د پاکستان په انتخاباتو کې تحریک انصاف زیاتې څوکۍ ګټلې دي

د جولای پر ۲۵مه په پاکستان کې د شویو انتخاباتو نتیجې ښيي چې پاکستان تحریک انصاف ګوند زیاتې څوکۍ ګټلې دي.

تر دې وروسته مسلم لیګ (ن) د قامي اسمبلۍ زیاتې څوکۍ ګټلې دي او پیپلز ګوند پر درېیم مقام دی.

خو د پاکستان ۱۱مې ټولټاکنې داسې وې چې پکې ځېنو لویو او پخوانیو سیاستوالانو څوکۍ وبایللې.

که د خیبر پښتونخوا او د بلوچستان د پښتون مېشته سیمو مثال ورکړو نو هلته د لویو ګوندونو مشرانو هم پارلېمان ته لار پیدا نه کړای شو.

د پاکستان په انتخاباتو کې د بایلونکو لویو پښتنو سیاستوالانو په اړه مو ځانګړی فیچر رپورټ جوړ کړی چې تاسې یې په لاندیني لېنک کې لوستای شئ:

د پاکستان په ټاکنو کې بايلونکي مشهور سياستوال

عمران خان وايي د درغلۍ ضد به اقدامات کوي، له ګاونډیو هېوادونو سره اړیکي ښه کوي

پراګ - د پاکستان تحریک انصاف مشر عمران خان په خپله وینا کې ویلي دي چې د واک تر لاسه کولو وروسته به د درغلیو او اداري فساد ضد اقدامات کوي.

نوموړي د جولای پر ۲۶مه تر انتخاباتو وروسته په خپله لومړۍ ولسي وینا کې وویل، په کورنۍ او بهرنیو تګلارو کې بدلونونه راولي.

د پاکستان انتخاباتي کمېشن او دولتي ټېلېوېژن له معلوماتو سره سم، د عمران خان ګوند پاکستان تحریک انصاف د قامي اسمبلۍ زیاتې څوکۍ تر لاسه کړې دي.

مسلم لیګ (ن) تر دې وروسته زیاتې څوکۍ ګټلې دي او پیپلز ګوند پر درېیم مقام دی.

خو مسلم لیګ (ن) او پیپلز ګوند د انتخاباتو نتیجې رد کړې دي.

عمران خان په خپله وینا کې ټولو ګوندونو ته دعوت ورکړ چې پر هرې حلقې چې د درغلۍ شک لري، دی ورسره په پلټنو کې همکارۍ ته تیار دی.

د تحریک انصاف ګوند مشر په خبرو کې د کورنۍ او بهرنۍ تګلارې مهمې نکتې بیان کړې.

د کورنیو چارو تګلاره

• د حکومتولۍ سمول او د ولس ژوند اسانول
• د بهرنۍ پانګونې لپاره حالات سازول
• د بېوزلۍ او غربت پر ضد اقدامات
• اقتصادي اصلاحات راوستل
• د لوړپوړو چارواکو، وزیراعظم او وزیرانو ژوند ساده کول:”په غریب هېواد کې د ولس د ټیکسونو په پیسو په ماڼیو کې اوسېدل ناسم کار دی. “
• د اداري فساد او درغلۍ ضد پراخ اقدامات

د بهرنیو چارو تګلاره

چین

• په پاکستان او سیمه کې د سولې او ثبات ټینګښت او له ګاونډیو سره ښه اړیکي.
• له چین سره د تعلقاتو پراخول، د چین – پاکستان اقتصادي لار پر ارزښت ټینګار.
• له چینه د غربت ختمولو او درغلۍ ضد اقداماتو په اړه د سبق اخیستو لپاره هلې ځلې کول.

افغانستان

• افغانانو د ترهګرۍ پر ضد په جګړه او تر هغې مخکې د کورنۍ جګړې پر مهال زښت مشکلات ګاللي. افغانان سوله غواړي او پاکستان دویم هېواد دی چې هلته سوله غواړي.
• د افغانستان د سولې لپاره هڅې کول.
• له افغانستان سره د داسې اړیکو هیله چې پکې د اروپايي ټولنې په څېر پولې خلاصې وي.

امریکا

• له امریکا سره د داسې اړیکو جوړول چې اسلام اباد و واشنګټن دواړو ته ګټه ورسوي.
• له واشنګټن سره ګټور او متوازن تعلقات ټینګول.

هند

• عمران خان له هندیو رسنیو ګیله وکړه چې د انتخاباتو پر مهال یې دی د هندي فلمونو بدمعاش په څېر وښود او دعوه یې وکړه چې که دی واکمن شي نو د نوي دلي لپاره به ښه نه وي.
• عمران خان وویل، له هند سره د سوداګریزو اړیکو پراخول او د کشمیر پر مسلې خبرې کول غواړي:”که [هند] زموږ لوري ته یو پل واخلي، موږ به دوه قدمه مخکې ورشو. “

له ایران او سعودي عرب سره اړیکي

• له ایران او سعودي عرب سره د اړیکو پراخول، لا پیاوړي کول.
• عمران خان زیاته کړه چې اسلام اباد په منځني ختیځ کې د ګډوډۍ ختمولو لپاره د منځګړي رول ادا کولو ته تیار دی.

د جنوبي وزیرستان ۴۹مې حلقې صورتحال

د جنوبي وزیرستان انتظامي او انتخاباتي مشر ویلي، د ۴۹مې حلقې په اړه یې نتیجه نه ده اعلان کړې.

تر دې مخکې له جنوبي وزیرستان څخه د قامي اسمبلۍ ۴۹مې حلقې ته نوماند او د پارلېماني پخواني غړي مولانا جمال الدین دعوه کړې ده چې انتخابات یې ګټلي دي.

خو انتظامي او انتخاباتي مشر سهېل احمد خان د جولای پر ۲۶مه مشال راډيو ته وویل چې له ځېنو پولېنګ سټېشنو څخه ووټونه لا پر لار دي او دفتر ته یې نه دي رسېدلي.

ده زیاته کړه چې د ۴۹مې حلقې په اړه یې د هېچا د بریا یا بایلات اعلان نه دی کړی.

د جولای پر ۲۵مه د خیبر پښتونخوا په دیر کې تر کلونو وروسته ښځو په لومړي ځل خپل ووټونه وکارول.

تر دې مخکې په سیمه کې به سیاسي ګوندونو او خلکو جرګې کولې او ښځې به یې له ووټ ورکولو ګرځولې.

په ۲۰۱۷ز کال کې د پاکستان پارلېمان د هېواد په انتخاباتي قانون کې بدلون وکړ او دا شرط یې پکې کښېښود چې که په یوه حلقه کې د ښځینه ووټونو شمېر له ۱۰ فیصده کم وي نو هلته به ټاکنې باطلېږي.

همدې ته په کتو، په اکثرو سیمو کې خلک او ګوندونه اړ شول چې ښځې هم د رایې کارولو ته وهڅوي.

د دیر یو شمېر ښځو له مشال راډیو سره په خبرو کې وویل، خوشاله دي چې بالاخره ورته د ووټ ورکولو حق ورکړل شوی دی.