

په عین حال کې چینايي چارواکیو ویلي، د فبرورۍ پر۲۱مه هلته په نورو ۳۹۷ کسانو کې د کورونا وایرس تصدیق شوی دی.

له دې سره په مرکزي چین کې د وایرس ځپل شویو شمیره ۷۶،۲۸۸ ته رسېدلې ده.

په لوګر کې اوربند غږ مشاعره

شاعر مطیع الله تراب وايي، ممکن دا ډول غږونه کاڼي زړونه نرم کړي.

د فبرورۍ پر ۲۰مه د لوګر په مرکز پل علم کې د التمور د کلیوالي سیمې د ځوانانو په نووښت د اوربند غږ په نوم مشاعره جوړه شوه.

په یاده مشاعره کې چې له لوګر سربیره د خوست، پکتیا، پکتیکا، لغمان او کابل بېلابېلو ولایتونو شاعرانو او د شعر او فرهنګ مینه والو برخه اخیستې وه او تابیا کوونکو يې موخه د سولې او اوربند لپاره د عامو ولسونو د غږ اوچتول یاد کړل.

د لوګر د اطلاعاتو او فرهنګ رئیس عبدالرحمن تسل وايي، پخوا به د سولې او اوربند غږ د غونډو او ناستو د ویناوالو لخوا کېده، خو دا ځل دا غږ د هغو سره په توپیر د شاعرانو لخوا اوچتیږي.

ده وویل، پخوا خلکو د ګواښونو له کبله د سولې او اوربند خبره په احتیاط سره کوله، خو اوس په دې لاره کې ګواښونو پسې نه ګرځي او د سولې خبره په جرئت سره کوي.

د لوګر په اوربند غږ مشاعره کې له خوست میمله شاعر مطیع الله تراب هم د التمور د سیمې ځوانان وستایل، چې سوله يې په یو نوي پیغام کې نغښتې وه او ممکن دا ډول غږونه کاڼي زړونه نرم کړي.

د لوګر په اوربند غږ مشاعره کې ګڼو شاعرانو خپل او د نورو انتخابي شعرونه او غزلونه وویل.

د لوګر د اوربند غږ مشاعرې په پای کې پر یو شمېر میلمنو شاعرانو برابرې شوې ډالۍ هم وویشل شوې.

امریکا او برتانیا پر روس د انټرنېټي برید تور پورې کړی

ارشیف

تر جارجیا (ګورجستان) وروسته امریکا او برتانیا هم د تېر کال د هغې لویې انټرنېټي حملې ګوته روسیې ته نیولې چې له کبله یې زرګونه جارجیايي ووبپاڼې بندې شوې او ان ټېلېوېژني خپرونې وځنډېدې.

د جارجیا بهرنیو چارو د وزارت ویاند ولادیمیر کونستانتېنېدي د فبرورۍ پر ۲۰مه په تېبلیسي کې یوې خبري غونډې ته وویل چې روسیې انټرنېټي برید پلان او ترسره کړی وو.

ده وویل، "د جارجیايي چارواکو پلټنې او له ملګرو څخه ترلاسه شوي معلومات ښيي چې د روسیې د پوځ یوې عمومي څانګې دا انټرنېټي برید کړی وو."

د نوموړي تر خبرو څو ساعته وروسته امریکا او برتانیا بېګا په جلا، جلا بیانونو کې وویل چې انټرنېټي برید د روسیې د پوځي استخباراتي ادارې یوې څانګې کړی چې ۷۴۴۵۵ څانګه او سینډورم نومېږي.

سینډورم د روسیې په پوځي استخباراتو کې د انټرنېټي غلو د یوې ډلې نوم دی چې د امنیتي پوهانو په وینا د فرانسې ولسمشریزو انتخاباتو د نوماند اېمانوېل مکرون د کیمپېن د برېښلیکونو (اي مېلونو) په غلا او په ۲۰۱۶ز کال کې د امریکا ولسمشریزو انتخاباتو پرمهال د ډېموکراټ ګوند پر ضد د کیمپېن پر کولو تورنه ده.

برتانیې هم پر دې ډلې په ۲۰۱۷ز کال کې په اوکراین کې د دوو انټرنېټي حملو تور پورې کړی.

د امریکا بهرنیو چارو وزیر مایک پامپېو بېګا پر روسیې غږ وکړ چې "په جارجیا او نورو هېوادونو کې له دې ډول کړنو لاس واخلي."

