کابل او واشنګټن هوکړه کړې چې په افغانستان کې د جګړې د پای ته رسولو لپاره د سولې روانې هڅې ګړندۍ کړي.
د افغانستان او امریکا حکومتونو ویلي چې افغان ولسمشر اشرف غني او د امریکا د بهرنیو چارو وزیر مایک پامپیو د جولای پر ۲۴مه په ټيليفوني خبرو کې پر دې هوکړه وکړه چې په افغانستان کې د جګړې د پای ته رسولو لپاره د سولې هڅې باید چټکې شي.
ولسمشر غني په روانه اوونۍ کې د ولسمشر ډونالد ټرمپ د هغې وینا په اړه له واشنګټنه د وضاحت غوښتنه وکړه چې ویې ویل، امریکا د افغانستان جګړه ګټلی شي خو نه غواړي ۱۰میلیونه انسانان ووژني.
د کابل او واشنګټن په ګډ بیان کې چې د جولای پر ۲۵مه خپور شو، یادونه شوې چې پامپیو ولسمشر غني ته ډاډ ورکړ چې په د افغانستان او جنوبي اسیا لپاره د ولسمشر ټرمپ په ستراتيژۍ کې د امریکايي ځواکونو د شمېر د کمولو په ګډون کوم بدلون نه دی راغلی.
بیان زیاتوي چې د افغانستان د سولې لپاره د امریکا د بهرنیو چارو وزارت ځانګړی استازی زلمی خلیلزاد او د امریکا د وسله والو ځواکونو لوی درستیز جوزف ډانفورډ د همدې لپاره کابل ته استول شوي دي چې د سولې د هڅو د راتلونکو پړاوونو په اړه له افغان چارواکو سره خبرې وکړي.
په همدې حال کې افغان حکومت وايي، له طالبانو سره د خبرو لپاره د مرکچي پلاوي د غوراوي په برخه کې پرمختګ شوی دی.
د ولسمشر ویاند صدیق صدیقي د جولای پر ۲۵مه په کابل کې په یوه خبري غونډه کې په دې اړه څرګندونې وکړې او ویې ویل:
"یو مورد چې اوس مهال کار پرې شوی، د مرکچي پلاوي ټاکل دي، هغه پلاوی چې د افغانستان له لوري د خبرو په راتلونکو پړاوونو کې باید ګډون وکړي، زموږ هڅه به دا وي چې مرکچي پلاوی داځل توپیر ولري، مختصر وي او ټول اړخونه ګډون پکې ولري."
ښايي چې طالبان به په دوحه کې له امریکايي چارواکو سره د خبرو په اتم پړاو کې دا ومني چې له افغان حکومت سره خبرې وکړي.
د سولې د عالي شورا د اجراییه پلاوي غړی قاضي محمد امین وقاد وايي، افغان حکومت باید د احتمالي خبرو لپاره خپل پلاوی له اوسه چمتو کړي.
ده وویل: "د افغانستان حکومت باید خپل مرکچي پلاوی وټاکي، داسې پلاوی چې طالبانو ته هم د منلو وړ وي او د دولت او ملت استازیتوب هم وکولای شي، هیله مند یوو چې په دې برخه کې چې کومې پېشبینۍ او خوشبینۍ شته، نتیجه ورکړي او افغان حکومت ژر تر ژره خپله تیاري ونیسي، د اتم پړاو خبرې ډېرې نېږدې دي او دا فرصت باید موږ له لاسه ورنه کړو.
طالبانو او د خلیلزاد په مشرۍ امریکايي چارواکو تردې دمه اووه ځلې خبرې سره کړې دي چې اجنډا یې تر ډېره له افغانستانه د امریکايي ځواکونو پر وتلو، د ترهګړۍ ضد مبارزې، اوربند او بین الافغاني خبرو باندې متمرکزه وه.
که څه هم په دې خبرو کې دواړو خواوو د پرمختګ خبر ورکړی، خو عملاً پر هېڅ مورد هم هوکړه نه ده شوې.
