شمالي کوريا وايي چې د امريکا ولسمشر ډونلډ ټرمپ د شمالي کوريا په مرحله وار شکل غير اټومي کولو بهیر ته سلا شوی دی.
په همدې حال کې به دواړه هېوادونه په موازي ډول داسې ګامونه اخلي چې د دواړه رقيبو هېوادونو ترمنځ حالات سم وساتي.
دغه خبرې د شمالي کوريا رسمي خبري اژانس کوريين سنټرل نيوز اېجنسي خپرې کړې دي.
د امريکا ولسمشر دونلډ ټرمپ د شمالي کوريا له مشر، کيم جونګ اون سره د جون په ۱۲مه وکتل.
که د شمالي کوريا دا خبره سمه وي نو دا د ډونلډ ټرمپ په هغه دريځ کې نرموالی ښيي چې پخوا یې د شمالي کوريا د اټومي پروګرام په بشپړ ډول د له منځه وړلو خبره کړې وه.
هغه دا هم ويلی وو چې بندیزونه به هله ليري کېږي چې د غير اټومي کېدو دا بهیر پوره شي.