مسکو د تازه تورونو په غبرګون څه نه دي ویلي خو په تېرو وختونو کې یې دا دعوې بې اساسه بللي.

چین: د کورونا وایروس پېښې کمې شوې دي

د چین په یوه روغتون کې پر کرونا وایروس باندې د اخته کس درملنه

چین وايي چې پر کرونا وایروس د اخته کېدونکو کسانو شمېر خورا کم شوی او ورسره هیلې پیدا شوي چې دا ساري ناروغي ممکن کنټرول شي.

د چین د روغتیا ملي کمېسیون نن پنجشنبه اعلان وکړ چې ۶۲۸ نوې قضیې یې ثبت کړې دي.

دا کمېسیون همداراز وايي چې ۴۵ نورې قضیې یې د چین په نورو برخو کې ثبت کړې دي.

دا په نږدې یوه میاشت کې په هوبې ولایت او په ځانګړي ډول په ووهان ښار کې تر ټولو کم شمېر قضیې دي چې ثبت کېږي.

په مجموع کې تر اوسه پورې ۲ زره ۱۱۸ تنه په کرونا وایروس مړه شوي دي.

په چین کې تر ۷۴ زره ډېر کسان په کرونا وایروس اخته شوي.

همداراز په ۳۰ نورو هیوادونو کې سلګونه کسان په دې وایروس اخته شوي دي.

هنګو: د ماشومې مدیحې د وژنې په تور یې د تره زوی ګرفتار

د هنګو ضلعې پولیس وايي چې د درسمندو سیمې د اته کلنې ماشومې مدیحې د وژنې په تړاو یې یو تن نیولی دی.

د پولیسو یوه ځايي مشر شوکت علي شاه نن د فبرورۍ پر ۲۰مه مشال ریډيو ته وویل چې نیول شوی تن الیاس نومېږي چې د وژل شوی ماشومې د تره زوی دی.

پولیس وايي دوی پر دغه تن د قتل الزام ثابت کړی دی چې هغه یې په خپله اعتراف کړی خو ملزم پر ماشومې د جنسي تېري له توره انکار کړی دی. پولیس وايي د وینې نمونې یې د ازموینې لپاره لېږلي دي.

مدیحه د فبرروۍ پر ۱۵مه لا درکه شوې وه چې مړی یې یوه ورځ وروسته په یو ځايي ځنګل کې و موندل شو. د پېښې پر ضد په سیمه کې مظاهرې هم شوی وی

جرمني کې د ډزو په دوو پېښو کې ۱۰ تنه وژل شوي

د جرمني پلټونکي وايي له فرینکفرټ سره نږدې بېګا د ډزو په پېښه کې د لږ تر لږه لسو کسانو وژنه یو 'ترهه ګر برید' و او موخه یې له بهرنیو وګړیو کرکه وه.

پولیس وايي، د هناو ښار په چیلم خانه او کیفې کې د هغه تن مړی د هغه له اپارتمانه موندل شوی چې ګمان کېږي دا ډزې یې کړې دي.

په عین حال کې د ترکیې ولسمشر رجب طیب اردغان یوه ویاند نن د فبرورۍ پر شلمه په استنبول کې وویل چې په وژل شویو کې د ترکي وګړي شامل دي.

ابراهیم کلین وویل ترکي تمه لري چې د جرمني انتظامیه به د وژنو په پلټنو کې هر ممکن کوشش کوي.

ځايي رسنیو ویلي جې بیګا ناوخته د هناو په چیلم خانه او قهوه خانه کې یو تن پر خلکو ډزې وکړې.

پولیسو نن په بیان کې وویل چې پېښه د شپې مهال شا او خوا لس بجې وشوه چې پکې د لسو کسانو د وژل کېدو سربېره ځيني کسان زخمیان شوي هم دي.

پولیسو وویل چې مشکوک تن د پېښې له ځایه و تښتېد خو مړی یې نن له اپارتمانه موندل شوی دی. پولیس وايي هلته د یو بل تن مړی هم وو.

جلال‌اباد کې چاودنې درې تنه وژلي

د جلال‌اباد ښار د سره رود په دو سرکه کې د چاودنې ځای

پېښه څو شېبې وړاندې د جلال‌اباد ښار د سره رود دو سرکه سیمه کې د سنوکر په یو کلب کې شوې ده.

