چین په افغانستان کې د سرتېرو ځای پر ځای کولو یا هلته د پوځي اډې جوړولو رپورټونه رد کړي او ویلي دي چې له خپل ګاونډي سره یوازې عادي پوځي او امنیتي همکاري کوي.
د چین د دفاع وزارت ویاند وو چیان بېګا ناوخته وویل چې د هانګ کانګ په یوه ورځپاڼه او نورو رسنیو کې دا خبر چې چین د افغانستان په ختیځ کې په یوه اډه کې د سلګونه سرتېرو ځای پر ځای کولو پلان لري، ناسم دی.
په وروستیو کې ناتایید شویو رپورټونو د افغانستان په واخان کې ګاډي ښودلي دي چې د چینايي پوځي ګاډو ته ورته دي.