د افغانستان د ملي امنیت شورا دې هېواد ته د متحده عربي اماراتو د نظامي سلاکارانو استول کیدل تایید کړي دي.
د ولسمشر د ویاند مرستیال شاه حسین مرتضوي مشال راډیو ته وویل چې په دې اړه د سېشنبې په ماښام په ارګ کې د ملي امنیت د شورا غونډه کې توافق وشو.
د مرتضوي په وینا تر اوسه افغانستان ته د عربي متحده اماراتو د نظامي سلاکارانو د استول کیدو دقیق وخت او شمیر نه دی نهايي شوی.
د ولسمشر د ویاند مرستیال مرتضوي زیاته کړه چې د متحده اماراتو نظامیان به د ناټو د قاطع ملاتړ د ماموریت په چوکاټ کې دنده ترسره کوي.
دا مهال په افغانستان کې نږدې ۱۵زره نړیوال سرتېري حضور لري چې ډېر یې امریکایان دي.