د ننګرهار امنیتي چارواکو تر دې دمه د پېښې په تړاو څه نه‌ دي ویلي.

د چاودنې نوعیت هم نه‌ دی معلوم شوی.

د ننګرهار روغتیايي مسولینو ویلي چې تر دې دمه د پېښې له ځایه درې مړي او دوه ټپيان وروړل شوي دي.

پامپیو په ریاض کې له سعودي چارواکو سره د ایران په اړه غږېږي

پامپیو په ریاض کې له سعودي چارواکو سره د خبرو پر مهال.

د امریکا بهرنیو چارو وزیر مایک پامپیو ریاض ته رسېدلی او تمه ده چې نوموړی به له سعودي چارواکو سره د ایران په اړه خبرې کوي.

د امریکا بهرنیو چارو وزارت د فبرورۍ پر ۱۹مه ویلي چې پامپیو به د شاه سلمان، وليعهد محمد بن سلمان او د بهرنیو چارو وزیر فېصل بن فرهان سره ویني.

سعودي ته له تللو وړاندې د ایتوپیا مرکز ادیس ابابا ته د سفر پروخت پامپیو خبریالانو ته ویلي دوی به له سعودي چارواکو سره زیاتره پر هغو امنیتي مسلو خبرې کوي چې په خاصه توګه د ایران لخوا د خطر له وجې رامخې ته شوي دي.

له ایران سره په شخړو کې ریاض د واشنګټن کلک اتحادي دی.

پامپیو دا هم ویلي واشنګټن له تهران سره خبرو ته تیار دی خو باید لومړی ایران په خپله رویه کې بدلون راولي.

ولسمشر غني او خلیلزاد له طالبانو سره د تاوتریخوالي پر کمېدو غږېدلي

ولسمشر غني، زلمی خلیلزاد سره د لېدو پر مهال.

د افغانستان لپاره د امریکا خصوصي استازي زلمي خلیلزاد د فبرورۍ پر ۱۹مه په کابل کې له افغان ولسمشر محمد اشرف غني سره لیدلي دي.

دواړو مشرانو له طالبانو سره د امریکا سولې پر هغه تړون خبرې کړي دي چې پکې تر اوو ورځو پورې د تشدد کمولو خبره شوې ده.

د ولسمشر غني دفتر په یوه بیان کې ویلي چې خلیلزاد له ځايي مشرانو سره په دې اړه ګټه ورې خبرې کړي دي چې څنګه افغان حکومت د سولې عمل پرمخ یوسي، چې بل اخر په دغه هېواد کې د نېږدیو دوو لسیزو جګړه پای ته ورسوي.

دغه شان د اروپایي ټولنې مشر جوزف بورېل ولسمشر غني ته په ټیلیفون پر بیا منتخبېدو مبارکي ویلې او د بشپړې سولې عمل پر مخ وړلو یې خبرې کړي دي.

د اروپایي ټولنې د یو خبر ترمخه بورېل له ولسمشر غني سره په خبرو کې د سولې د عمل د مرستې او په دې اړه په یووالي ټینګار کړی او دا یې هم ویلي چې اروپایي ټولنه به د افغانستان د سولې د عمل مرسته کوي.

روس د کرونا وایرس له کبله پر چینايي وګړو بندیز لګولی

ارشیف

روس وايي، د وژونکي کورونا وایرس د مخنیوي په غرض یې دغه هېواد ته د چینايي وګړیو په ورتګ عارضي بندیز لګولی دی.

د روس مرستیالې وزیر اعظمې تاتیانه ګولېکوا چې د صحت څانګې مشري هم کوي، له دفتره د فبرورۍ پر۱۸مه خپور شوي بیان کې راغلي چې دا بندیز به د فبرورۍ له ۲۰مې پیل کېږي.

د بیان ترمخه په دې بندیز کې به روس ته د کار، زده کړو، سېل او یا نور کوم شخصي سفر لپاره د چیني وګړیو ورتګ شامل وي خو زیاتوي چې د روس له لارې نورو هېوادونو ته د چینايي وګړیو په تګ راتګ به بندیز نه وي.

په بیان کې دا نه ویل شوي چې دا بندیز به تر کومې جاري وي.

