د نړۍ پنځه طاقتور هېوادونه به د روانې میاشتې په پای کې له ایران سره د ۲۰۱۵ز کال د اټومي تړون ژغورلو لپاره پر یوه داسې وخت خبرې کوي چې په خلیج فارس کې کړکېچ په زیاتېدو دی.
بریتانیا، فرانس، جرمني، روس او چین به د جولای پر ۲۸مه په ویانا کې له ایران سره د دغه تړون په اړه د عمل په یو جامع پلان خبرې کوي.
د اروپایي ټولنې د بهرنۍ تګلارې ادارې د جولای پر ۲۳مه په یوه بیان کې ویلي دغه غونډه یې د فرانس، بریتانیا، جرمني او ایران په غوښتنه رابللې، چې پکې به د دغه پلان د عملي کولو پر ټولو اړخونو بحث کېږي.
د دغه تړون له مخې چې پخوا یې امریکا هم برخه وه، تهران د بندیزونو د نرمولو په بدل کې د خپل اټومي پروګرام تر ډېره حده د محدودولو ژمنه کړې وه.
په ۲۰۰۱۹ز کال کې امریکایي ولسمشر ډونلډ ټرمپ خپل هېواد له دغه تړونه ویوست او پر ایران یې اقتصادي بندیزونه بیا عملي کړل.
