د افغانستان د ننګرهار ولايت چارواکي وایي چې نن [سېشنبه] سهار د جلال اباد د ګمرګ په سیمه کې د تیلو په یوه ټانکر کې د شوې چاودنې له امله دوه تنه وژل شوي او دوه نور ټپيان شوي دي.
د ننګرهار د والي ویاند عطا الله خوګياڼي مشال راډيو ته وویل چې د چاودنې له امله شاوخوا ۳۰ هټيو هم اور اخېستی چې میلیونونه افغانۍ مالي زیان يې اړولی دی.
خوګیاڼي دا هم وویل چې اور په ټانکر پسې د نښلول شوي مقناطيسي ماين د چاودنې له امله رامنځته شوی دی.
نوموړي زیاته کړه چې سیمې ته پر وخت د اور وژنې عمله ورسېده چې اوس مهال اور مهار شوی دی.