کورونا وایرس چې زیاتره په چین کې محدود کړل شوی تر اوسه یې په نورو هېوادونو کې ۵۰۰ ناروغان رپوټ شوي دي، دا راز تر دې دمه له چین څخه بهر د دې وایرس له کبله په فرانس، هانګ کانګ، فلپاین او جاپان کې یو، یو تن مړ شوی دی.

له طالبانو سره هوکړې ته د رسېدو امکان وینو: ټرمپ

د امریکا ولسمشر ډونالډ ټرمپ

د امریکا ولسمشر ډونالډ ټرمپ وایي، له طالبانو سره خبرې دوام لري او دی له دې ډلې سره تړون ته د رسېدو یو امکان ویني.

ټرمپ د فبرورۍ ۱۹مه واشنګټن ته نېږدې په اندرو هوایي اډه کې خبریالانو ته وویل حکومت یې له طالبانو سره خبرې کوي او یوې هوکړې ته د رسېدو چانس شته.

ټرمپ یو ځل بیا خپلې پخوانۍ خبرې تکرار کړې چې اوس مهال امریکا په افغانستان کې د قانون عملدارۍ ادارې په توګه کار کوي.

هغه وویل، افغانستان کې د تاوتریخوالي د ډېرېدو پلوی نه دی او نه غواړي چې میلیونونه کسان ووژني.

ټرمپ دا څرګندونې داسې مهال کوي چې د امریکا او طالبانو ترمنځ خبرې حساس پړاو ته رسېدلي او د رپوټونو ترمخه د دوی ترمنځ تړون لاسلیک ته چمتو شوې ده.

کلاچۍ کې چاودنې یو پولیس وژلی، درې ژوبل

د خېبر پښتونخوا نقشه

چارواکي وايي په خیبر پښتونخوا کې نن سېشنبه د سړکغاړې بم چاودنې يو پوليس والا وژلى او درې نور ټپيان شوي دي.

راپورنه وايي، د دې بمي برید هدف د پوليسو يو موټر و.

دغه پوليس د دې لپاره ګمارل شوي وو چې په سيمه کې د ګوزڼ ضد واکسين د کمپاين امنیت وساتي.

چاودنه د خېبر پښتونخوا په کلاچۍ ښارګوټي کې شوې ده.

د دې چاودنې ذمه واري چا نه‌ ده منلې.

د پوليسو يوه افسر واحد خان رسنيو ته ويلي امنيتي ځواکونه په سيمه کې په حمله کوونکو پسې تلاشي کوي.

د هغه په خبره د چاودنې په وخت کې د واکسين د کمپاين کوم کارمندان له پوليسو سره مله‌ نه ول.

'د خبریال عزیز میمن وژونکي دې سزا شي: سي پي جې

د پاکستان وژل شوی ژورنالېست عزیز میمون

د خبریالانو خونديتوب نړيوالې کمېټۍ له پاکستانيو چارواکیو غوښتي چې د وژل شوي خبریال عزیز میمن په وژنه ککړو کسانو ته دې سزا ورکړي.

د عزيز ميمون مړى چې غاړه‌ يې په مزو تړل شوې وه، تېره يکشنبه د سند صوبې په مهرپور سيمه کې وموندل شو.

په لومړنيو راپورونو کې ويل شوي وو چې دغه خبریال لومړۍ زندۍ شوی دی بيا يې مړى يوه لښتي ته اچول شوى دی.

په نيويارک کې دېره د خبریالانو خونديتوب کمېټې په دوشنبه په خپله اعلاميه کې ويلي پکار ده د دغه وژنې په باب دې په چټکۍ عدالتي کاروايي وشي.

د اعلاميې په حواله د پاکستان چارواکي په وار وار د خبريالانو په باب د عدالت په تأمين کې پاتې راغلي دي.

وژل شوي خبریال کاوش ټېلېوېژني شبکې او کاوش ورځپاڼې ته کار کاوه چې په سندۍ ژبه خپرونې کوي.

د بې‌پولې خبريالانو ادارې په حواله، ميمن روان ميلادي کال لومړى خبریال دى چې په پاکستان کې وژل کېږي.

دغه اداره وايي پروسږ کال څلور پاکستاني خبریالان او بلاګ‌ګران د دوى د راپورونو په تړاو وژل شوي دي.

