د لاسرسي ځای

تازه خبر

د پاکستان په انتخاباتو کې تحریک انصاف زیاتې څوکۍ ګټلې دي

د جولای پر ۲۵مه، د پاکستان د قامي او صوبايي اسمبلیو نتیجې راروانې دي او لومړنۍ، نارسمي او غیر حتمي پایلې ښيي چې د پاکستان تحریک انصاف ګوند د قامي اسمبلۍ زیاتې څوکۍ ګټلې دي. مسلم لیګ (ن) او پیپلز ګوند پر دویم او درېیم نمبر ښکاري.


یو سړی د جولای پر ۲۶مه په اخبار کې نتیجې ویني

لنډیز

  • په پاکستان کې د مسلم لیګ (ن)، پیپلز ګوند او متحده مجلس عمل مشرانو د جولای پر ۲۵مه د شویو انتخاباتو نتیجې رد کړې دي.
  • له لومړنیو، نارسمي او غیر حتمي نتیجو سره سم، د پاکستان تحریک انصاف ګوند د قامي اسمبلۍ زیاتې څوکۍ تر لاسه کړې دي.
  • د جولای پر ۲۵مه شپې ناوخته د مسلم لیګ (ن) مشر میا شهباز شریف خبري غونډې ته وویل، په ټول سیاسي ژوند کې یې داسې ډاروونکی حالت نه وو لیدلی.
  • ده وویل:“له یو شمېر سیمو څخه راته شکایتونه راغلل چې زموږ د ووټونو اېجنټان له مرکزونو ایستل شوي ول. له ما سره ویډیوګانې دي چې په ملتان کې زموږ ښځینه کارکوونکو ژړل چې موږ وبښئ.”
  • شریف زیاته کړه چې په لاهور، راجنپور، خیبر پښتونخوا او یو شمېر نورو سیمو کې یې له ګوندي غړو سره ناروا چلند وشو.
  • د پیپلز ګوند یوه مشر او سېنېټر میا رضا رباني هم د شپې مهال خبریالانو ته په وینا کې ورته خبره وکړه.
  • ده تور پورې کړ چې انتخاباتي کمېشن او نګران حکومت د رڼو ټاکنو په کولو کې ناکامه شول.
  • “موږ پر دې نتیجو اندېښنې لرو. د پاکستان پیپلز ګوند پولېنګ اېجنټان د رایې ورکولو له مرکزونو ایستل شوي ول.”
  • رباني وویل، دا ډول انتخابات به خطرناکې پایلې ولري.
  • هلته د متحده مجلس عمل په نوم د مذهبي ګوندونو اتحاد یوه مشر مولانا فضل الرحمان هم تور پورې کړ چې په ټاکنو کې درغلي شوې او ویې ویل چې پر دې موضوع به ژر ټولګوندیزه غونډه وروغواړي.
  • خو د پاکستان تحریک انصاف یوه مشر شاه محمود قریشي د ټولو سیاستوالانو تورونه رد کړل او ویې ویل چې ګوند یې د عمران خان په مشرۍ لوړ مقام ته ورسېد.
  • اسوشي اېټډ پرېس اژانس او پاکستانۍ رسنۍ وايي، لومړۍ نارسمي نتیجې ښيي چې پاکستان تحریک انصاف ګوند د قامي اسمبلۍ ډېرې څوکۍ ګټلې دي.
  • د جولای پر ۲۵مه، میلیونونه خلکو د قامي اسمبلۍ ۲۷۲ څوکیو لپاره رایې واچولې. هر ګوند چې له دې څخه ۱۳۷ څوکۍ وګټي هغه وفاقي حکومت جوړولای شي.
  • له دې علاوه د قامي اسمبلۍ ۶۰ څوکۍ د ښځو او ۱۰ یې د لږکیو لپاره ځانګړې دي. پر دې څوکیو خلک رایه نه اچوي بلکې هر ګوند چې څومره زیاتې څوکۍ ګټي، هومره زیاتې ځانګړې څوکۍ تر لاسه کوي.
  • لومړني اټکلونه ښيي چې د عمران خان ګوند ښايي څه د پاسه ۱۰۲ څوکۍ وګټي.
  • رسنۍ وايي، مسلم لیګ (ن) د قامي اسمبلۍ پر ۶۶ او پیپلز ګوند پر ۳۹ حلقو مخکې وو.

د مشال راډیو په دې ژوندي بلاګ کې به ټوله ورځ درسره نارسمي او غیر حتمي نتیجې شریکې کړو.

۰۷:۱۹ ۲۷.۷.۲۰۱۸
انځور سایز سېلاب مسود

د جنوبي وزیرستان انتظامي او انتخاباتي چارواکي وايي، د قامي اسمبلۍ د ۴۹مې حلقې څوکۍ د پارلېمان پخواني غړي او د متحده مجلس عمل امېدوار مولانا جمال الدین ګټلې ده.

دوی د جولای ۲۶مې پر ماخوستن (ماسخوتن) مشال راډیو ته وویل چې د جنوبي وزیرستان دویمه پارلېماني څوکۍ خپلواک نوماند محمد علي وزیر وګټله.

۰۷:۰۹ ۲۷.۷.۲۰۱۸
انځور سایز عمر وزیر

په شمالي وزیرستان کې انتظامي او انتخاباتي چارواکو د قامي اسمبلۍ د ۴۸مې حلقې نتیجه اعلان کړې ده او ویلي یې دي چې خپلواکه نوماند محسن جاوېد دوړ د متحده مجلس عمل مصباح الدین ته ماته ورکړې ده.

دوړ خپله هم پر ټوېټر د رسمي نتیجو پاڼه شریکه کړې.

۲۰:۰۸ ۲۶.۷.۲۰۱۸
انځور سایز پامیر ساحل

د پاکستان انتخاباتي کمېشن ویلي دي چې د جولای پر ۲۵مه د قامي او صوبايي اسمبلیو په ټاکنو کې یې د درغلۍ هېڅ شکایت نه دی تر لاسه کړی.

د کمېشن سېکرټر بابر یعقوب د جولای پر ۲۶مه په خبري غونډه کې وویل، د ټاکنو په اړه یې یوازې پروسیجري یا انتظامي شکایتونه تر لاسه کړي خو هېڅ ګوند یا امېدوار ورته د درغلۍ نه دي ویلي.

ده زیاته کړه چې انتخابات پوره شفاف او منصفانه ول.

نور پورته کړئ

تبصرې وګورئ (۲)

دا فورم بندشوی \ دبحث داخونه بنده شوې
XS
SM
MD
LG