د لاسرسي ځای

تازه خبر

سپریم کورټ: د بلاول زرداري او مراد علي شاه نومونه دې د سفري بندیز له لېسټه لرې شي


سپریم کورټ ویلي چې نیب کولای شي چې له بلاوله پلټنې وکړي

پراګ - د پاکستان سپریم کورټ د پیپلز ګوند مشر بلاول بوټو زرداري او د سیند اعلا وزیر مراد علي شاه نومونه له هېواده د ممنوع الخروج کسانو له لېسټ (اېګزېټ کنټرول لېسټ یا اي سي اېله) د ایستلو امر کړی دی.

د جنورۍ پر اوومه د بېنومه او جعلي بانکي حسابونو مقدمې د اورېدنې پر وخت چیف جسټس میا ثاقب نثار د احتساب قامي ادارې (نیب) ته امر وکړ چې تازه پلټنې دې پیل او په دوو میاشتو کې دې یې سر ته ورسوي.

د پاکستان حکومت د ۲۰۱۸ز کال ډېسېمبر پر ۲۷مه، د جعلي او بې نومه بانکي حسابونو یا اکاونټونو قضیې په تړاو د ګوند د مشرانو اصف علي زرداري، بلاول بوټو زرداري او د سیند اعلا وزیر مراد علي شا په ګډون د ۱۷۲ کسانونو نومونه له هېواده د ممنوع الخروج کسانو په لېسټ کې د اچولو اعلان وکړ.

دا اقدام حکومت تر هغې وروسته وکړ چې د ناقانونه پیسو سپینولو په اړه د ګډې تحقیقاتي ډلې په رپورټ کې یاد کسان ذمه واره او تورن بلل شوي ول.

د ډېسېمبر پر ۲۴مه، د پاکستان د وفاقي تحقيقاتي ادارې اېف ای اې یوه مشر احسان صادق په لاهور کې د سپریم کورټ څانګې ته د ګډې پلټنیزې ډلې د رپورټ وړاندې کولو پر مهال له عدالته غوښتنه وکړه چې د اصف علي زرداري په ګډون د نورو يو شمېر کسانو نومونه دې د هغو کسانو په لېسټ کې واچوي چې له هېواده پر بهر تګ یې بندیز دی.

په دې رپورټ کې کې اصف علي زرداري او د اومني ګروپ په نوم یو شرکت د جعلي اکاونټونو په وسيله د ناقانونه پیسو سپینولو او مالي ګټو تر لاسه کولو په تور، تورن شوي.

صادق عدالت ته وویل چې په کراچۍ او لاهور کې د بلاول هاوس په نوم د پیپلز ګوند د دفترونو او د زرداري د شخصي لګښتونو پیسې له بې نومه بانکي حسابونو څخه ورکول کېدې.

زرداري او ګوند یې دا تورونه په بیا بیا رد کړي او وايي، له اپوزیشنه د احتساب په نوم سیاسي غچ اخیستل کېږي.

خو د جنورۍ پر اوومه د مقدمې د اورېدنې پرمهال ثاقب نثار د پاکستان له لوی څارنواله وپوښتل چې پر څه اساس يې د بلاول بوټو زرداري نوم نوم په فهرست کې اچولی دی؟هغه زياته کړه چې په کمپنۍ کې د ونډې لرلو مانا دا نه ده چې نوموړی د جعلي بانکي حسابونو په سکېنډل يا رسوایۍ کې شامل دی.

البته نوموړي نېب ته وويل چې د پلټنو پر مهال له بلاول بوټو او مراد علي شاه څخه په خلاص مټ پوښتنې کولای شي.

د پاکستان د پلټنو فېډارلي اداره د جعلي بانکي اکاونټونو پلټنې کوي چې په اړه ېي ويل کېږي چې د ۲۰۱۳ او ۲۰۱۴ز کلونو په دوران کې جوړ شوي ول چې له لارې یې په اربونو روپۍ په ناقانونه توګه له هېواده دباندې لېږدول شوې دي.

ستاسې نظر

تبصرې ښکاره کړئ

XS
SM
MD
LG