د منشیاتو خلاف د کوټې پرېس کلب مخې ته لاریون

د کوټې پرېس کلب مخې ته د خضدار ځوانانو د نشه يي توکیو خلاف مظاهره وکړه. هغوی له حکومته غوښتنه کوله چې په بلوچستان صوبه کې دې د مخدره موادو مخنیوي لپاره کوټلي ګامونه پورته کړي.

د ضیا خان په نوم د احتجاج یو ګډونوال وايي، حکومت باید د منشیاتو کاروباریان له بېخه وباسي.

دا هغه ځوانان دي چې له خضداره تر کوټې پورې یې د نشه يي توکیو د کاروباریانو پر ضد پلی لاریون هم کړی. د دواړو سیمو ترمنځ واټن د ۴۰۰ کیلومیترو دی.

د خضدار ځوانانو له هغې وروسته پر احتجاج لاس پورې کړی چې تېره اوونۍ په نوشکي کې یو ځايي ځوان سمیع منګل د نشه يي توکیو د پلورونکو پرضد له بیان ورکولو وروسته ناڅرګندو کسانو په ډزو وواژه.

حکومت د پېښې نوټس اخېستی او د کورنیو چارو وزیر ضیا لانګو امر کړی چې د پېښې تر شا لاس لرونکي کسان دې ژر تر ژره ونیول شي.

ایران وايي له کمزوري موقعیت نه امریکا سره خبرې نه کوي

د ارشیف انځور

د ایران ولسمشر حسن روحاني ویلي، هیواد به یې کله هم له کمزوري موقعیته یا د فشار لاندې حالت د امریکا سره خبرې ونه کړي او دا یې هم ویلي چې په منځني ختیځ کې د استحکام راوستو لپاره د تهران ته اړتیا ده.

روحاني دا څرګندونې د فبرورۍ پر ۱۶مه، په داسې حال کې کړي چې د روانې اوونۍ په پای کې په ایران کې پارلیماني ټاکنې هم تر سره کېدونکې دي.

نوموړي پر ایراني ولس غږ وکړ چې په انتخاباتو کې دې خپلې رایې وکاروي، دا په داسې حال کې ده چې زرګونه هغه کسان نا اهله ګرځول شوي چې خپل نومونه یې په انتخاباتو کې د ګډون لپاره راجستر کړي ول، په دغو کې د اوسني پارلېمان ۹۰ غړي هم شامل دي.

په ایران کې د فبرورۍ ۲۱مې ټاکنو ته په پراخ ډول د تندروو او محافظه کارو ترمنځ د مقابلې په توګه کتل کېږي.

په چین کې کورونا وایرس ۱۷۷۰ کسان وژلي

د ارشیف انځور

د چین د روغتیا ملي کمېسون د فبرورۍ پر ۱۷مه په خپل راپور کې ویلي، د فبرورۍ تر ۱۶ مې د کورونا وایرس له وجې د وژلو شویو کسانو شمېر ۱۷۷۰ ته پورته شوی.

چارواکي وايي، په ګرده نړۍ کې د کورونا وایرس له وجې ۷۱ زره کسان ناروغه شوي چې له ۷۰ زره زیات پکې په چین کې دي.

په تېرو ۲۴ ساعتونو کې ۲۰۴۸ نوي کیسونه مخې ته راغلي دي. دا په داسې حال کې ده چې تر دې وړاندې په درو ورځو کې چارواکو ویلي وو، په دې وایرس د اخته شویو کسانو شمېره مخ په کمېدو ده، وړمه ورځ یواځې ۳۹ مثبت کیسونه مخې ته راغلي ول.

په چین کې د ۱۰۵ و نورو کسانو د وژل کېدو تازه خبر هم ورکړل شوی دی.

په همدې حال کې جاپاني چارواکو پر ساحل قرنطین شوې بېړۍ کې د ۷۰ نورو کسانو په کورونا وایرس د اخته کېدو راپور ورکړی چې ورسره د ټولو ناروغانو شمېره ۳۵۵ ته پورته شوې ده.

په دې سربېره د نړۍ په ۳۰ هیوادونو کې په کورونا وایرس ۵۰۰ نورې پېښې څارل شوې دي.

په فرانسه، هانګ کانګ، فلېپین او جاپان کې کورونا ۴ کسان وژلي هم دي.

په لوګر کې د وسلوالو طالبانو یو مشر نیول شوی

د لوګر امنیتي چارواکي وايي، چې د فبرورۍ پر ۱۵مه یې د ملي پولیسو ځانګړو ځواکونو د عملیاتو په ترڅ کې د مرکز پل علم په اړوند سیمه کې د وسلوالو طالبانو اکمالاتي مسوول نیولی دی.

