د امریکا د دفاع وزارت سرپرست مشر په افغانستان کې د ناټو په مشرۍ د غوڅ ملاتړ ماموریت د ملاتړ ژمنه تکرار کړې.
مارک اېسپر د جون پر ۲۷ه په برسلز کې د ناټو اېتلاف د دفاع وزیرانو د غونډې په پای کې خبریالانو ته وویل، واشنګټن د افغانستان د سولې لپاره د امریکا د بهرنیو چارو وزارت ځانګړي استازي زلمي خلیلزاد د هڅو کلک ملاتړ کوي.
په عین حال کې د ناټو مشر ینز ستولتنبرګ پرونۍ غونډې ته وویل، دا ټلواله په افغانستان کې د امنیت او ثبات ټینګښت ته ژمنه ده او په دې برخه کې د امریکا د هڅو ملاتړ کوي.
زلمي خلیلزاد تر اوسه په قطر کې له طالبانو سره شپږ ځلې خبرې کړې دي او ټاکل شوې چې دوحې د مذاکراتو اووم پړاو د جون پر ۲۹مه پیل شي.
طالبانو تر اوسه له افغان حکومت سره له مخامخ خبرو انکار کړی.