د فبرورۍ پر ۱۶مه، د لوګر د امنیه قوماندانۍ ویاند شاه پور احمدزي رسنیو ته په استول شوي غږیز پیغام کې ویلي، چې یاد کس ګل حسین نومیږي او وسلوالو طالبانو د اکمالاتو یا د وسلو او نورو توکو د رسولو مسوولیت يې پر غاړه وو.

شاپور احمدزي د نیول شوي کس په اړه نور مالومات ندي ورکړي.

د مونشن کانفرانس کې د لیبیا د شخړې پر هوارۍ خبرې

ټاکل شوې چې د مونشن په امنیتي کانفرانس کې به د یو شمېر هېوادونو د بهرنیو چارو وزیران او اعلا چارواکي، په لیبیا کې د شخړې د ختمولو لپاره په شوي پر مختګ خبرې وکړي.

د فبرورۍ د ۱۶مې په غونډه کې به د هغو اقداماتو عملي کولو ته کتنه کېږي چې تېره میاشت په برلن کې شوې سر مشریزه کې پرې اتفاق شوی وو.

د لیبیا په طرابلس کې د ملګرو ملتونو ملاتړ لرونکي حکومت او د یو جنګ سالار د ډلې تر منځ جګړه کې د ډزبندۍ غوښتنه شوې ده.

ترکي د طرابلس د حکومت او روسیه د هغه پر ضد جګړه کوونکې ډلې ملاتړ کوي.

ملګرو ملتونو د دواړو د ملاتړ غندنه کړې او ویلي یې دي چې د هغوی لخوا د وسلو ورکولو له وجې په جګړه کې شدت راغلی دی.

تېره اوونۍ د ملګرو ملتونو د امنیت شورا د لیبیا د جګړې د ختمولو په اړه د ۵۵ نکاتو یوه تګلاره منظوره کړې وه چې پکې په هغه هېواد کې د تشدد د زیاتوالي غندنه هم شوې وه.

امریکا وايي له طالبانو سره د تشدد کمولو موافقه هیله بخښونکې ده

مارک ایسپر وايي، اوس وخت رارسيدلی چې د افغانستان شخړې ته د سیاسي حل موقع ورکړل شي. 

د امريکا د دفاع وزیر مارک ایسپر وايي، د امريکا او طالبانو ترمنځ په روانه اوونۍ کې په افغانستان کې د تشدد د کمولو موافقه "هیله بخښونکې ښکاري" خو خبرداری یې ورکړي چې دا له خطره خالي نه ده.

مارک ایسپر د فبرورۍ پر ۱۵مه د جرمني مونیخ امنیتي کنفرانس ته وویل، اوس وخت رارسيدلی چې د افغانستان شخړې ته د سیاسي حل موقع ورکړل شي.

هغه زیاته کړه چې د سولې په خاطر ځينو خطرو سره مخامخ کېدای شي.

بلخوا د افغان ولسمشر له دفتره د فبرورۍ پر ۱۵مه په خپور شوي بيان کې ويل شوي چې دا تړون شرایط لري او په راتلونکو څو اونیو کې به پای ته ورسېږي.

په بیان کې ویل شوي، امریکایي چارواکو ولسمشر اشرف غني ته ویلي چې طالبان له تشدد لاس اخستو ته تيار دي.

چین: د کورونا وایرس په کمېدو دی، نهه زره کسانو درملنه شوې

چین وايي له نهو زرو زيات کسان چې په کورونا وايرس اخته شوي وو، له درملنې وروسته له روغتونونو فارغه شوي دي.

چین د فبرورۍ پر ۱۶مه وویل، د کورونا وایرس مخ په کمېدو دی. هغوی له تېرو درو ورځو راهېسې د وایرس د کمېدو خبر ورکوي.

خو بل پلو، د روغتیا نړیوالې ادارې ویلي د چین دغه ادعا وار نه مخکې خبره ده او هغوی نه شي ویلی چې دا بحران به کوم لوري ته ځي؟

د چین چارواکو نن د فبرورۍ په ۱۶ وویل، تر اوسه د کورونا وایرس ۱۶۶۵ کسان وژلي دي او ۶۸۰۰۰ کسان یې ناروغه کړي دي.

چین دا هم وايي چې له نهو زرو زيات کسان چې په کورونا وايرس اخته شوي وو، له درملنې وروسته له روغتونونو فارغه شوي دي.

چین کې د کورونا وایرس له کبله د وژل شویو شمېر ۱۵۶۳ ته ورسېد

ارشیف

هغه کسان چې د چين پلازمېنې بيجينګ ته ستنېږي، ۱۴ ورځې اجباري قرنطین کېږي.

چینایي چارواکي هڅه کوي چې د کورونا وایرس د لا زیاتې خپرېدا مخه ونیسي.

بیجينګ ډېلي ورځپاڼې نن [د فبرورۍ پر ۱۵مه] خبر ورکړ که چا له قرنطین کولو ډډه کوله مجازات به شي.

خو تر اوسه دا څرګنده نه ده چې د اجباري قرنطین پروګرام به څرنګه پلي کېږي.

د دې ساري ناروغۍ د تلفاتو شمېر په چین کې ۱۵۶۳ ته رسېدلی دی.

د روغتیا نړیوال سازمان وایي چې په ټوله نړۍ کې تر ۶۷ زره ډېر کسان په کورونا وایرس اخته شوي دي.

ایران اټومي تړون ستنېدو ته چمتو دی: ظریف

د ایران بهرنیو چارو وزیر جواد ظریف (ارشیف)

د ايران بهرنيو چارو وزير جواد ظریف وايي چې هيواد يې د ۲۰۱۵م کال اټومي تړون په بشپړه توګه د عملي کولو ستنېدو ته چمتو دی خو که اروپا يې په بدل کې ايران ته اقتصادي ګټې ورکړي.

د فبرورۍ پر۱۴مه د ميونخ امنيتي غونډې ته په وینا کې جواد ظریف وویل، هيواد يې چمتو دی چې له شپږوو نړيوالو قوتونو سره له شوي تړون څخه د شاته کېدو په لړ کې ايران کوم ګامونه اخيستي دي هغه ورو کړي او یا يې بېرته راوګرځوي.

په ۲۰۱۵م کال کې ايران د خپل اټومي پروګرام محدودولو په بدل کې په اقتصادي بنديزونو کې د نرمۍ په موخه له چين، روس، بريتانيا، جرمني، فرانس او امریکا سره تړون کړی و.

په ۲۰۱۸م کال کې له دې تړون څخه د امریکايي ولسمشر ډونالډ ټرمپ له وتلو وروسته بريتانیا، فرانس او جرمني هڅه کوي چې دا تړون په خپله اصلي بڼه کې پاتې شي.

له دې تړون څخه تر وتلو وروسته ټرمپ انتظاميې پر ايران سخت اقتصادي بنديزونه لګولي.

نن له افغانستانه د شوروي ځواکونو د وتلو ۳۱مه کاليزه ده

شوروي ځواکونه په ۱۹۸۹م کال کې د افغانستان له حیرتان بندر څخه د وتلو پرمهال.

نن [د فبرورۍ پر۱۵مه] له افغانستان د پخواني شوروي ځواکونو د وتلو ۳۱مه کالیزه ده.

د پخواني شوروي اتحاد د ځواکونو وروستۍ پوځي ډلګۍ د ۱۹۸۹م کال د فبرورۍ پر ۱۵مه د حیرتان پر بندر تېره شوه او د افغانستان اشغال رسماً پای ته ورسېد.

له افغانستانه د پخواني شوروي ځواکونو د وروستۍ ډلګۍ مشري جنرال بوریس ګروموف کوله.

له افغانستانه د پخواني شوروي اتحاد د پوځیانو وتلو بهیر یو کال وخت ونیو.

دغه ځواکونه د ۱۹۷۹م کال په ډېسېمبر میاشت کې افغانستان ته ورننوتل.

د راپورونو پر اساس، د افغانستان د نيولو پر مهال په نهو کلونو کې د شوروي اتحاد ۱۵زره عسکر ووژل شول او ګڼ ټپیان شول. خو بلخوا میلیونونه افغانان د جګړې له کبله ووژل شول او ټپیان شول او د بېکورۍ له کبله نورو هېوادونو ته مهاجر شول.

نور پورته کړئ

ځانګړې پاڼې

د مشال ځانګړې پاڼې

له موږ سره اړیکي

XS
SM
MD
LG